18 жніўня 2016 г. Памежная служба Украіны апублікавала фатаздымак і невялікае апісаньне радыётэхнічнага комплексу, разгорнутага Збройнымі сіламі РФ насупраць памежных украінскіх падразьдзяленьняў у Харкаўскае вобласьці, на адлегласьці ля 2,5 км ад дзяржаўнае мяжы з Украінай. Пры гэтым памежная служба не падае поўную інфармацыю пра тып комплексу, а таксама ягоную прыналежнасьць. Паведамляецца, што мабільныя пасты радыётэхнічнае выведкі, пеленгаваньня й радыётэхнічнае барацьбы зьявіліся тут напачатку жніўня – у той жа час, калі на тэрыторыі часова акупаванага Крыма адбыліся сумнавядомыя правакацыі.
На падставе гэтых агульных дадзеных OSINT-група міжнароднае супольнасьці InformNapalm зьдзейсьніла «глыбокую выведку», у выніку якой атрымала дадатковую інфармацыю. Мы ідэнтыфікавалі: 1) дакладнае мейсца знаходжаньня гэтых сыстэмаў; 2) іхны тып; 3) прыналежнасьць да канкрэтнай вайсковай часткі ЗС РФ.
- Дакладнае мейсца базаваньня групы радыётэхнічных сродкаў насамрэч знаходзіцца ў памежнай з Харкаўскай вобласьцю зоне. Здымак, зроблены лятаком «Дайманд», і тыя, якія выявілі мы, сьведчаць пра прысады непадалёк пасёлку Мурам Шэбекінскага раёну Белгарадзкай вобласьці – каардынаты 292952; 36.740148. Пацьверджваюць здагадку контуры выгібу палявой дарогі і прысадаў, у якіх знаходзяцца комплексы.
- Ідэнтыфікацыя сродкаў радыётэхнічнай выведкі (РТВ) была досыць складанаю праз тое, што гэта адная з найноўшых расейскіх распрацовак, якая толькі нядаўна паступіла ва ўзбраеньне. Вызначанае, што гэта станцыя радыёэлектроннай выведкі (РЭВ) «Сынтэз» з наступнымі тактыка-тэхнічнымі характарыстыкамі: «Мабільная аўтаматызаваная станцыя радыётэхнічнай выведкі паветраных, наземных, надводных аб’ектаў «Сынтэз». Прызначаная для пошуку, выяўленьня, вымярэньня парамэтраў усіх сыгналаў ў дыяпазоне хваляў 0,1-40 ГГц, у тым ліку сыгналаў ад сродкаў сувязі, якія маюць рознае прызначэньне. Вымярэньне пеленгу для вызначэньня крыніцаў радыёвыпраменьваньня, вызначэньне тыпу, адзінкі сучасных, пэрспэктыўных наземных, надводных, паветраных аб’ектаў выведкі з імпульснымі, безупыннымі відамі радыёвыпраменьваньня з рознай частотна-часавай структурай. Далёкасьць кантролю – да 450 км. Колькасьць адначасова кантраляваных цэляў – да 200».
Як было зазначанае вышэй, інфармацыя пра гэтую станцыю ў адкрытым доступе практычна адсутнічае, за выключэннем хіба што асобных фатаздымкаў на спэцыялізаваных форумах з 2012 году. У прыватнасьці, гэта фатаздымкі з пасёлку Прымор’е Калінінградзкай вобласьці РФ (архіў 1, архіў 2).
Апроч гэтага, фота станцыі было апублікаванае ў сьнежні 2013 году ў адным з папулярных расейскіх блёгаў, прысьвечаных вайсковай тэматыцы. У блёгу пададзенае фота гэтай станцыі, зробленае ў ваколіцах Сочы. Характэрна тое, што расейскія экспэрты не змаглі ідэнтыфікаваць гэтую станцыю, пазначалі яе аналягам украінскае «Кальчугі» і іншымі сродкамі радыёэлектроннай выведкі.
Фота ў пас. Прымор’е Калінінградзкай вобласьці
Фота ў пас. Прымор’е Калінінградзкай вобласьці
Фота з форуму, 2013 год
- Прыналежнасьць сродкаў выведкі. Мы вызначылі, што ідэнтыфікаваныя за 2,5 км ад украінскае мяжы радыётэхнічныя комплексы належаць падразьдзяленьню 82-й асобнай радыётэхнічнай брыгады асаблівага прызначэньня (в/ч 48886, г. Вязьма Смаленскае вобласьці). Вядома, што адное з падразьдзяленьняў (в/ч 48886-Н) гэтае брыгады дысьлякуецца ў пасёлку Прымор’е Калінінградзкай вобласьці РФ. Пададзеныя вышэй фатаздымкі станцыяў з форумаў з 2012 году былі зроблены менавіта там.
Ну а фатаздымкі тых жа комплексаў, што і ў паведамленьні Дзяржаўнай памежнай службы Украіны, былі выяўленыя дзякуючы «чальцу ўкраінскае ДВГ» – вайскоўцу асназу зь Вязьмы Аляксею Кабанаву (профіль, фотаальбом), які і надаў магчымасьць ідэнтыфікаваць сродкі выведкі.
Тэхніка была вызначаная паводле фатаздымкаў, выкладзеных увесну-ўлетку 2016 году.
Нагадваем, што вайскоўцы 82-й АРТБр ужо пасьпелі пакінуць сьляды на Данбасе ў 2014 годзе, пра што вядзецца ў адным з расьледаваньняў InformNapalm. Таксама ўвесну 2015 году ў Валуйскім раёне Белгарадзкай вобласьці ля самай мяжы з Украінай мы выявілі падразьдзяленьне радыётэхнічнай выведкі з складу 146-й радыётэхнічнай брыгады (в/ч 75752, Бугры, Ленінградзкая вобл.), якое знаходзілася там у так званай баявой варце.
Згодна з вышэйпададзеным і з улікам падзеяў апошніх дзён, можна канстатаваць, што Расея задумала вялікую гульню стратэгічнага характару. Вышкалы ЗС РФ ахопліваюць ня толькі акупаваны Крым і Данбас, але і ў сумежныя з Украінаю раёны Расеі, дзе разгортваецца новая магутная інфраструктура. Усё гэта адбываецца напярэдадні вышкалаў «Каўказ-2016», пад прыкрыцьцём якіх сьлед чакаць розных сюрпрызаў, як гэта было, напрыклад, падчас уварваньня ў Грузію – напрыканцы вышкалаў «Каўказ-2008».
Матар’ял да публікацыі падрыхтаваны на падставе ўласнага OSINT-расьледавання міжнароднае супольнасьці InformNapalm.
Пераклаў на беларускую мову Дзяніс Івашын.
Заклікаем чытачоў актыўна пашыраць нашыя публікацыі ў сацыяльных сетках, на форумах і СМІ. Наданьне матар’ялам расьледаваньняў шырокае агалоскі здатнае зьмяніць хаду інфармацыйнага і баявога супрацьстаяньня з Крамлём.