Украіна мае зрабіць так, каб для ўсяго сьвету любыя кантакты з Крымам былі непажаданымі. Такое меркаванне выказаў украінскі дыплямат Багдан Ярэменка у сваім інтэрвію для “Апостраф”.
Усьлед за французскімі дэпутатамі пра магчымы візыт ў анэксаваны Крым пачалі казаць і нямецкія парлямэнтары. Нягледзячы на тое, што адныя зь іх ужо адмовіліся ад словаў пра намер наведаць паўвыспу, напружаньне вакол акупаванай праз Расею тэрыторыю ўзрастае.
Відавочна, Крэмль, праз усьведамленьне бясслаўнага канца сваёй “украінскай авантуры” і неабходнасьці паскоранымі тэмпамі пакінуць Данбас, шукае магчымасьць абмяняць выхад з Украіны і завяршэньне “гарачай” фазы канфлікту на міжнароднае прызнаньне анэксыі Крыму. Дзеля гэтага інтэнсіфікавалася праца ў імітацыі таго, што “ў Крыму ўсё добра”.
“Карысныя ідыёты” Крамля з ліку палітыкаў з розных краінаў будуць гуляць і ўжо гуляюць важную ролю ў гэтым працэсе. Украіна мае скарыстацца гэтай актыўнасьцю Масквы для таго, каб паказаць усяму сьвету, што любыя кантакты з Крымам зьяўляюцца непажаданымі.
Для гэтага неабходна падчас выяўленьня кожнага выпадку ваяжоў замежных палітыкаў у Крым без узгадненьня з Украінай арганізоўваць інфармацыйныя кампаніі з асьвятленьнем і засуджэньнем падобных візытаў.
Ноты пратэсту, заявы, папярэджаньні, забароны на ўезд на тэрыторыю нашай дзяржавы і адкрыцьцё крымінальных справаў з наступным магчымым выкарыстаньнем міжнародных мэханізмаў прававой дапамогі для перасьледу падазраваных – такімі маюць быць дзеяньні Украіны ў адказ.
Набор захадаў узьдзеяньня зьяўляецца стандартным. МЗС мае пазбавіцца ад залішніх умоўнасьцяў і “далікатнасьці”. Калі пасля ўсіх папярэджаньняў замежныя палітыкі, усё ж, едуць у Крым, гэта мае стаць падставай для звароту ня толькі ў СБУ з прапановай забараніць ім ўезд ва Украіну, але і для паведамленьня пра злачынства, ськіраванага ў ГПУ.
Разам з тым, у выпадках узгадненьня паездак у Крым з Украінай, неабходна кожнага разу арганізоўваць для замежных дэлегацыяў брыфінгі і дэбрыфінгі. Да працы ў тлумачэньні абставінаў сытуацыі ў Крыме, падрыхтоўкі візытэраў і т.д. варта прыцягваць няўрадавыя арганізацыі і цэнтры, адмыслоўцы якіх зьдзяйсьняюць сыстэмную работу ў вывучэньні сытуацыі ў Крыму.
А да пераліку памылак МЗС Украіны варта аднесьці той факт, што з траўня 2014 году ўкраінская дыпляматыя “забыла” праводзіць перамовы пра Крым праз згоду на навязаны Расеяй падыход абмяркоўваць выключна сытуацыю на Данбасе.
(c) Падчас перадруку й выкарыстаньня матар’ялу спасылка на наш праэкт абавязковая.
Пераклад Дзяніса Івашына