За два гады дзейнасьці міжнародная валянтэрская супольнасьць InformNapalm назьбірала шмат сьведчаньняў таго, што расейскае вайскова-палітычнае кіраўніцтва дзеля дасягненьня сваіх імпэрскіх мэтаў выкарыстоўвае ў незалежнасьці ад геаграфіі адны і тыя ж брудныя мэтоды, рэалізуючы іх з дапамогаю адных і тых жа сілаў і сродкаў. Расея, якая справакавала шэраг канфліктаў яшчэ ў пост-савецкі час, узбагаціла раней атрыманы досьвед праз новыя гібрыдныя элемэнты, выкарыстоўваючы ўсе гэта на іншых напрамках – як супроць Украіны, гэтак і на Блізкім Усходзе. У гэтай публікацыі мы падаем службовы сьпіс расейскага вайскоўца-кантрактніка 7-й акупацыйнай вайсковай базы з г. Гудаута (Абхазія, Грузія), які цягам апошняга году быў зафіксаваны ня толькі ў «растоўска-украінскай», але і ў «сірыйскай» камандыроўцы.
У выніку OSINT-дзеяньняў (выведка адкрытых крыніцаў) у сацыяльным сеціве «VK» быў выяўлены профіль расейскага кантрактніка 7-й расейскай вайсковай базы з г. Гудаута (акупаваная Абхазія, Грузія).
На тэрміновую вайсковую службу Іван Іваноў быў рэкрутаваны ў 2013 годзе. Пасьля шкаленьня ў навучальным Цэнтры ПКС у г. Яраслаўлі ў спэцыяльнасьці «апэратар зараджалай машыны 22Т6, зэнітна-ракетнага комплексу тыпу С-300/С-400» быў накіраваны для праходжаньня далейшай службы ў групу зэнітна-ракетных дывізыёнаў 7-й акупацыйнай вайсковай базы 49-й агульнавайсковай арміі (в/ч 09332) ПВА ЗС РФ г. Гудаута (Абхазія, Грузія). Перад заканчэньнем гадавога тэрміну службы, падпісаў 3-х гадовы кантракт у гэтым жа вайсковым злучэньні – меркавана – ў выведпадразьдзяленьні 4-га мотастралковага батальёну, укамплектаванага кантрактнікамі, з разьлікам на камплектаваньне БТРг, дзе ён служыць дагэтуль.
З пачаткам акупацыі Крыма і распальваньнем канфлікту на Данбасе, расейскае вайсковае камандаваньне ўжо другі год запар трымае ля мяжы з Украінай магутную ўдарную групоўку войскаў. Расейскія войскі, якія знаходзяцца ў памежных з Украінаю раёнах, арганізаваныя ў выглядзе мабільных падразьдзяленьняў – батальённа- і ротнатактычных групаў (Б/(Р)ТГр) з вайсковых злучэнняў 4-х вайсковых акругаў і берагавых войскаў ВМФ, якія ўжо неаднойчы былі задзейнічаныя ў крытычныя для «наваросіі» моманты, для пералому сытуацыі на карысьць «сэпаратыстаў» (гл. базу дадзеных пра больш чымся 60 в/ч ЗС РФ, зафіксаваных ва Украіне). Баявая варта Б/(Р)ТГр ажыцьцяўляецца паводле ратацыйнай схемы, тэрмін камандыроўкі – ад 3-х да 5-ці месяцаў. Да «растоўска-украінскай» камандыроўкі часьцей за іншыя прыцягваюцца вайсковыя злучэньні Паўднёвае вайсковае акругі ЗС РФ. Пры гэтым як тактычныя групы 7-й акупацыйнай вайсковай базы з г. Гудаута, гэтак і асобныя ейныя вайскоўцы, якія апынуліся нейкім чынам у складзе НЗФ «Д/ЛНР», што фігуруюць у 16 расьледаваньнях InformNapalm, датычных вайсковай авантуры Расеі супроць Украіны.
Нягледзячы на тое, што фігурант Іван Іваноў ня мае ў фотаальбомах здымкаў, якія сьведчаць пра ягоную “ўкраінска-сірыйскую” камандыроўку, якія мы прызвычаіліся знаходзіць у профілях іншых расейскіх вайсковых злачынцаў, што ператвараюцца на «данбаскіх шахтароў-сэпаратыстаў», ускосных доказаў у выглядзе фота і камэнтароў больш чым дастаткова.
– «Растоўска-ўкраінская камандыроўка» Вані Іванова стартавала ў студзені 2015 году і доўжылася да чэрвеня 2015 году. Да перакідваньня ў Растоўскую вобласьць на 7-й вайсковай базе ў Гудауце была сфармаваная новая БТГр праз тое, што большасьць кантрактнікаў з папярэдніх тактычных групаў, якія прайшлі праз падобнага кшталту камандыроўкі, вырашылі звольніцца паводле ўласнага жаданьня. Пасьля нядоўгай падрыхтоўкі й зладжваньня гудауцкіх акупантаў перакінулі ў Растоўскую вобласьць – у адзін з базавых лягероў растоўскае групоўкі – разьмешчанай у раёне Кадамаўскага палігону.
Заўвага: на 7-й в/базе практыкуецца падпісаньне кантракту рэкрутаванымі вайскоўцамі пасьля 6-8 месяцаў службы. Зарплата кантрактніка – каля 45 тысяч рублёў плюс палявыя і баявыя. Перавод у іншыя вайсковыя часткі і тым больш звальненьне да заканчэньня тэрміну спрычыніцца да праблемаў. Але шмат каму жыцьцё даражэй, чымся штамп пра праф.непрыдатнасьць у асабістай справе. Гл. папярэднія публікацыі ў тэме “Тэрміноўцаў 7-й вайсковай базы РФ масава вярбуюць у кантрактнікі для “ўкраінскіх камандыровак”” і “З мандарынавага раю ва ўкраінскае пекла”.
Як было зазначанае вышэй, у фотаматар’ялах Івана Іванова няма звыклых нам фота ў амплуа «апалчэнца», але шэраг ускосных момантаў сьведчаць пра тое, што ён удзельнічаў у баявых дзеяньнях на Данбасе. Напрыклад, з 12 па 20 сакавіка 2015 г. у фотаальбоме Іванова паўза, пасьля якой зьяўляецца фота з узнагародаю – «Мэдаль Жукава» №0561, выдадзенай паводле ўказу вярхоўнага галоўнакамандуючага – прэзыдэнта РФ з 22-га студзеня 2015 г., цалкам магчыма, «авансам» за тое, што вырашыў сам паехаць у “камандыроўку” ў складзе БТГр. Да фота з узнагародай пададзены і камэнтар фігуранта з вытрымкай з уставы да мэдалю.
Тое, што Іваноў у межах «растоўскае камандыроўкі» быў ва Украіне, пацьверджвае камэнтар ягонай маці з 25 жніўня 2015 г. Сьвятланачкі Івановай-Валодзінай (падаем тут і далей у арыгінале):
«поседею. мало украины мне было, теперь сирию подавай» (гл. архіў у спасылцы з камэнтарамі).
Някепскі ваяж для жаўнера-кантрактніка і тройчы акупанта. За год Іваноў пасьпеў зьдзейсьніць турнэ у «крывавым коле» – Абхазія, Грузія – Растоў – Данбас – Сірыя, а таксама некалькі разоў быў у адпачынку ў родным Сьпірава, упэшце павярнуўся ў пачатковы пункт – на акупацыйную вайсковую базу ў Гудауце.
Нас неаднойчы пыталі, чаму InformNapalm пазыцыянуе сябе як міжнародная валянтэрская супольнасьць. Спадзяемся, што адказ на гэта чытач атрымаў з гэтай публікацыі. Сёньня на пярэднім краі інфармацыйнага фронту, які супрацьстаіць расейскай агрэсіі, стаяць валянтэры з Украіны, Беларусі, Грузіі і шэрагу іншых краінаў, у тым ліку, якія асабіста зазналі гора і беды, якія нясе расейская агрэсія.
Нашыя валянтэры спрабуюць данесьці да сусьветнай супольнасьці праўду і паказаць сапраўднае аблічча носьбітаў «русского мира». Калі Захад і далей працягне палітыку “охаў і ахаў», час ад часу выказваючы занепакоенасьць і заклапочанасьць, і ў той жа час гуляючы з Крамлём, неўзабаве мы можам стаць сьведкамі іншых, у тым ліку і эўрапейскіх, камандыровак «Ваняў Івановых».
Азнаёміцца з факталягічнай доказавай базай дадзеных расьледаваньняў InformNapalm што да ўдзелу ў баявых дзеяньнях ва Украіне больш чымся 60 вайсковых падразьдзяленьняў ЗС РФ можна праз спасылку http://bit.ly/RussianPresence.
У спасылках ніжэй пададзеныя 16 эпізодаў з фактамі ўдзелу вайскоўцаў 7-й вайсковай базы ЗС РФ у вайсковай авантуры супроць Украіны:
- «Калі няма чаго рабіць»: Гульні расейскіх акупантаў на Данбасе.
- Кантрактнік ЗС РФ з 7-й вайсковай базы ваюе ў складзе бандфармаваньняў ДНР.
- Расея перакідвае тэхніку 7-й вайсковай базы ў Растоўскую вобласьць.
- Зафіксаванае маштабнае перакідваньне сілаў і сродкаў ЗС РФ з акупаванай Абхазіі.
- Легенда-біяграфія “колішняга” вайскоўца 7-й вайсковай базы.
- Вайскоўцы 7-й вайсковай базы ЗС РФ перагульваюць падчас пераапрананьня ў баявікоў “ДНР/ЛНР”.
- Чарговыя ўзнагароджаныя з 7-й акупацыйнай вайсковай базы ў выніку ўкраінскіх камандыровак.
- Міхос “адважны” – выведнік 7-й в/базы, кавалер мэдалю “За адвагу”.
- Тэрміноўцаў 7-й вайсковай базы РФ масава вярбуюць ў кантрактнікі для “ўкраінскіх камандыровак”.
- Вайскоўцаў 7-й вайсковай базы РФ з Абхазіі за ўдзел у баёх на Данбасе ўзнагароджваюць мэдалямі.
- “З мандарынавага раю ва ўкраінскае пекла”: як расейскіх кантрактнікаў добраахвотна-прымусовым чынам выпраўляюць забіваць украінцаў.
- Рэактыўная артылерыя 7-й расейскай акупацыйнай базы з Абхазіі на мяжы з Данбасам.
- «Інтэрны» – мэдычнае падразьдзяленьне 7-й вайсковай базы з Абхазіі на мяжы з Украінай.
- «Данецкі экспрэс» – ідэнтыфікацыя расейскай тэхнікі і ўзбраеньня, якое перакідваюць на Данбас.
- Баявыя разьлікі САУ “Акацыя” 7-й вайсковай базы, якія “партызаняць” у лясох уздоўж мяжы з Украінай.
- «Падвойны ўдар» Лі па афіцэрах ПВА Збройных сілаў Расеі.
Матар’ял да публікацыі падрыхтаваны на падставе ўласнага OSINT-расьледаваньня міжнароднай валянтэрскай групай InformNapalm.
Аўтар расьледаваньня – Іраклі Камахідзэ.
На беларускую мову пераклаў Дзяніс Івашын.
(CC BY 4.0) Інфармацыя падрыхтаваная адмыслова для сайту InformNapalm.org, падчас поўнага або частковага перадруку й выкарыстаньня матар’ялу наўпроставая спасылка на аўтара і наш праэкт абавязковая.
Мы заклікаем чытачоў актыўна пашыраць нашыя публікацыі ў сацыяльных сетках. Наданьне матар’ялам расьледаваньняў шырокае агалоскі здатнае зьмяніць хаду інфармацыйнага і баявога супрацьстаяньня з Крамлём. Разам пераможам!