Валянтэры міжнароднае супольнасьці InformNapalm выявілі чарговага расейскага ўзнагароджанага вайскоўца – прапаршчыка з падмаскоўнага зэнітна-ракетнага палку Саенку, які атрымаў мэдаль «За адвагу» у выніку «растоўска-ўкраінскай камандыроўкі» улетку-ўвосень 2014 году.
Падчас плянавага маніторынгу сацсетак у раёне Кузьмінскага палігону Растоўскае вобласьці быў выяўлены фатаздымак нейкага Мікалая Саенкі, выкладзены 15 студзеня 2016 году. Фатаздымак мае геатэг, у якім пазначы хутар Чкалава (Мясьнікоўскі раён Растоўскае вобласьці), дзе, пачынаючы з 2014 году, разгорнуты адзін з палявых лягероў расейскай групоўкі войскаў, ськіраванай на Данбас.
Першасныя дадзеныя: Мікалай Саенка 10.10.1989 г.н., родам з г. Фралова Валгаградзкай вобласьці. З 2011 году служыць паводле кантракту ў вайсковай частцы 61996 (606-ы гвардзейскі зэнітна-ракетны полк, г. Электрасталь Маскоўскае вобласьці), пасада – камандыр узвода эвакуацыі і захоўваньня запасных частак, інструмэнтаў і прыладаў групавых (ЗІП-Г), званьне – прапаршчык. У сацсеціве «VK» – профіль, фотаальбом, кантакты. У сацсеціве «ОК» – профіль, фотаальбом, кантакты.
У выніку дэталёвага вывучэньня старонак сацсетак фігуранту М.Саенкі былі выяўленыя шэраг цікавых дэталяў, у прыватнасьці:
У сацсеціве «VK»:
- фатаздымак з узнагародным пасьведчаньнем і мэдалём «За адвагу», выкладзены 11 красавіка 2015 году, зь віншавальнымі камэнтарамі і адказам фігуранту М.Саенкі (пакідаем у арыгінале): “да, та самая, долгожданная
Заўвага: З уставы мэдалю «За адвагу» – дзяржаўная ўзнагарода РФ, якой узнагароджваюць за мужнасьць і адвагу, праяўленыя ў баёх і падчас выкананьня спэцыяльных заданьняў у забесьпячэньні дзяржаўнае бясьпекі, падчас абароны канстытуцыйных правоў грамадзянаў ва ўмовах, спалучаных з рызыкай для жыцьця…
- таксама шэраг іншых фатаздымкаў М.Саенкі, якія сьведчаць пра ягоную прыналежнасьць да 606-га ЗРП, дысьлякаванага ў г.Электрасталь Маскоўскае вобласьці (1, 2, 3).
У сацсеціве «ОК»:
Найбольш цікавая фотападборка М.Саенкі з прыблізнай храналёгіяй падзеяў была выяўленая на ягонай старонцы ў «аднаклясьніках». У прыватнасьці, гэта сэрыя здымкаў, выкладзеных 18 верасьня 2014 году (у прамежку з 31 ліпеня па 28 верасьня), у якіх, паводле ўсіх азнакаў, зафіксаваныя асаблівасьці «растоўска-ўкраінскай камандыроўкі» улетку-ўвосень 2014 году.
- групавое фота на тле зэнітнага ракетна-гарматнага комплексу малога радыюсу дзеяньня 96К6 Панцыр-С1, у якім зафіксаваныя расейскія вайскоўцы, апранутыя не паводле статуту – хто ў чым і з стралковаю зброяй.
Заўвага: расейскі самаходны зэнітны ракетна-гарматны комплекс (ЗРГК) наземнага базаваньня. Прызначаны для блізкага прыкрыцьця грамадзянскіх і вайсковых аб’ектаў (у тым ліку комплексаў СПА вялікае далёкасьці тыпу «С-300») ад усіх сучасных сродкаў паветранага нападу. Узбраеньне – Зэнітная кіраваная ракета 57Э6-Е: Далёкасьць паражэньня: 1200-20000 м., Вышыня паражэньня: 10-15000 м .; Гармата 2 х 2А38М: Далёкасьць паражэньня: 200-4000 м., Вышыня паражэньня: 0-3000 м.
- фота пададзенага вышэй мэдалю й узнагароднага пасьведчаньня, выкладзенае 12 красавіка 2015 году, з шэрагам камэнтароў, у тым ліку ад фігуранту М.Саенкі (пакідаем у арыгінале): “За хорошее поведение…))) мы же вежливые люди)))”.
- шэраг іншых фатаздымкаў М.Саенкі, у якіх зафіксаваная ягоная «растоўска-ўкраінская камандыроўка» (1, 2, 3, 4).
- фатаздымак на тле транспартна-баявога гэлікоптэру Мі-8АМТШ з бартавым нумарам «18 сіні», які паводле дадзеных рэестру зьяўляецца машынай гэлікоптэрнага палку зь мейсцам базаваньня ў Растове-на-Доне на аэрадроме “Цэнтральны”.
InformNapalm зазначаў і раней, што шматлікія акупанты ўсё ж ня могуць вытрываць і выхваляюцца баявымі ўзнагародамі, якія яны атрыманымі “ў мірны час”, ну а мы абавязаны фіксаваць кожны падобны факт і выказваем свае здагадкі. Цяжка сказаць, за што атрымаў прапаршчык М.Саенка баявую ўзнагароду ў мірны час, але мяркуючы з храналёгіі фатаздымкаў (жнівень-верасень 2014 году) і з тыпу ўзбраеньня («Панцыр-С1»), гэтыя расейскія комплексы СПА цалкам маглі быць тымі сродкамі, з дапамогаю якіх у летне-восеньскі пэрыяд абвастрэньня канфлікту на Данбасе ў 2014 годзе былі зьбітыя ўкраінскія вайсковыя гэлікоптэры й лятакі. Магчыма, ня толькі ўкраінскія і ня толькі вайсковыя…
Нагадваем, што гэта ня першая фіксацыя расейскіх ЗРГК «Панцыр С1» у кантэксьце вайны на Данбасе, глядзіце тэматычныя спасылкі:
- «Нічыйныя» «Панцыры-С1» у расейскім Данецку, 2014-12-12
- Вайна ва Украіне. Цікавы лягер практычна на тэрыторыі Украіны, (“Панцыры”) 2015-01-25
- Каменск-Шахцінскі. Зафіксаваныя некалькі ЗРГК «Панцыр-С1», 2015-04-17
- «Панцыр С-1» і «Урал-43206» ва Украіне, 2015-09-14
Матар’ял да публікацыі падрыхтаваны на падставе ўласнага OSINT-расьледаваньня міжнароднай валянтэрскай групай InformNapalm. Аўтар расьледаваньня – Іраклі Камахідзэ.
На беларускую мову пераклаў Дзяніс Івашын.
(CC BY 4.0) Інфармацыя падрыхтаваная адмыслова для сайту InformNapalm.org, падчас поўнага або частковага перадруку й выкарыстаньня матар’ялу наўпроставая спасылка на аўтара і наш праэкт абавязковая.
Актыўны распаўсюд у сацсетках вітаецца!