У сваім зводзе пра сытуацыю ў раёне зьдзяйсьненьня АТА з 11 жніўня 2016 г. Галоўнае ўпраўленьне выведкі (ГУВ) Міністэрства абароны Украіны паведаміла пра тое, што зафіксаванае прыбыцьцё ў акупаваны Данецк новай партыі расейскіх вайскоўцаў. Паведамляецца, што для зьдзяйсьненьня ратацыі выведвальных падразьдзяленьняў прыбылі вайскоўцы з складу батальёнай тактычнай групы 331-га гвардзейскага парашутна-дэсантнага палку (пункт сталай дысьлякацыі – г.Кастрама) 98-й дывізыі ПДВ ЗС РФ. Паводле паведамленьня ГУВ расейскія вайскоўцы выконваюць задачы на напрамках населеных пунктаў: Аўдзееўка, Мар’інка і Краснагораўка.
OSINT-экспэрты InformNapalm зьдзяйсьняюць праверку й пошук фактаў, якія пацьверджваюць гэтую інфармацыю.
Варта зазначыць, што расейскія вайскоўцы 331-га гвардзейскага парашутна-дэсантнага палку раней ужо былі зафіксаваныя на Данбасе.
Гэтак, падчас зьдзяйсьненьня расьледаваньня InformNapalm у сакавіку 2015 году адзін з дэсантнікаў 331-га парашутна-дэсантнага палку 98-й паветрана-дэсантнай дывізыі (в/ч 71211, Кастрама) Артур Уханаў (профіль, архіў профілю, архіў фотаальбому) быў зафіксаваны ў Станічна-Луганскім раёне Украіны.
Чытайце таксама: «Расейскі дэсантнік 331-га ПДП 98-й ПДД пазуе ў Станічна-Луганскім раёне Украіны»
Пазьней ён таксама замацаваў на сваёй сьцяне ў акаўнце сацсеціва “VK” запіс з тэкстам (цытуем): «28.06.2015 во время боевых действий в районе Станицы–Луганской погиб мой боевой товарищ и просто друг. Витя, вечная память. Пусть земля тебе будет пухом».
Таксама варта ўзгадаць гісторыю пра 10 палонных расейскіх дэсантнікаў з таго ж 331-га палку 98-й дывізыі ПДВ, якія «заблукалі» у жніўні 2014 году. Украінскія сілавікі затрымалі іх ля населенага пункту Зеркальны Амвросіеўскага раёну Данецкае вобласьці.
Такім чынам, інфармацыя пра ратацыю БТГр з складу 331-га палку 98-й дывізыі ПДВ ЗС РФ і прысутнасць ейных вайскоўцаў на тэрыторыі акупаванае часткі Украіны цалкам можа прэтэндаваць на дакладнасьць выведдадзеных.
Рэкамендуем нашым чытачам спраўджваць факты прысутнасьці й фіксацыі вайскоўцаў расейскіх вайсковых частак і падразьдзяленьняў паводле базы дадзеных расьледаваньняў валянтэраў-выведнікаў InformNapalm.
Сталая спасылка на базу дадзеных: bit.ly/RussianPresence (даступныя таксама разнастайныя моўныя пераклады расьледаваньняў).
На беларускую мову пераклаў Дзяніс Івашын.
Заклікаем чытачоў актыўна пашыраць нашыя публікацыі ў сацыяльных сетках, на форумах і СМІ. Наданьне матар’ялам расьледаваньняў шырокае агалоскі здатнае зьмяніць хаду інфармацыйнага і баявога супрацьстаяньня з Крамлём.