Украінскія хакеры ўзламалі расейскі “Первый канал”

Валянтэры міжнароднае супольнасьці InformNapalm атрымалі эксклюзыўныя правы ад украінскага кібэральянсу FalconsFlame, Trinity і Рух8 для публікацыі дэталяў узлому карпаратыўнага парталу расейскае дзяржаўнае тэлевізыі “Первый канал” (рас.).

Паводле словаў удзельнікаў кібэральянсу, апэрацыя ўзлому зьвёнаў машыны расейскай прапаганды рэалізаваная ў межах праэкту, галоўная задача якога – прымусіць Расею дэакупаваць Данбас і Крым і выканаць абавязкі, прадугледжаныя Менскімі пагадненьнямі. Кібэратакі скіраваныя выключна на тыя элемэнты расейскай прапаганды, празь якія адбываецца утойваньне інфармацыі, датычнай вайсковых злачынстваў РФ на тэрыторыі Украіны. Нагадваем, што гэтая апэрацыя пачалася 25 траўня 2016 г., а першыя ейныя вынікі зьявіліся 5 чэрвеня, і, паводле прадстаўнікоў альянсу, будзе доўжыцца да таго моманту, пакуль астатні расейскі вайсковец не сыдзе з украінскае зямлі. У выніку ўзлому былі апублікаваныя анкетныя дадзеныя ўсіх супрацоўнікаў тэлевізыі “Первый канал” (іх можна пагледзець ў гэтай спасылцы, або спампаваць архіў). Апроч гэтага, зьявілася магчымасьць узламаць асабістыя паштовыя скрыні й воблачныя сховішчы супрацоўнікаў, якія маюць непасрэднае дачыненьне да стварэньня й пашырэньня агрэсыўнай прапаганды што да Украіны і ейных грамадзянаў, паведамляюць хакеры.

Варта зазначыць, што на гэтым тыдні валянтэры-выведнікі InformNapalm апублікавалі расьледаваньне на падставе матар’ялаў, якія нам перадалі актывісты кібэральянсу: “Узлом прапагандыстаў РФ. Частка 1. Зенін: садзейнічаньне тэрарыстам, афшоры і адпачынак у Эўропе”, у якім была раскрытая інфармацыя пра карэспандэнта “Первый канал” Сяргея Зеніна. Як запэўніваюць хакеры, масыў дадзеных мае памер 116.4 Гб і праз слушны аналіз можа быць доказавай базай у міжнародных судох супраць РФ. Таксама прапануем пагледзець відэасьведчаньне ўзлому парталу.

P.S. Валянтэры супольнасьці InformNapalm ня маюць аніякага дачыненьня да хакерскіх узломаў. Гэтая публікацыя ўсяго толькі крыніца для інфармаваньня грамадзкасьці пра падзеі, якія адбываюцца ў кібэрпрасторы.

---

Матар’ял да публікацыі падрыхтавалі валянтэры міжнароднае супольнасьці InformNapalm на падставе інфармацыі, перададзенай кібэральянсам FalconsFlame, Trinity і Рух8.
(CC BY 4.0) Інфармацыя падрыхтаваная адмыслова для сайту InformNapalm.org, падчас поўнага або частковага перадруку й выкарыстаньня матар’ялу наўпроставая спасылка на аўтара і наш праэкт абавязковая.
Падзяліцеся публікацыяй у сацсеціве! Наданьне матар’ялам расьледаваньняў шырокае агалоскі здатнае зьмяніць хаду інфармацыйнага і баявога супрацьстаяньня з Крамлём.