Міжнародная выведвальная супольнасьць InformNapalm працягвае сэрыю публікацыяў з дадзенымі й візуальнымі доказамі што да ўдзелу фармаваньняў Паўночнага флёту РФ у баявых дзеяньнях на Усходзе Украіны. Сёньня да ліку раней апазнаных ваенных злачынцаў мы дадаем чацьвёра новых – трох звыштэрміноўцаў і аднаго афіцэра падразьдзяленьня РЭБ, якія ваявалі на Данбасе ўлетку-ўвосень 2014 году.
Чым далей у лес, тым таўсьцей «партызаны»
У выніку далейшага вывучэньня й аналізу профільных дадзеных ідэнтыфікаваных раней «ветэранаў растоўска-ўкраінскае камандыроўкі» з складу 200-й АМСБр Паўночнага флёту (гл. Апазнаныя паўночнаморцы, якія ваявалі на Данбасе) быў выяўлены сьлед іншых вайскоўцаў гэтага ж злучэньня, якія ўлетку-ўвосень 2014 году ўдзельнічалі ў агрэсіі супроць Украіны. Гэтак, у фотаальбоме аднаго з фігурантаў мінулага расьледаваньня (№4 Ядовін) была знойдзеная сэрыя фатаздымкаў, у якіх адлюстраванае палявое жыцьцё вайскоўцаў 200-й брыгады. Раней мы выказалі здагадку, што гэтыя здымкі зь вялікай верагоднасьцю маюць дачыненьне да так званай украінскай камандыроўкі паўночнаморцаў ўлетку-ўвосень 2014 году. Менавіта гэтыя фота дапамаглі нам выйсьці на сьлед падразьдзяленьня радыёэлектроннае барацьбы (РЭБ) гэтае брыгады і ідэнтыфікаваць трох кантрактнікаў і аднаго афіцэра. У профілях выяўленых паўночнаморцаў знойдзеныя шмат фота, якія сьведчаць пра іхны ўдзел у вайне супроць Украіны, у тым ліку што да выкарыстаньня сучаснай расейскай станцыі перашкодаў Р-330Ж «Житель» (рас.) комплексу РЭБ, якія мы неаднаразова фіксавалі на Данбасе.
1. Дзьмітры Мартынюк
У сацсетках: “VK” №1 (архівы профілю, фотаальбому, кантактаў), №2 (архіў профілю), неактыўны з 2013 году; “ОК” (архівы профілю, фотаальбому, кантактаў).
Некалькі фатаздымкаў, зробленыя падчас “украінскай камандыроўкі”, былі выкладзеныя ў профіль “VK” Мартынюка ў 2016 годзе. Сярод гэтых фатаздымкаў варта вылучыць фота з расейскімі вайскоўцамі на тле сродкаў РЭБ, зробленыя, меркавана, на акупаванай частцы Данбаса. У іх зафіксаваныя расейскія вайскоўцы пазуюць з баявым рыштункам (экіпіваньне, банданы, джгуты на прыкладах аўтаматаў) і белымі нарукаўнымі павязкамі (ідэнтыфікатары расейскіх агрэсараў). Пра тое, што гэтыя фатаздымкі зробленыя падчас актыўнае фазы баявых дзеяньняў напрыканцы лета – пачатку восені 2014 году, сьведчаць фатаздымкі зь іншага профілю Мартынюка ў сацсетцы “ОК”, у тым ліку тыя ж фота зь белымі павязкамі, якія былі выкладзеныя напачатку верасьня 2014 году. Крыху раней, у ліпені, Мартынюк выклаў у фотаальбоме здымкі, зробленыя ля стэлы ў горадзе Данецк Растоўскае вобласьці, а таксама здымак комплексу РЭБ падчас баявой варты з камэнтаром: «Гуково» (рас.). Гэтыя населеныя пункты месьцяцца ля самай мяжы з Украінаю.
Пасьля вывучэньня й аналізу акаўнтаў Мартынюка, у выніку чаго былі атрыманыя грунтоўныя доказы ягонае «растоўска-ўкраінскае камандзіроўкі» 2014 году, зьвернем увагу на ягоных таварышаў у службе – іншых вайскоўцаў падразьдзяленьня РЭБ, ідэнтыфікаваных з дапамогаю іхных супольных фота:
2 . Сяргей Мухлаеў
У сацсетках: “VK” (архівы профілю, фотаальбому, кантактаў), “ОК” №1 (архівы профілю, фотаальбому, кантактаў), №2 (архівы профілю, фотаальбому, кантактаў); акаўнт неактыўны з кастрычніка 2016 году, №3 (архівы профілю, фотаальбому, кантактаў), акаўнт неактыўны з чэрвеня 2014 году.
Сярод сваякоў Мухлаева сьлед вылучыць ягоную сястру Марыну Каўфман (архівы профілю, фотаальбому, кантактаў), якая жыве ў варожых для РФ Злучаных Штатах Амэрыкі, пра што сьведчаць ейныя профільныя дадзеныя, а таксама камэнтары да фота й запісы іхнага бацькі Уладзімера Мухлаева.
Сярод асабістых фота Мухлаева ёсьць здымкі з узнагародамі (1 і 2), выкладзеныя ў 2016 годзе. Ня цяжка здагадацца, што мэдальлю МА РФ «За вайсковую доблесьць II ступені» яго ўзнагародзілі за ўдзел у «растоўскай-ўкраінскай камандыроўцы» 2014 году.
Але найбольш характэрнымі зьяўляюцца фатаздымкі з фіксацыяй капітана Мухлаева ў фотаальбоме пазначанага вышэй сяржанта Мартынюка, у тым ліку ў памежным з Украінаю Гукаве Растоўскае вобласьці й непасрэдна на тэрыторыі Данбаса.
3 . Павал Ярмолін
У сацсетках: “VK” (архівы профілю, фотаальбому, кантактаў), фатаздымкі Ярмоліна ў фотаальбоме ў акаўнце ягонай маці Натальлі Ярмолінай-Каханоўскай у “ОК”.
4 . Іван Качэгараў
Нагадваем, што ў траўні 2017 году InformNapalm ідэнтыфікаваў вайскоўцаў РЭБ 19-й АМСБр (в/ч 20634, дысьлякацыя: г. Уладзікаўказ, Паўночная Асэтыя, ПВА РФ), якія ўлетку-увосень 2014 году ў складзе батальённа-тактычнай групы (БТГр) былі перакінутыя да ўкраінскай мяжы для забесьпячэньня ўварваньня расейскае арміі.
200-я АМСБр у публікацыях InformNapalm:
- 200-я асобная мотастралковая брыгада асаблівага прызначэньня Паўночнага флёту ВМФ РФ ва Украіне
- Баявы шлях 200-й АМСБр асаблівага прызначэньня Паўночнага флёту ВМФ РФ. Растоўская вобласьць і Украіна. Частка першая «Рэактыўнікі»
- Баявы шлях 200-й АМСБр асаблівага прызначэньня Паўночнага флёту ВМФ РФ. Растоўская вобласць і Украіна. Частка другая «Табар»
- Апазнаныя паўночнаморцы, якія ваявалі на Данбасе
Матар’ял да публікацыі падрыхтаваў Іраклі Камахідзэ адмыслова для сайту InformNapalm. Графіка Alex Alexidze.
Пераклаў на беларускую мову Дзяніс Івашын.
Падчас выкарыстаньня інфармацыі актыўная спасылка на крыніцу абавязковая.
(Creative Commons — Attribution 4.0 International — CC BY 4.0 )
Рабіце рэпост і дзяліцеся зь сябрамі.
Падпісвайцеся на старонкі супольнасьці InformNapalm у Фэйсбук / Твітэр / Telegram
і апэратыўна атрымлівайце інфармацыю пра новыя матар’ялы.