InformNapalm.org (Беларуская)

Ордэн Мужнасьці як кампэнсацыя за маўчаньне сям’і забітага на Данбасе «героя» Расеі.

У той час, як расейцы таемна хаваюць сваіх чарговых «герояў вайны, на якой іх не было», а сваякі атрымліваюць кампэнсацыю за свае маўчаньне, ёсьць тыя, хто ўсё ж шануе памяць пра іх. InformNapalm таксама не застаўся ў баку – нашая міжнародная выведвальная супольнасць здабыла інфармацыю пра расейскага кантрактніка, зьнішчанага ва Украіне ў жніўні 2014 году.

Яшчэ на пачатковай фазе расейскага ўварваньня ва Украіну, у жніўні 2014 году, сталася вядома пра гібель вайскоўца 17-й асобнай мотастралковай брыгады (да нядаўняга часу – в/ч 65384, зараз – в/ч 71718; брыгада перафармоўваецца ў 70-ы полк у складзе новай 42-й дывізіі; н/п Шалі, Чачэнія), кантрактніка з Башкірыі Марсэля Араптанава. Тады гэтая навіна (сюжэты тэлеканалаў «Дождь» і fn24.ru) выклікала вялікі рэзананс, у тым ліку і ў самой Расеі. Тым больш, што ў той час адпаведныя службы РФ, што займаюцца цэнзурай, яшчэ былі разгубленыя і не заўжды кантралявалі ўцечку інфармацыі, датычную страты сваіх вайскоўцаў на Данбасе. Гэтую навіну не прапусьцілі і валянтэры InformNapalm, якія адшукалі старонку зьнішчанага кантрактніка і «ветэрана» яшчэ расейскага ўварваньня ў Грузію ў жніўні 2008 году ў сацыяльных сетках (профіль ужо выдалены). Іншай прычынаю, зь якой факт гібелі М. Араптанава стаўся рэзанансным, стаўся адкрыты анты-крамлёўскі пост ягонай сястры Дзінары – фота з сьледам «украінскага чаравіка» на выяве У. Пуціна.

 

Заўвага. Імя Марсэля Араптанава фігуравала потым і ў іншых матар’ялах нашае супольнасці, у тым ліку ў публікацыі з 9 верасьня 2014 году пра сьведчаньні знаходжаньня вайскоўцаў 17-й АМСБр ва Украіне, і ў публікацыі з 6 лютага 2015 году, у якой пададзеная выява помніку вайскоўцам гэтае брыгады, зьнішчаных ва Украіне ў жніўні 2014 году.

Мінулі два з паловаю гады з дня гібелі Марсэля Араптанава 12 жніўня 2014 году, якога таемна, без афіцыйнае пашаны пахавалі ў дзень ягонага нараджэньня 22 жніўня 2014 году ў роднай вёсцы Новатаймасава (Башкірыя). Яшчэ тады, па гарачых сьлядох, расейская прапаганда пасьпела перакруціць факт гібелі расейскага жаўнера на адкрытую дэзынфармацыю, у якой вялося пра ягонае забойства нібы на расейскай тэрыторыі праз абстрэл з «Градаў» з боку Украіны. Гэта было агучанае ў згаданым вышэй сюжэце fn24.ru. З тых часоў мала хто ўзгадвае Марсэля, у тым ліку і ягоная сястра, рыторыка якой у 2015 годзе ўжо была іншаю, ну а з часам ейная актыўнасьць у сацсетках наагул спынілася. Цалкам мажліва, гэта вынік «выхаваўчай працы» ФСБ і «бонусаў», якія сям’я атрымала ў якасьці кампэнсацыі за маўчаньне.

Але, мабыць, у Марсэля Араптанава ўсё ж былі верныя сябры. Гэтак, адзін зь іх, ягоны зямляк, нейкі Муслім Ісмаілаў 8 лютага 2017 году на старонцы групы «17<<ОМСБР>> Чеченская республика н.п Шали» (рас.) у сацсеціве «VK» апублікаваў пост, прысьвечаны Марсэлю, які набраў усяго дзясятак лайкаў і ня мае аніводнага камэнтару.

Гэты пост цікавы праз тое, што ў ім пададзены фатаздымак ордэна і ўзнагароднага пасьведчаньня Марсэля Араптанава да ордэну Мужнасьці пасьмяротна №70822, выдадзенага паводле ўказу прэзыдэнта РФ У. Пуціна з 24 лістапада 2014 году (факт пасьмяротнага ўзнагароджаньня М. Араптанава не фіксаваўся).

Заўвага: Ордэн Мужнасьці – дзяржаўная ўзнагарода РФ. Узнагароджваюць грамадзянаў, якія праявілі самаадданасьць, мужнасьць і адвагу падчас аховы грамадзкага парадку, барацьбы з злачыннасьцю, падчас выратаваньня людзей у часе стыхійных ліхаў, пажараў, катастрофаў і іншых надзвычайных абставінаў, а таксама за сьмелыя і рашучыя дзеяньні, учыненыя падчас выкананьня вайсковага, грамадзянскага або службовага абавязку ва ўмовах, спалучаных з рызыкаю для жыцьця.

Пасьмяротнае ўзнагароджаньне расейскага кантрактніка, «загінулага праз выпадковы знарад, які прыляцеў з Украіны» – нонсэнс і ня мае дачыненьня да пунктаў уставы да ордэну. Вынікае, што Крэмль і МА РФ ўсё ж прызналі тое, што Марсэль Араптанаў быў забіты ва Украіне падчас баявых дзеяньняў. І ўсё гэта дзеля маўчаньня ягоных сваякоў. Цалкам мажліва, ордэн – не адзіны бонус сям’і М. Араптанава, пэўна, і помнік на ягонай магіле аплочаны расейскай казною.

Нагадваем, што 17-я АМСБр фігуруе ў 15 эпізодах расьледаваньняў InformNapalm, збольшага гэта публікацыі, зьвязаныя з фактамі ўварваньня й удзелу ў баёх на Данбасе ўлетку – ўвосень 2014 году. Маюцца таксама дадзеныя і пра пазьнейшы ўдзел кантрактнікаў гэтае брыгады ў вайне на Данбасе (больш падрабязна ў спойлеры ніжэй).

Базы дадзеных кадравых расейскіх вайскоўцаў і доказаў іхнага ўдзелу ў баявых дзеяньнях ва Украіне на баку расейска-тэрарыстычных сілаў, у тым ліку датычныя фактаў узнагароджаньня (патаўраваныя «ордэнам Мужнасьці» яшчэ два вайскоўцы 17-й АМСБр), даступныя праз сталую спасылку.

Матар’ял да публікацыі на падставе ўласнага OSINT / HUMINT– расьледаваньня міжнароднае выведвальнае супольнасці InformNapalm падрыхтаваў Іраклі Камахідзэ.

Пераклаў на беларускую мову Дзяніс Івашын.

(CC BY 4.0) Інфармацыя падрыхтаваная адмыслова для сайту InformNapalm.org, падчас поўнага або частковага перадруку й выкарыстаньня матар’ялу наўпроставая спасылка на аўтара і наш праэкт абавязковая.

Падпісвайцеся на старонкі супольнасьці InformNapalm у Фэйсбук / Твітэр і апэратыўна атрымлівайце інфармацыю пра новыя матар’ялы.

Заклікаем чытачоў актыўна пашыраць нашыя публікацыі ў сацыяльных сетках, на форумах і СМІ. Наданьне матар’ялам расьледаваньняў шырокае агалоскі здатнае зьмяніць хаду інфармацыйнага і баявога супрацьстаяньня з Крамлём.

«Цемру адолее полымя / Ignis vincit tenebris» – крэда InformNapalm.

Exit mobile version