Валянтэры міжнароднае супольнасьці InformNapalm зьдзейсьнілі ідэнтыфікацыю расейскай тэхнікі й узбраеньня з калібрам больш за 100 мм, якое выкарыстоўваюць баявікі «ДНР». Ідэнтыфікацыя зробленая на падставе здымкаў, атрыманых з электронных паштовых скрыняў «МГБ ДНР» і дакумантаў так званай «1-й асобнай мотастралковай брыгады ДНР», у якіх фігуравалі фатаздымкі сэрыйных нумароў тэхнікі й зброі (1-я АМСБр «ДНР», в/ч 08801, мейсца дысьлякацыі пас. Камсамольскае Данецкае вобласьці, тэрыторыя колішняй ПМК-106 і базы АПЗ (“ОРС”, рас.).
-
Зыходныя дадзеныя
Зыходныя дадзеныя для аналізу супольнасьць InformNapalm атрымала ад цэнтру «Міратворац». 27 ліпеня 2016 г. супрацоўнікі цэнтру зрабілі справаздачу пра пасьпяховую апэрацыю «Гейша», у выніку якой былі ідэнтыфікаваныя больш за 50 баявікоў так званага «1-га армейскага корпуса ДНР» расейска-тэрарыстычных войскаў, а таксама было раскрытае сеціва інфарматараў на тэрыторыях, падкантрольных Украіне. Арганізатарам гэтага сеціва зьяўляецца супрацоўніца «МГБ ДНР» Алена Гейшторава, якая займалася зборам дадзеных пра склад, персоўваньні й дысьлякацыю падразьдзяленьняў ЗСУ, якія яна перадавала расейскаму вайсковаму камандаваньню.
У адной з паштовых скрыняў «МГБ ДНР», доступ да якой супрацоўнікі «Міратворца» атрымалі дзякуючы нядбаласьці Гейшторавай, і былі выяўленыя дакуманты «1-й асобнай мотастралковай брыгады ДНР», сярод якіх маюцца і фатаздымкі сэрыйных нумароў тэхнікі й узбраеньня з калібрам больш за 100 мм, адведзенага паводле Менскіх пагадненьняў. Здымкі былі перададзеныя валянтэрам InformNapalm дзеля аналізу й публікацыі.
Аналіз інфармацыі
Адведзеная тэхніка маецца ва ўзбраеньні «1-й АМСБр». Адказны за тэхніку і артылерыйскае ўзбраенне – начальнік артылерыі «брыгады», маёр П.Белапашанцаў. Дакладнае мейсцазнаходжаньне базы захоўваньня вызначанае дзякуючы адмыслоўцу у геалякацыі surpher: база знаходзіцца ў ваколіцах населенага пункту Ульянаўскае Данецкае вобласьці.
Нагадаем, што ў лістападзе 2015 году валянтэры InformNapalm таксама фіксавалі схаваныя ад прадстаўнікоў маніторынгавай місыі АБСЭ самаходныя гаўбіцы 2С1 «Гвазьдзіка» пазначанай «брыгады» у населеным пункце Пятроўскае.
Падчас аналізу фатаздымкаў з паштовай скрыні «МГБ ДНР» былі выяўленыя:
4 баявыя машыны РСЗВ «Град» БМ-21 на базе «Урал-375Д» – выдатны стан лакафарбавага пакрыцьця, новыя шыны, тэхніка ўкамплектаваная каркасам і маскавальнай сеткай, маюцца чахлы для краткаў радыятару:
- БМ-21 № 8056 – капітальны рамонт зроблены ў 1992 годзе;
- БМ-21 № 2119 – капітальны рамонт зроблены ў 1992 годзе;
- БМ-21 № 5139 – капітальны рамонт зроблены ў 1983 годзе;
- БМ-21 № РГ5073И.
5 самаходных артылерыйскіх установак 2С1 «Гвазьдзіка» – выдатны стан апорных каткоў і пярэдніх вядучых колаў, мінімальны нагар ля выкідной трубы:
- 2С1 № 979183 – 1989 году выпуску;
- 2С1 № 971109 – 1981 году выпуску;
- 2С1 № 975218 – 1985 году выпуску;
- 2С1 № 8904018 – 1989 году выпуску;
- 2С1 № 976218 – 1986 году выпуску.
2 супрацьтанкавыя гарматы МТ-12 «Рапіра» – выдатны стан лакафарбавага пакрыцьця, маюцца пазначэньні пра праходжаньне капітальнага рамонту й сьляды кансэрвацыі:
- МТ-12 № 04165 – 1974 году выпуску, раскансэрваваная з базы захоўваньня ўзбраеньня й тэхнікі, другая катэгорыя;
- МТ-12 № 03229 – 1973 году выпуску, раскансэрваваная з базы захоўваньня ўзбраеньня й тэхнікі, другая катэгорыя, капітальны рамонт зроблены ў студзені 1994 году.
Аналіз расейскага рэпартажу пра працу СММ АБСЭ
Апроч геалякацыі базы захоўваньня адведзенае тэхнікі, карыстальнік surpher перадаў для вывучэньня спасылку на відэарэпартаж расейскага прапагандысцкага каналу, зроблены на базе ў населеным пункце Ульянаўскае. Рэпартаж прысьвечаны прыезду спэцыялістаў СММ АБСЭ на базу для пераверкі сэрыйных нумароў тэхнікі. Цікава, што ў кадрах відэа фігуруюць два цягачы «Урал-4320» з дызельным рухавіком ЯМЗ-238 (іх адметнаю асаблівасьцю ёсьць тое, што паветраны фільтар усталяваны на правым крыле і падоўжаны маторны адсек). Сэрыйная вытворчасьць гэтай мадыфікацыі была пачатая ў 1994 годзе, ва ўзбраеньні Украіны падобнай тэхнікі няма.
Таксама прыцягвае ўвагу кадар, у якім зафіксаваны нататнік супрацоўніку АБСЭ. У ягоных запісах фігуруюць сэрыйныя нумары супрацьтанкавых гарматаў 2А29 №04165 і №03229, якія супадаюць з нумарамі гарматаў з паштовае скрыні «МГБ ДНР». Таксама ў нататніку пазначаны сэрыйны нумар САУ 2С1 «Гвазьдзіка» 978294, якога раней у дакумантах не было.
Яшчэ адным цікавым момантам ёсьць факт падмены расейска-тэрарыстычнымі войскамі САУ 2С1 «Гвазьдзіка» з бартавым нумарам 416. Аналягічныя інцыдэнты з падменай тэхнікі й разыходжаньнямі сэрыйных нумароў неаднойчы фіксавалі назіральнікі місіі АБСЭ (1, 2, 3).
-
Вытрымкі з справаздачаў СММ АБСЭ
«СММ таксама наведала чатыры мейсцы захоўваньня цяжкіх узбраеньняў «ДНР», якія адпавядалі лініі адводу. У двух мейсцах СММ пабачыла, што ўся зброя ёсьць у наяўнасьці. У трэйцім мейсцы захоўваньня СММ канстатуе адсутнасьць 5 мінамётаў (120-мм РМ-28). У чацвертым мейсцы СММ пабачыла, што сэрыйныя нумары на 3 гаўбіцах (122-мм Д-30) не адпавядаюць зарэгістраваным раней нумарам, і 1 супрацьтанкавае гарматы (100-мм МТ-12 “Рапіра”) не было. Да пятага мейсца захоўваньня СММ не атрымала доступ».
«СММ яшчэ раз наведала чатыры мейсцы сталага захоўваньня ўзбраеньня «ДНР», якія адпавядаюць лініі адводу. У трох з гэтых мейсцаў СММ канстатуе наяўнасьць усяго зарэгістраванага раней узбраеньня. У чацьвертым мейсцы колькасьць узбраеньня адпавядала інвэнтарным сьпісам, аднак была выяўленая неадпаведнасьць сэрыйных нумароў узбраеньня ў сьпісах і ў мейсцах захоўваньня».
«СММ паноўна наведала тры сталыя мейсцы захоўваньня ўзбраеньня «ДНР», якія адпавядаюць лініям адводу. У адным мейсцы СММ адзначыла наяўнасьць усяго запісанага раней узбраеньня. У другім мейсцы назіральнікі СММ зафіксавалі адсутнасьць двух зарэгістраваных раней АБТ (асноўны баявы танк) і запісалі сэрыйныя нумары двух дадатковых АБТ. У трэйцім мейсцы СММ адзначыла адсутнасьць аднаго зарэгістраванага раней АБТ і запісала сэрыйны нумар аднаго дадатковага АБТ».
Выснова
Падчас расьледаваньня, зьдзейсьненага на падставе зыходных дадзеных зь некалькіх крыніцаў (фатаздымкі з электроннай паштовай скрыні «МГБ ДНР» і відэафіксацыя працы СММ АБСЭ), былі пацьверджаныя факты неаднаразовага ўтойваньня й падмены аб’яднанымі расейска-тэрарыстычнымі войскамі ўзбраеньня з калібрам звыш 100 мм, а таксама выкарыстаньня тэхнікі, якой ніколі не было ва ўзбраеньні ЗСУ. Гэтыя факты чарговага разу дэманструюць галоўную ролю Расейскай Фэдэрацыі, як у пастаўках узбраеньня для баявікоў, гэтак і ў парушэньні Менскіх дамоўленасьцей.
Матар’ял да публікацыі падрыхтаваў валянтэр міжнароднае супольнасьці InformNapalm Міхаіл Кузьняцоў.
На беларускую мову пераклаў Дзяніс Івашын.
Заклікаем чытачоў актыўна пашыраць нашыя публікацыі ў сацыяльных сетках, на форумах і СМІ. Наданьне матар’ялам расьледаваньняў шырокае агалоскі здатнае зьмяніць хаду інфармацыйнага і баявога супрацьстаяньня з Крамлём.