Расея накіравала ў Лібію зьнішчальнікі МіГ-29 і Су-35, а таксама бамбоўцы Су-24, якія ўваходзяць у склад Паветрана-касьмічных сілаў (ПКС) РФ. Пра гэта ў аўторак, 26 траўня, паведаміла Афрыканскае камандаваньне Збройных сілаў ЗША ў сваім акаўнце ў Twitter.
NEWS: Russia deploys military fighter aircraft to Libya
—–
“For too long, Russia has denied the full extent of its involvement in the ongoing Libyan conflict. Well, there is no denying it now.” – Gen. Townsend
Release: https://t.co/HpLdwUJxcr
Photos: https://t.co/raTal1LKPa pic.twitter.com/dVtsWKPYZ5— US AFRICOM (@USAfricaCommand) May 26, 2020
Паводле дадзеных амерыканскае выведкі, сьпярша лятакі з тэрыторыі РФ былі перакінутыя ў Сірыю. Там іх перафарбавалі, каб схаваць расейскае паходжаньне. Пасьля гэтага яны былі перабазаваныя ў Лібію. Згодна з выведвальнай інфармацыяй, расейскія вайскоўцы плянуюць перадаць у Лібію лятакі МіГ-29, Су-35 і Су-24 пад кантроль дзейных у рэгіёне расейскіх прыватных вайсковых кампаніяў, у тым ліку ПВК “Ваґнэр”, што ваююць на баку Лібійскае нацыянальнае арміі (ЛНА), пад камандаваньнем мяцежнага фэльдмаршала Халіфа Хафтара, якога падтрымлівае Масква.
Фатаздымкі з дакладу Афрыканскага камандаваньня Збройных сілаў ЗША.
Далей, паводле дадзеных выведкі, расейскія зьнішчальнікі й бамбоўцы плянуюць задзейнічаць у баёх супроць сілаў Ураду нацыянальнае згоды Лібіі. У той жа час, як заявіў камандуючы Афрыканскім камандаваньнем ЗС ЗША генэрал Стывэн Таўнсэнд, відавочна, што ані ЛНА, ані ПВК ня змогуць выкарыстоўваць і абслугоўваць падобныя баявыя машыны самастойна, без падтрымкі кадравых расейскіх вайскоўцаў.
21 траўня ЛНА абвесьціла пра пляны зьдзейсьніць найбліжэйшым часам найбуйнейшую паветраную апэрацыю з мажлівым удзелам расейскіх лятакоў. Як паабяцаў камандуючы вайскова-паветранымі сіламі ЛНА Сакрэ аль-Джарушы, “найбліжэйшыя гадзіны будуць пакутлівымі” для прэзыдэнта Турэччыны Рэджэпа Таіпа Эрдаґана.
Чытайце таксама: Валянтэры сабралі доказы ўдзелу 32 вайсковых падразьдзяленьняў ЗС РФ у апэрацыі захопу Крыму
Пасьля гэтага стала вядома, што зь лініі фронту ў раёне Трыпалі былі эвакуяваныя больш за 1000 байцоў расейскае ПВК “Ваґнэр”.
Раней Рэджэп Таіп Эрдаган абвінаваціў расейскае вайсковае кіраўніцтва, у тым ліку міністра абароны РФ Сяргея Шайґу, у вядзеньні вайны ў Лібіі з выкарыстаньнем наймітаў.
Даведкавая інфармацыя
У спэцыяльным дакладзе InformNapalm, які быў нададзены Парляманцкай асамблеі NATO ў 2018 годзе, ужо зьвярталася ўвага сусьветнай супольнасьці на рызыкі гібрыднага выкарыстаньня расейскіх “прыватных арміяў”, у тым ліку ПВК “Ваґнэр”, для дасягненьня палітычных мэтаў Масквы ва ўсім сьвеце.
Сьлед таксама нагадаць, што ў 2016 годзе валянтэры міжнароднае выведвальнае супольнасьці InformNapalm сабралі й апублікавалі дадзеныя 116 афіцэраў ПКС РФ – пілётаў і штурманаў расейскае авіягрупы ў Сірыі, якая неаднаразова зьдзяйсьняла ракетна-бомбавыя ўдары, у выніку якіх загінулі тысячы мірных жыхароў.
Публікацыя дадзеных чальцоў экіпажаў ПКС РФ у 2016 годзе выклікала сапраўдную гістэрыю ў расейскіх СМІ, яны называлі яе “утечкой секретной информации“. Разам з гэтым расейскае МЗС праз свае дыпляматычныя каналы таксама спрабавала шантажаваць краіны, у якіх знаходзіліся сэрвэры з хостынгам люстэрак сайту InformNapalm.org, патрабуючы зачыніць сайт, аднак, усе гэтыя спробы былі марнымі.
Верагодна, што некаторыя з раней выяўленых расейскіх пілётаў, якія атрымалі баявы досьвед у Сірыі й былі раскрытыя супольнасьцю InformNapalm, могуць быць задзейнічаныя і ў новай гібрыднай ваеннай апэрацыі Расейскае Фэдэрацыі ў Лібіі.
Чытайце таксама: «У нас заданьне спаймаць невідзімку амэрыканскую, F-22 Raptor» – афіцэр ПКС РФ” – гукавы перахоп размовы афіцэра ПКС РФ
Матар’ял падрыхтаваны адмыслова для сайту міжнароднае выведвальнае супольнасьці InformNapalm.
Пераклаў на беларускую мову Дзяніс Івашын.
Пашырэньне й перадрук з спасылкаю на крыніцу вітаюцца!
(Creative Commons — Attribution 4.0 International — CC BY 4.0 )
Рабіце рэпост і дзяліцеся зь сябрамі.
Падпісвайцеся на старонкі супольнасьці InformNapalm у Фэйсбук / Твітэр / Telegram
і апэратыўна атрымлівайце інфармацыю пра новыя матар’ялы.
Мы ня маем аніякай фінансавай падтрымкі ад ураду якой-кольвек краіны ці донараў, адзінымі мэцэнатамі інфармацыйнага праэкту зьяўляюцца ягоныя валянтэры й чытачы, якія ангажуюць свае сілы, час і сродкі для супрацьдзеяньня расейскай інфармацыйнай агрэсіі. Вы таксама можаце падтрымаць InformNapalm або сваімі ведамі й навыкамі, або ахвяраваньнем на ўтрыманьне сайту й разьвіцьцё праэкту. Фінансава нас можна падтрымаць або дабрачынным унёскам праз LiqPay, або стаць «патронам» і падпісацца на штомесячныя мініўнёскі праз сеціва Patreon.