На знак памяці пра Дмытра Тымчука – сапраўднага патрыёта Украіны, народнага дэпутата, падпалкоўніка запасу ЗСУ, кіраўніка й сузаснавальніка групы “Інфармацыйны Супраціў” – беларуская служба InformNapalm працягвае цыкль публікацыяў ягоных найбольш значных аналітычных працаў.

Дмытро Тымчук трагічна загінуў 19 чэрвеня 2019 году ў выніку вагнястрэльнага параненьня.

Супольнасьць InformNapalm далучаецца да шчырых спачуваньняў усім родным ды блізкім нашага сябра ды калегі.

“Афіцыйны” сьпікер акупацыйнага фармаваньня “ЛНР” Андрэй Марочка падтрымаў ініцыяваны акупацыйнымі ўладамі “ДНР” зварот да прэзыдэнта Украіны Уладзімера Зяленскага пра наданьне АРДЛА (асобныя рэгіёны Данецкай і Луганскай абласьцей – заўв. рэд.)  “шырокай аўтаноміі ў складзе Украіны”.

Гэты зварот зьяўляецца адным з элемэнтаў адзінага пляну Крамля што да вяртаньня АРДЛА пад кантроль Украіны на правах “аўтаноміі з шырокімі правамі”. Гэта той сцэнар, які ў Кіеве лабіюе верны сябар Масквы Віктар Медвядчук. То бок сцэнар Пуціна прасоўваюць па ўсіх мажлівых напрамках.

Віктар Медвядчук (праваруч) падчас сустрэчы з вышэйшым вайскова-палітычным і духоўным кіраўніцтвам дзяржавы-агрэсара РФ

На дадзены момант гэты плян Масква зьдзяйсьняе па наступных напрамках:

• на міжнароднай арэне фармуе меркаваньне, што зараз, пасьля прэзыдэнцкіх выбараў ва Украіне, склалася найбольш спрыяльная сытуацыя для разьвязаньня “ўнутрыўкраінскага канфлікту” (у іншай інтэрпрэтацыі – “грамадзянская вайна”);
• “пятая калёна” Крамля ва Украіне (прарасейскія палітыкі, палітычныя сілы й экспэрты-палітолягі) заклікаюць да наўпроставага дыялёгу новага кіраўніцтва Украіны з “ЛДНР” (вядомы заклік “услышать Донбасс”) з мэтай пошуку аптымальнага рашэньня дзеля разьвязаньня таго ж “унутрыўкраінскага канфлікту” (вядома ж, у гэтых палымяных закліках і мэсэджах цалкам адсутнічае які-кольвек намёк на расейскіх “іхтамнетаў”), маючы на ​​ўвазе тую ж аўтаномію з шырокімі правамі. Пры гэтым, практычная рэалізацыя наданьня “ЛДНР” аўтаноміі заплянаваная Масквою й прарасейскімі сіламі ва Украіне пасьля парляманцкіх выбараў (у выпадку фармаваньня яўнае ці латэнтнае  прарасейскае большасьці й прасоўваньня сцэнару фэдэралізацыі Украіны);
• пашпартызацыя жыхароў “ЛДНР” расейскімі пашпартамі, а таксама заплянаваны на восень перапіс насельніцтва “ЛДНР”;
• фармаваньне грамадзкай думкі на тэрыторыі АРДЛА пра неабходнасьць атрыманьня аўтаноміі ад Украіны дзеля далейшага самавызначэньня – абяцаньні мажлівага “легітымнага” ўваходжаньня ў склад РФ.

Але, сьлед зазначыць, што ў дачыненьні да апошняга пункту прадстаўнікі “ЛДНР” відавочна хітруюць, бо не адказваюць на элемэнтарнае пытаньне – навошта Крамлю патрэбны разрабаваны й разбураны самімі ж расейцамі Данбас?

Фота: Reuters

Так, Масква разглядае некалькі варыянтаў разьвіцьця далейшай сытуацыі ў кантэксьце “аўтаноміі Данбасу”, і ў кароткатэрміновай пэрспэктыве мае наступныя мэты:

• “вяртанне” АРДЛА пад умоўны кантроль Украіны ў статусе аўтаноміі з шырокімі правамі, якая дэ-факта як палітычна, гэтак і эканамічна, застаецца пад кантролем Крамля й ягоных спэцслужбаў. Гэта мае даць сыгнал Захаду, у першую чаргу Эўразьвязу, пра перагляд і скасаваньне антырасейскіх санкцыяў і аднаўленьне эканамічнае супрацы, а таксама вынясеньне пытаньня анэксаванага Крыму за дужкі;
• поўны перавод фінансаваньня “аўтаноміі” й аднаўленьня ейнай разбуранай інфраструктуры на афіцыйны Кіеў і бюджэт Украіны. Пры гэтым, дадзеныя фінансавыя рэсурсы будуць цалкам кантраляваць стаўленьнікі Масквы;
• запуск “мэтастазаў аўтаноміі” ў некаторых іншых рэгіёнах Украіны, дзе зараз адбываецца актыўная падрыхтоўчая праца што да разьдзьмуваньня існых у вузкіх колах ідэяў сэпаратызму, і паступовае пашырэньне расейскага ўплыву на іншыя ўкраінскія тэрыторыі ў напрамку з усходу на захад (прыярытэты тыя ж, што і ў 2014 годзе: Поўдзень і Усход Украіны);
• канчатковае блякаваньне інтэграцыйнага курсу ў NATO й Эўразьвяз.

Ці гатовая Украіна сёньня супрацьстаяць гэтым сцэнарам Масквы? Вельмі карціць верыць, што так.

Каардынатар групы Інфармацыйнага Супраціву Дмытро Тымчук

Крыніца артыкулу.

Загалоўнае фота – veteranstoday.com.

Рэдагаваў і пераклаў на беларускую мову Дзяніс Івашын.

Пашырэньне й перадрук з спасылкаю на крыніцу вітаюцца!
(Creative Commons — Attribution 4.0 International — CC BY 4.0 )

Рабіце рэпост і дзяліцеся зь сябрамі.
Падпісвайцеся на старонкі супольнасьці InformNapalm у Фэйсбук / Твітэр / Telegram
і апэратыўна атрымлівайце інфармацыю пра новыя матар’ялы.