2015 წლის თებერვალში, საქართველოს ოკუპირებულ ტერიტორიებზე აფხაზეთსა და სამაჩობლოში განთავსებულმა რუსეთის სამხედრო ქვედანაყოფებმა დაიწყეს მასშტაბური სამხედრო სწავლებები, რომლის უმთავრეს მიზანსაც, საქართველოს წინააღმდეგ სამხედრო მოქმედებების შესაძლო განახლებისთვის მომზადება წარმოადგენს. მე-7 და მე-4 სამხედრო ბაზების ქვედანაყოფები სწავლებებზე მნიშვნელოვან ყურადღებას უთმობენ უცნობ ადგილმდებარეობაზე საბრძოლო მოქმედებების წარმოებას და პრაქტიკულად სწავლობენ ყველა სახის შეიარაღების გამოყენებას.
აღსანიშნავია, რომ სწავლებებში ჩართულია სამხედრო ბაზების თითქმის ყველა ქვედანაყოფი, რაც ხაზს უსვამს მიმდინარე სამხედრო მოქმედებების მასშტაბურობას. საყურადღებოა, რომ ქვედანაყოფების მომზადებისას აფხაზეთში („წებელდა“ და „ნაგვალოუ“) და სამაჩაბლოში („ძარწემი“ და „ტონტობეთი“) მდებარე პოლიგონებზე გამართული სწავლებების ლეგენდა არის შეტევითი ხასიათის. გარდა ამისა, ოკუპირებულ ტერიტორიებზე იმართება სამეთაურო-საშტატო სწავლებები, რომლებშიც მონაწილეობენ 45-ე დეა 58-ე არმიის სხვა საჯარისო ელემენტები და ცალკეული ქვედანაყოფები.
საქართველოსთვის მუდმივი საფრთხის რეჟიმის შენარჩუნების მიზნით, მასშტაბური სამხედრო წვრთვნები მიმდინარეობს საქართველოს ჩრდილოეთ საზღვრის მთელს პერიმეტრზე. უკანასკნელ პერიოდში ინტესიური ხასიათი მიეცა რუსეთის შეიარაღებული ძალების სამხრეთ სამხედრო ოლქის საბძოლო მზადყოფნის მოულოდნელ შემოწმებებს. საყურადღებოა, რომ ოლქის სარდალი, გენერალ-პოლკოვნიკი ალექსანდრე გალკინი და ოლქის სხვა მაღალჩინოსნები უშუალოდ ხელმძღვანელობდნენ სწავლებებს. გარდა ამისა, ჩატარდა 58-ე და 49-ე არმიების ქვედანაყოფების მეთაურების შეკრებები, რომლებზეც შეისწავლეს ბრძოლის წარმოების ახალი მეთოდები, რომელთაც ასევე განსაკუთრებული ყურადება ეთმობათ ქვედანაყოფების სწავლებებზე.
პარალელურად, 2015 წლის იანვრის მეორე ნახევრიდან, ჩრდილოეთ ოსეთში, ყარაჩაი-ჩერქეზეთში, ყაბარდო-ბალყარეთსა და ადიღეში ინტენსიურად მიმდინარეობს სამხრეთ სამხედრო ოლქის სპეცდანიშნულების, მოტომსროლელი და სამთო ბრიგადების, მოტომსროლელი შენაერთების სადაზვერვო ქვედანაყოფების სწავლება, რომელზეც სამხედროები ითვისებენ სხვადასხვა სახის ბრძოლის ორგანიზების საკითხებს. საყურადღებოა, რომ განსაკუთრებული ყურადღება ეთმობოდა უჩვეულო და მოულოდნელი მოქმედებებით წარმატების მიღწევის მეთოდების ათვისებას.
ოკუპირებულ ტერიტორიებსა და საქართველოს ჩრდილოეთ საზღვრებთან მიმდინარე მასშტაბური სამხედრი წვრთვნებით რფ მიზნად ისახავს საკუთარი სამხედრო ძალის დემონსტრირებას და სამხრეთის სტრატეგიულ მიმართულებაზე (საქართველოზე) შესაძლო სამხედრო ოპერაციის ჩასატარებლად მომზადებას. გარდა ამისა, კრემლის ერთ-ერთ უმთავრეს ამოცანას წარმოადგენს საქართველოს მუდმივი შიშის რეჟიმში შენარჩუნება და სამხედრო აგრესიის განახლების შესაძლებლობის ღიად დატოვება, რითაც ცდილობს საფრთხე შეუქმნას საქართველოში პოლიტიკურ სტაბილურობას, სოციალურ-ეკონომიკურ განვითარებას და მის დასავლურ კურსს.
შენიშვნა: ჩანაწერთან წარმოდგენილი ფოტომასალა თემატურია, ასახავს მე-7, მე-4 ს/ბაზებზე ადრე გამართულ სწავლებებს.
არსებული სტატიის რუსული ვერსია იხ. მოცემულ ლინკზე “Крупномасштабные военные учения российских оккупантов в Абхазии и регионе Самачабло – Грузия”
ავტორი: ირაკლი კომახიძე
ინფორმაცია მომზადებულია სპეციალურად საიტისთვის InformNapalm, მასალის გამოყენებისას ავტორისა და ჩვენი საიტის მითითება აუცილებელია.
No Responses to “ოკუპანტების სამხედრო წვრთვნები აფხაზეთსა და სამაჩაბლოში”