Валянтэры міжнароднае супольнасьці InformNapalm ужо неаднойчы падавалі матар’ялы, якія сьведчаць пра гібрыднае аблічча расейскай арміі, асабісты склад якой зь вялікім імпэтам любіць пераўвасабляцца з кадравых вайскоўцаў на шахтароў Данбаса і наадварот. Зараз жа мы ёсьць сьведкамі іншае тэндэнцыі, калі адны і тыя ж вайсковыя злучэньні ЗС РФ, а таксама канкрэтныя людзі за апошнія паўтара году пасьпелі праявіць сябе як на ўкраінскім Данбасе, гэтак і ў Сірыі. Па-іншаму, відаць, было немагчыма: некалькі тысячаў расейскіх вайскоўцаў прайшлі праз «растоўска-ўкраінскія» камандыроўкі, атрымалі значны баявы досьвед, і сёньня гэтыя «ветэраны» Данбаса вельмі запатрабаваныя Крамлём у Сірыі. У гэтай публікацыі падаем сьведчаньні «сірыйскае камандыроўкі» расейскіх вайскоўцаў 21-й асобнай мотастралковай брыгады Цэнтральнае вайсковае акругі (ЦВА), якая неаднойчы фігуравала ў нашых расьледаваньнях, датычных Данбаса.
У выніку зьдзяйсьненьня OSINT (выведка адкрытых крыніцаў) сацыяльных сетак былі выяўленыя і ўзятыя на кантроль профілі некалькіх расейскіх вайскоўцаў-кантрактнікаў з складу 21-й асобнай мотастралковай брыгады (в/ч 12128, мейсца дысьлякацыі – пас. Тоцкое Арэнбургскай вобл., ЦВА ЗС РФ), якія прайшлі празь сірыйскую камандыроўку.
Заўвага: гэтая брыгада добра вядомая ў кантэксьце «ўкраінскіх камандыровак», ейныя недальнабачныя вайскоўцы выкладвалі ў Сеціва сьведчаньні свайго знаходжаньня на Данбасе. Адзін з апошніх эпізодаў зьвязаны з выяўленьнем каля 20 асобаў з зэнітна-ракетнага дывізыёну ЗРК «Тор» Арэнбургскай брыгады, якія нядаўна павярнуліся ў мейсца дысьлякацыі сваёй часткі пасьля паездкі на Данбас. Арэнбургскі ваякі мелі і іншыя «засьветы», у тым ліку фотасэсіі на тле зьнішчаных расейскіх танкаў пад Старабешавым.
Але павернемся да нашых бараноў, ці больш дакладна да групы кантрактнікаў 21-й АМСБр з Арэнбурга, якія выкрылі сябе і брыгаду падчас сірыйскай камандыроўкі. Частка пададзеных ніжэй фігурантаў пасьпела падчысьціць свае фатаздымкі зь Сірыі, хтосьці выдаліў і профілі, але для нас гэта не праблема, бо архівы InformNapalm захоўваюць сотні профіляў і фота вайскоўцаў РФ, якія скампрамэтавалі сябе праз злачынныя “камандыроўкі”.
- Іван Дымніч – 24 студзеня 1995 г.н., родам зь вёскі Дамбароўскі Арэнбугскае вобл. (архівы акаўнта ў сацсеціве «VK»: профіль, фотаальбом, кантакты), сама старонка была выдалена раней.
Калектыўнае фота сірыйскіх камандыраваных з 21-й АМСБр зь геалякацыяй, выкладзенае 31 сьнежня 2015 г. (архіў).
- Радзік Турдалееў – 1993 г.н. (архівы акаўнту ў сацсеціве «VK» – профіль, фота, кантакты), які выклаў супольнае фота (гл. архіў) зь І.Дымнічам, іх абодвух нескладана апазнаць на калектыўным фатаздымку з архіву Дымніча. Р.Турдалееў таксама зьяўляецца «ветэранам» крымскае авантуры Крамля, пра што сьведчыць фота з мэдалькай «крымнаш» (архіў).
- Аляксей Цюменцаў – 9 жніўня 1995 г.н., родам зь вёскі Абацк Цюменскае вобл. (архівы акаўнту ў сацсеціве «VK» – профіль, фотаальбом, кантакты), мае сірыйскія фота з студзеня 2016 году.
- Аляксандар Пятроў – 1996 г.н., родам з мястэчка Бугуруслан Арэнбургскае вобл. (архівы акаўнта ў сацсеціве «VK» – профіль, кантакты). Ён выдаліў сэрыю фатаздымкаў зь cірыйскае камандыроўкі, але здымкі захаваныя ў анлайн-архіве профілю і ў архіве InformNapalm.
- Газыльян Фазыльянавіч Кусакоў – родам зь сяла Ідэльбакава, Рэспубліка Башкартастан (архівы акаўнта ў сацсеціве «VK» – профіль 1, 2, 3, фота, кантакты), мае сірыйскія фота з студзеня і сакавіка 2016 году.
Нягледзячы на ўсе запэўніваньні крамлёўскіх палітыкаў і камандаваньня ЗС РФ пра тое, што ў Сірыі няма расейскага сухапутнага кантынгэнту, за выключэньнем спэцназа і дарадцаў, InformNapalm выявіў асабовы склад больш за 10 вайсковых частак сухапутных войскаў расейскай арміі, якія задзейнічаныя ў вайсковай кампаніі ў гэтай блізкаўсходняй дзяржаве:
- 66-я асобная брыгада сувязі (в/ч 41600, г. Стаўрапаль);
- 27-я АМСБр (в/ч 61899, Падмаскоўе);
- 20-ы полк РХБА (в/ч 12102, г. Ніжні Ноўгарад);
- 74-я АМСБр (в/ч 21005, г. Юрга);
- 17-й вайсковы гарадок Навасібірска – 32-я мотастралковая брыгада і/або 24-я брыгада спэцназа (в/ч 55433 – 24-я АБрСпН ГРУ і/або в/ч 22316 – 32-я АСМБр);
- 291-я артылерыйская брыгада (в/ч 64670, Інгушэтыя);
- 200-я артылерыйская брыгада (в/ч 48271, Забайкальскі край);
- 120-я артылерыйская брыгада (в/ч 59361, г. Юрга);
- 34-я АМСБр горная (в/ч 01485, Карачаева-Чаркесія);
- 810-я АБрМП ЧФ (в/ч 13140, акупаваны Сэвастопаль, АР Крым, Украіна);
- 336-я АБрМП БФ (в/ч 06117, т.з. Калінінградзкая вобласць, анэксаваны Кёнігзбэрг);
- 28-й АМСБр (в/ч 61423, Екатэрынбург);
- 7-я вайсковая база (в/ч 09332, акупаваная Абхазія, Грузія);
- 21-я АМСБр, пададзеная ў гэтай публікацыі (в/ч 12128, Арэнбургская вобл.).
Агулам мы зафіксавалі 14 вайсковых частак, і гэта не ўлічваючы авіяцыйныю кампанэнту, падразьдзяленьні матар’яльна-тэхнічнага забесьпячэньня і шмат іншых, якія яшчэ не патрапілі ў нашыя сеткі.
InformNapalm спрабуе данесьці да сусьветнае супольнасьці праўду і паказаць сапраўднае аблічча “русского мира”. Калі Захад і далей працягне маўклівую палітыку «спачуваньня», цалкам мажліва, мы будзем сьведкамі іншых, у тым ліку і эўрапейскіх, “камандыровак” ЗС РФ.
Азнаёміцца з факталягічнай доказавай базай дадзеных расьледаваньняў InformNapalm што да ўдзелу ў баявых дзеяньнях ва Украіне больш чымся 60 вайсковых падразьдзяленьняў ЗС РФ можна праз спасылку http://bit.ly/RussianPresence.
Матар’ял да публікацыі падрыхтаваны на падставе ўласнага OSINT-расьледаваньня міжнароднай валянтэрскай групай InformNapalm.
Аўтар расьледаваньня – Іраклі Камахідзэ.
На беларускую мову пераклаў Дзяніс Івашын.
(CC BY 4.0) Інфармацыя падрыхтаваная адмыслова для сайту InformNapalm.org, падчас поўнага або частковага перадруку й выкарыстаньня матар’ялу наўпроставая спасылка на аўтара і наш праэкт абавязковая.
Мы заклікаем чытачоў актыўна пашыраць нашыя публікацыі ў сацыяльных сетках. Наданьне матар’ялам расьледаваньняў шырокае агалоскі здатнае зьмяніць хаду інфармацыйнага і баявога супрацьстаяньня з Крамлём. Разам пераможам!