Вайсковец 175-й брыгады кіраваньня Паўднёвае вайсковае акругі на тле комплексу СПР-2М «Ртуць-БМ»
Адным з напрамкаў дзейнасьці InformNapalm зьяўляецца выяўленьне й ідэнтыфікацыя спэцсродкаў – комплексаў сувязі, электроннай выведкі й радыёэлектроннай барацьбы, якія выкарыстоўваюць Збройныя Сілы РФ на Данбасе. За два з паловай гады дзейнасьці супольнасьць валянтэраў выявіла шэраг комплексаў, у тым ліку найноўшых, якія маюцца ва ўзбраеньні выключна расейскай арміі. У гэтай публікацыі вядзецца ня толькі пра выяўленую машыну радыёэлектроннай барацьбы «Ртуць-БМ», але й пра расейскіх вайскоўцаў – аматараў сэлфі – якія “засьвяцілі” ня толькі сваю злачынную «ўкраінскую камандыроўку», але й вышэйпазначаны спэцсродак.
Ідэнтыфікаваныя намі асобы зьяўляюцца вайскоўцамі 175-й брыгады кіраваньня Паўднёвае вайсковае акругі ЗС РФ (175-я БрСіК, або в/ч 01957) зь мейсцам дысьлякацыі ў горадзе Аксай Растоўскае вобласьці РФ. Вайсковая частка мае падразьдзяленьні кіраваньня й сувязі, а таксама некалькі так званых пасёлкаў-дывізыёнаў.
Задачаю 175-й брыгады ёсьць забесьпячэньне сувязі камандаваньня з штабам Паўднёвае вайсковае акругі й функцыянаваньня разнастайных сыстэмаў кіраваньня – ад стацыянарных да перасоўных.
Частка мае найноўшыя спадарожнікавыя спэцсродкі. Асабовы склад актыўна ўдзельнічае ў вывучэньні найноўшай тэхнікі й баявой падрыхтоўцы, прымаў удзел у шырокамаштабных вышкалах «Каўказ-2016». Пяройдзем да фігурантаў – расейскіх вайсковых злачынцаў.
- Карташов Дзьмітры, нарадзіўся 20.05.1993 г. – расейскі вайсковец кантрактнай службы з складу 175-й брыгады кіраваньня Паўднёвае вайсковае акругі. Зафіксаваны ва Украіне.
Фатаздымак зафіксаваў футбольныя брамкі на поле, якое знаходзіцца цераз дарогу ад в/ч 01957. Мейсца пазначанае на мапе.
Адразу ж падаем фота, у якім зафіксаваныя расейскія вайскоўцы на тле комплексаў РЭБ. Абрысы кабіны характэрныя для ўсіх комплексаў РЭБ РБ-341В «Леер-3». Здымкі гэтай тэхнікі нескладана знайсьці ў Сеціве: яна была зафіксаваная ў Сірыі і шматкроць – на акупаваным Данбасе.
У фота: Дзьмітры Карташоў (леваруч) і Раман Рошка (праваруч)
- Рошка Раман (у сацсетках «Раман Раманенка») – расейскі вайсковец кантрактнае службы з складу 175-й брыгады кіраваньня Паўднёвае вайсковае акругі. Нарадзіўся 11.06.1995 г. Як мінімум, зафіксаваны на мяжы з Украінай.
У фота: Іван Рэмізаў (леваруч) і Раман Рошка (праваруч)
- Рэмізаў Іван – вайсковец выведвальнага падразьдзяленьня 18-й АМСБр (в/ч 27777, мейсца дысьлякацыі – Чачэнія, Ханкала і Калінаўская) 58-й агульнавайсковай арміі Паўднёвае вайсковае акругі ЗС РФ. Нарадзіўся ў 1975 г., родам з Валгаграда. У красавіку 2016 году праз настальгію што да «украінскае камандыроўкі» выклаў некалькі фатаздымкаў. Больш падрабязна пра яго ў матар’яле з 5 чэрвеня 2016 года.
Вернемся да Дзьмітрыя Карташова, які ня здужаў спакусу і зрабіў сэлфі на тле расейскай спэцтэхнікі, што знаходзіцца на акупаванай частцы Данбаса, хаця пры гэтым баязьліва схаваў свой твар пад балаклавай.
Два фота для апазнаньня асобы расейскага вайсковага злачынца:
Расейскі вайсковец 175-й брыгады кіраваньня Паўднёвае вайсковае акругі на тле комплексу СПР-2М «Ртуць-БМ» на ўкраінскай зямлі
Заўвага: СПР-2М «Ртуць-БМ» – сучасная станцыя, сродак радыёэлектроннай барацьбы, прызначаная для зьніжэньня ўзьдзеяньня паражных элэментаў артылерыйскіх знарадаў на свае войскі й бронетэхніку праз уплыў на рэжым працы радыёўзрывальніку. СПР-2 здольная зрабіць падрыў знараду на бясьпечнай вышыні або перавесці рэжым працы радыёўзрывальніку ў кантактны. Галоўным чынам выкарыстоўваецца ў войсках першага эшалёну, камандных пунктах, мейсцах скопішча войскаў і пускавых прыладаў. Таксама «Ртуць-БМ» можа выкарыстоўвацца для прыкрыцьця рухомых аб’ектаў у мейсцах пераправаў. Больш падрабязна пра першы выпадак фіксацыі комплексу «Ртуць-БМ» на Данбасе ў матар’яле з 17 жніўня 2016 году.
Згодна з аналізам мясцовасці (выказваем падзяку за геалякацыю карыстачу @5urpher) здымак зроблены ў раёне кар’ераў ля вёскі Елізаветаўка Антрацытаўскага раёну – акупаванай Расеяй часткі Луганскае вобласьці Украіны.
Матар’ял падрыхтавалі Відаль Сорокін & Victory Krm.
Пераклаў на беларускую мову Дзяніс Івашын.
Заклікаем чытачоў актыўна пашыраць нашыя публікацыі ў сацыяльных сетках, на форумах і СМІ. Наданьне матар’ялам расьледаваньняў шырокае агалоскі здатнае зьмяніць хаду інфармацыйнага і баявога супрацьстаяньня з Крамлём.