На падставе вынікаў уласных расьледаваньняў каманда InformNapalm.org можа зрабіць выснову, што расейскае камандаваньне ў неабвешчанай вайне з Украінай выкарыстоўвае тактычныя групы (БТГр/РТГр), якія базуюцца ля мяжы з Украінай (у крытычныя для баявікоў моманты іх выкарыстоўваюць у выглядзе ўзмацненьня для баявікоў і наймітаў “ДНР”/”ЛНР”).

Збольшага, гэта вайскоўцы з вайсковых злучэньняў Паўднёвае вайсковае акругі (ПВА), хаця ёсьць групы і зь іншых вайсковых акругаў. Расейскія вайскоўцы таксама ўваходзяць у склад НЗФ у якасьці каардынатараў, дарадцаў, афіцэраў сувязі для каардынацыі з рэгулярнымі войскамі ЗС РФ. Таксама з рэгулярных расейскіх войскаў у вайне на Данбасе ўдзельнічаюць кантрактнікі шарагова-сяржанцкага складу, якія выступаюць у ролі інструктараў, якія займаюць пасады адмыслоўцаў і малодшых камандыраў (камандыры разьлікаў РСЗВ/артылерыі, пэрсанал, які абслугоўвае сродкі сувязі, РЭВ/РЭБ, выведнікі, снайпэры і г.д.).
Сярод раней зафіксаваных вайсковых частак ПВА ў шэрагах НЗФ “ДНР”/”ЛНР” (“Самалі”, “2-й МСБ народнай міліцыі “ЛНР”” і інш.) зафіксаваная прысутнасьць расейскіх “прыкамандыраваных” з узбраеньнем і тэхнікай:

– 19-я АМСБр (в/ч 20634 Паўночная Асэтыя, г.Уладзікаўказ, п.”Спутнік”)

– 18-я АМСБр (в/ч 27777 Чачэнія, п.Ханкала і станіца Калінаўская)

– 8-я АМСБр горная (в/ч 16544 Чачэнія, п.Барзой)

– 7-я вайсковая база (в/ч 09332 акупаваная Абхазыя, Грузыя, г.Гудаута)

– 33-я АМСБр (в/ч 22179, Адыгея, г.Майкоп)

Часткі спэцыяльнага прызначэньня ГРУ:

– 10-я АБрСпН (в/ч 51532, в/ч 65564, Краснадарскі край, г.Гарачы Ключ, п.Молькіна)

– 22-я АбрСпН (в/ч 11659, Растоўская вобласьць, п.Сьцяпны)

Адносна ўзбраеньня і тэхнікі НЗФ сьлед зазначыць, што, збольшага, гэта не “трафеі”, але сродкі, перакінутыя з РФ. Галоўным чынам, гэта састарэлае ўзбраеньне і тэхніка, якая пасля пераўзбраеньня вайсковых частак на больш сучасныя адзінкі, замест таго, каб знаходзіцца на базах захоўваньня, патрапляе у арсэнал НЗФ. У тым ліку БМП першай і другой мадыфікацыяў, БТР-80, МТ-ЛБ, РСЗВ БМ-21 “Град”, САУ “Гвазьдзіка”» і шмат іншага, пра што ўжо неаднаразова паведамляла у інфармацыйных матар’ялах нашая каманда InformNapalm, якія грунтуюцца на выніках уласных OSINT-расьледаванняў. Апроч перакідваньня старога ўзбраеньня, расейскае кіраўніцтва зьдзяйсьняе на Данбасе абкатку больш новых узораў тэхнікі РЭБ і стралковае зброі.

У новым матар’яле InformNapalm маюцца бясспрэчныя сьведчаньні перадачы баявікам “наваросіі” вайсковай тэхнікі 23-й АМСБр (в/ч 65349, Самара, Цэнтральная вайсковая акруга) і прысутнасьці ў складзе НЗФ “Вікінгі” кантрактнікаў гэтага ж вайсковага злучэньня ЗС РФ.

У выніку дасьледаваньня профілю сацсеціва расейскага найміта Эдуарда Мірошнікава (ВК ID 16347008, архіў: https://archive.is/XskDi) былі зафіксаваныя БТР-80 в/ч 65349 з адпаведнымі тактычнымі знакамі 23-й брыгады: чырвоным квадратам з трыма кропкамі і бартавымі нумарамі, якія нанесеныя чырвонай фарбай.

У сьпісе сяброўскіх кантактаў Э.Мірошнікава атрымалася выявіць кадравага вайскоўца з складу выведпадразьдзяленьня 23-й самарскай брыгады нейкага Аляксандра Граца (ВК ID antitroll1, архіў: https://archive.is/2VbmM). Нягледзячы на ​​тое, што на старонцы А.Граца нібы няма інфармацыі, якая пацьверджвае ягонае дачыненьне да 23-й АМСБр, праз нядоўгі пошук, усё ж, удалося пацьвердзіць ягоную прыналежнасьць да самарскай вайсковай часткі. Напрыклад, А.Грац у жніўні 2014 году “разьмінаўся пад Арэнбургам”, пра што напісаў у стужцы свайго сацыяльнага профілю (https://vk.com/wall217286975_614, архіў: https://archive.is/eRM76). У верасьні 2014 году быў зафіксаваны на вышкалах у Самары, што пацьверджанае аналягічнымі фотасьведчаньнямі ягоных таварышаў у службе Тымура Асевава і Вадзіма Насырава, да якога вернемся пазьней.

Напрыканцы верасьня 2014 году А.Грац быў перакінуты на Данбас, што пацьверджваюць прадстаўленыя фатаздымкі. У цяперашні час Аляксандар ваюе ў складзе НЗФ (батальён “Вікінгі”), што пацьверджвае відэаролік з 18 ліпеня 2015 году “Батальён “Вікінгі” намёртва трымае паўднёвыя рубяжы ДНР”, у якім ён у хранамэтражу 9.28 – 10 хв. і быў апазнаны. З улікам ягонай прыналежнасьці да вайсковай выведкі і ведаў у радыёдзеле, А.Грац, мажліва, нават зьяўляецца зьвяном у ланцужку ўзаемадзеяньня бандфармаваньняў з злучэньнямі ЗС РФ.

Заўвага: батальён “Вікінгі” даўгі час знаходзіўся ў Тэльманаўскім раёне, дзе аэраравыведка “Дняпро-1” выявіла вайсковы лягер расейска-тэрарыстычных войскаў. Фота вышкалаў гэтага НЗФ з распазнавальнымі тактычнымі знакамі, якія зафіксаванў бесьпілётнік, таксама фігуруюць у фатаальбомах “вайсковага карэспандэнта” Дубавога.

Пяройдзем да калегі А.Граца з в/ч 65349 Вадзіма Насырава (ВК ID 93043696, архіў: https://archive.is/KIXPU), які, як было зазначанае вышэй, таксама быў на вышкалах у Самары ў 2014 годзе. На фатаздымках, якія выкладзеныя 31 жніўня 2014 году можна пабачыць калёну тых самых самарскіх БТР-80 з характэрнымі тактычнымі знакамі 23-й асобнай матастралковай брыгады, якія былі перакінутыя на Данбас і перададзеныя падразьдзяленьням НЗФ. Расейскі вайсковец таксама не стрымаўся і пахваліўся фатаздымкамі падчас сваёй зімовай камандыроўкі на Данбас.

Такім чынам, можна сьмела выказаць здагадку, што выведзеная з баявога складу тэхніка 23-й асобнай матастралковай брыгады, у прыватнасьці БТР-80, якія падчас пераўзбраеньня паступова замяняліся на новыя БТР-82, замест захоўваньня на складох, перакідвалася з дапамогаю расейскіх вайскоўцаў на Данбас, якія стала прыбываюць ва “украінскія камандыроўкі”.

Заўвага: Паводле наяўнай інфармацыі, год таму ў Кастрычніцкім раёне Растоўскае вобласьці была зафіксаваная паўнавартасная батальёна-тактычная група (БТГр) 23-й брыгады, ва ўзбраенні якой былі новыя БТР-82 (гл. “Паўднёвая камандыроўка 23-й АМСБ”).
PS: Нягледзячы на ​​тое, што інфармацыя пра перакідваньне БТР-80 23-й брыгады для патрэбаў НЗФ “наваросіі” амаль гадавой даўніны, гэтая тэма не губляе сваёй актуальнасьці. Напрыклад, 11 жніўня 2015 году ў сеціве зьявіўся відэаролік “Наступ сілаў “ЛНР” на пазыцыі ЗСУ” (паводле пэўнай інфармацыі відэа леташняе), у якім на 0.52. і 4.40 хв. хранамэтражу можна пабачыць задні борт бранетранспартэру з надпісам “ЛНР” па-над чырвоным тактычным знакам 23-й МСБр.

23-я самарская брыгада ўжо неаднойчы фігуравала ў кантэксьце “украінскіх камандыровак”, у тым ліку былі здабытыя фатасьведчаньні знаходжаньня ейных вайскоўцаў на Данбасе. Шмат хто памятае эпапею з перакідваньнем у сакавіку-красавіку 2015 году тактычнай групы брыгады ў Белгарадзкую вобласьць, якая пасля дзіўных манэўраў ля паўночных межаў Украіны вельмі хутка павярнулася на мейсца сталай дысьлякацыі. Гл. тэматычныя спасылкі:

– 23-я АМБр арміі РФ ваявала ва Украіне. Фота летніх подзьвігаў

– Базавы лягер белгарадзкай групоўкі расейскіх сілаў уварваньня

– Сьвежыя фатадоказы актыўнасьці расейскіх войскаў у Белгарадзкай вобласьці

Матар’ял да публікацыі падрыхтавалі: krmvictory і Іраклі Камахідзэ

(c) Інфармацыя падрыхтаваная адмыслова для сайта InformNapalm, падчас перадруку й выкарыстаньня матар’ялу актыўная спасылка на аўтара і наш праэкт абавязковая.

Пераклад на беларускую мову – Дзяніс Івашын