Міжнародная валянтэрская група InformNapalm працягвае зьбіраць сьведчаньні ўдзелу падразьдзяленьняў Збройных Сілаў Расеі ў баявых дзеяньнях на Данбасе. У выніку чарговага OSINT-расьледаваньня здабытая новая інфармацыя адносна “растоўска-ўкраінскай камандыроўкі” 74-й асобнай матастралковай брыгады (в/ч 21005 41-й агульнавайсковай арміі – Цэнтральная вайсковая акруга, Юрга, Кемераўская вобласьць) улетку-увосень 2014 году, а таксама сьведчаньні таго, што асобныя вайскоўцы гэтага вайсковага злучэньня да гэтага часу знаходзяцца на акупаванай тэрыторыі Данбаса і ўваходзяць у незаконныя збройныя фармаваньні “наваросіі”.
Падчас вывучэньня і паглыбленага аналізу інфармацыі, прадстаўленай у групе В/ч 21005, Кемераўская вобласьць, г.Юрга сацыяльнага сеціва “УКантакце” знойдзены шэраг тэмаў з перапіскай родных і блізкіх з вайскоўцамі 4-й АМСБр што да падзеяў, зьвязаных з знаходжаньнем зводнага падразьдзяленьня гэтай вайсковай часткі ў паўднёвай камандыроўцы ўлетку-ўвосень 2014 году. Найбольшае ўвагі заслугоўвае тэма з назовам “Хто што ведае пра нашых у Растове? супакойце мяне. 4 дзень няма сувязі” (спасылка на архіў гэтай перапіскі), у якой з 30 жніўня па 2 кастрычніка 2014 году абмяркоўваліся дэталі што да ўдзелу юргінскай брыгады ў баявых дзеяньнях на Данбасе, у тым ліку ўдзел у баёх за Луганскі аэрапорт. Падаем некаторыя вытрымкі (перапіска прадстаўленая ў выглядзе скрыншотаў):
Сьвятлана Каваленка: “усё хрэнова там! сёньня знаёмай патэлефанаваў муж і паведаміў, што яны ўчора захоплівалі аэрапорт! іх пачалі абстрэльваць, ён паранены ляжыць у шпіталі, і кажа што вельмі шмат параненых”
Чаяна Мангуш: “Ёсьць параненыя, пра загінулых маўчаць”
Чаяна Мангуш: “Зь Юргі ніхто не загінуў, гэта дакладна кажа. Зараз ранак, сьпяць, тэлефоны галоўным здалі, атрымаюць – патэлефануюць”
Ксенія Ушкалава: “Ура! Муж патэлефанаваў! Сказаў – былі на вайне. Напрыканцы верасьня прыедуць дадому”
Тацьцяна Рэмэр: “А што-небудзь кажуць, будзе ці не яшчэ выкідваньне нашых на Украіну?”
Сьвятлана Каваленка адказала Тацьцяне Рэмэр: “Тацьцяна, мабыць не, нашыя перамаглі!”
Яшчэ ў адной тэме з назовам “Вось так жывуць нашыя героі))” выкладзены фатаздымак з камэнтарамі (спасылка на архіў). Мяркуючы з нестатутнага выгляду і белых ідэнтыфікацыйных павязак, фатаздымак адлюстроўвае адную з баявых вылазак 74-й АМСБр з Растоўскай вобласьці на ўкраінскі Данбас. На заднім тле можна разгледзець накрытую і замаскаваную баявую тэхніку.
Заўвага: некаторыя старонкі ўдзельнікаў прадстаўленай перапіскі выдаленыя, магчыма праз празьмерную балбатню і рэакцыю на гэта адпаведных ворганаў альбо праз тое, што жанчыны, якія камэнтуюць “нашыя перамаглі”, так і не дачакаліся на сваіх мужоў.
Нагадваем, што 74-я АМСБр зь Юргі неаднаразова згадвалася ў ранейшых расьледаваньнях InformNapalm. У пададзеных у лістападзе 2014 матар’ялах фігуравалі фатаздымкі з вайскоўцамі юргінскае брыгады з памежных з Украінаю палявых лягераў, скуль ажыцьцяўляліся маршы-набегі на Данбас, і копіі т.зв. падпісак “пра неразгалошваньне інфармацыі абмежаванага доступу ў зьвязку з выкананьнем спэцыяльных задачаў у забесьпячэньні бясьпекі РФ” вайскоўцаў в/ч 21005. Таксама зафіксаваныя верасьнёўскія фатаздымкі падбітага на Данбасе танка Т-72 74-й брыгады.
Паводле назіраньняў групы InformNapalm, напрацягу апошніх 6 месяцаў расейскае вайсковае камандаваньне перайшло да новай тактыкі выкарыстаньня сваіх вайскоўцаў на Данбасе. Падчас дзеяньня Менскіх дамоўленасьцяў расейцы адмовіліся ад выкарыстаньня звыклых тактычных групаў (БТГр/РТГр), бо буйныя баявыя адзінкі з штатнага складу ЗС РФ на Данбасе ня могуць заставацца незаўважнымі, да таго ж сфармаваныя два вайсковыя корпусы, што аб’ядноўваюць расейска-тэрарыстычныя войскі ў НЗФ новага тыпу. Цяпер расейскіх вайскоўцаў-кантрактнікаў з разнастайных вайсковых злучэньняў паадзінкава або дробнымі групамі (ня болей за аддзяленьне) адкамандыроўваюць да таго ці іншага падразьдзяленьня “наваросіі” у якасьці інструктараў або адмыслоўцаў, што неаднаразова ўжо было пацьверджанае праз нашыя расьледаваньні. Сярод такіх адкамандыраваных зафіксаваныя вайскоўцы наступных вайсковых частак: 291-я артбрыгада (в/ч 64670, станіца Тройцкая, Інгушэтыя), 7-я вайсковая база (в/ч 09332, г. Гудаута, акупаваная Абхазыя, Грузыя), 8-я АМСБр горная (в/ч 16544, Чачэнія, с.Барзой), 23-я АМСБр (в/ч 65349, Самара), 19-я АМСБр (в/ч 20634, Паўночная Асэтыя, г.Уладзікаўказ).
Да гэтага сьпісу дадаем і 74-ю АМСБр, кадравы вайсковец якой праходзіць службу ў складзе т.зв. 3-га батальёну “ЛНР” (“Хуліган”) НЗФ “наваросіі”. У выніку вывучэньня й аналізу сацыяльных профіляў баявікоў “ДНР/ЛНР” выяўлены профіль Ільлі Сякерына (архіў на профіль, архіў на фотаальбом, архіў на кантакты), узрост – 23 гады, родам з Омска. Паводле профільных дадзеных і фатаздымкаў, І.Сякерын ў 2013 годзе пасьля праходжаньня тэрміновай вайсковай службы, вярнуўся ў цывільнае жыцьцё і некаторы час працаваў у прыватнай ахоўнай кампаніі, пасьля чаго падпісаў кантракт на службу ў 74-й асобнай матастралковай брыгадзе (дамова, якая афармляецца паміж МА РФ і кандыдатам на кантракт, прадугледжвае 3 гады абавязковай службы). У выніку летне-восеньскай камандыроўкі на Данбас у 2014 годзе быў узнагароджаны мэдалём “За вайсковую доблесьць” II ступені паводле загаду міністра абароны РФ №841 з 23 сьнежня 2014 году, узнагароднае пасьведчаньне з подпісам камандыра в/ч 21005 палкоўніка А.Болдырава. Па ўсім відаць, І.Сякерын ня быў задаволены другасным мэдалём і праз год, цалкам мажліва, з жніўня 2015 году, у пагоні за “За вайсковай доблесьцю” I ступені, быў адкамандыраваны зь Юргі на Данбас ў склад 3-га батальёну “ЛНР” расейска-тэрарыстычных войскаў.
Сярод цяперашніх сяброў І.Сякерына хапае таварышаў з НЗФ “Хуліган”, за сепаратысцкім абліччам якіх таксама могуць хавацца кадравыя расейскія вайскоўцы: Сяргей Касякоў, Аляксандар Алегавіч Каменеў, Лёха Іваноў, Ільля Пікалаў, Аляксей Ізварын, Цімафей Краўчанка, а таксама калега – удзельнік летне-восеньскай кампаніі 2014 году на Данбасе і кавалер той жа мэдалькі за доблесьць Аляксей Пырын.
Як было зазначанае вышэй, 74-я АМСБр ужо неаднаразова згадвалася ў кантэксьце “растоўска-ўкраінскіх” камандыровак – глядзіце тэматычныя спасылкі:
- Расейскія войскі зноў канцэнтруюцца на мяжы з Данбасам
- 74-я АМСБР у баёх на Данбасе?!
- Падразьдзяленьне 61-й брыгады марской пяхоты Паўночнага флёта ў складзе сілаў уварваньня
- Чарговая графічная падробка ў скарбонку ГШ ЗС РФ: расейская калёна ў раёне Старабешева
- Войскі растоўскае групоўкі праходзяць інтэнсыўную баявую падрыхтоўку і зладжваньне ў памежных стэпах з Украінай
За наданьне першаснай інфармацыі, на падставе якой напісаны гэты матар’ял, дзякуем сябра нашага праэкту Улада.
Матар’ял да публікацыі падрыхтаваў Іраклі Камахідзэ
(с) Інфармацыя падрыхтаваная адмыслова для сайту InformNapalm.org, падчас перадруку й выкарыстаньня матар’ялу актыўная спасылка на аўтара і наш праэкт абавязковая.
Пераклад Дзяніса Івашына