6 студзеня міністар абароны РБ Віктар Хрэнін афіцыйна аб’явіў, што ў Казахстан накіраваная міратворчая рота, якая ёсьць у складзе 103-й асобнае паветрана-дэсантнае брыгады (спасылка, вэб-архіў). Колькасьць міратворчае роты складае 100 чалавек пастаянных сілаў і 200 чалавек рэзерву (спасылка, вэб-архіў). Тым ня менш, у розных СМІ цыркулявалі, без канкрэтных доказаў, агульныя лічбы накіраваных у Казахстан беларускіх вайскоўцаў ад 100 да 500 чалавек.

Паводле словаў Хрэніна, адпраўка вайскоўцаў адбывалася 6 студзеня расейскімі вайскова-транспартнымі лятакамі Іл-76. На відэакадрах, якія суправаджалі ягоны выступ, бачны расейскі лятак Іл-76 з бартавым нумарам RF-78833.

Апроч таго, паведамлялася, што колькасьць расейскіх Іл-76, задзейнічаных для адпраўкі беларускіх “міратворцаў”, складае 5.

Але, паводле дадзеных Bellingcat, у Казахстан 6 студзеня прыбылі ўсяго 2 расейскія лятакі Іл-76, якія маюць бартавыя нумары RA-76669 і RA-76638 (спасылка, вэб-архіў).

Пры гэтым маецца відэа ад 6 студзеня, на якім у лятак з бартавым нумарам RA-76638 загружаюць вайсковую тэхніку з расейскімі аўтамабільнымі нумарамі (спасылка, вэб-архіў). Гэтае відэа названае “відэа вылету расейскіх вайскоўцаў у Казахстан”. То бок застаўся толькі адзін лятак Іл-76, на якім беларускія “міратворцы” маглі адбыць у Казахстан. Дарэчы, для роты гэтага цалкам бы хапіла.

І толькі 8 студзеня каля 14 гадзіны, то бок праз два дні пасьля прыбыцьця, было апрылюдненае відэа, якое падаецца як відэа прылёту беларускіх вайскоўцаў на аэрадром Жэтыген ў Казахстане. Прычым апублікавала яго не Мінабароны Беларусі, а Мінабароны Расеі (спасылка, вэб-архіў).

Прычына такого “спазьненьня” ў тым, што ўсе тыя расейскія лятакі, што бачныя на відэа, паводле дадзеных Bellingcat, прыляцелі ў Казахстан 8, а ня 6 студзеня 2022 года.

Гаворка ідзе пра лятакі Іл-76 з бартавымі нумарамі RA-78831 і RF-78805. На відэа бачна, што зь лятака з бартавым нумарам RF-78805 выгружаецца вайсковая тэхніка, якая мае расейскія нумары. А менавіта, нумар 8611 АУ 50 (час на відэа 00:03), і нумар 8011 АО 50 (час на відэа 00:19). 50-ы рэгіён, які пазначаны ў абодвух выпадках, – гэта Маскоўская вобласьць.

То бок вайскоўцаў суправаджае расейская тэхніка. З улікам таго, што іхныя твары з большага закрытыя балаклавамі, адзінай прыкметай іх прыналежнасьці да беларускага войска застаюцца нашыўкі зь “дзяржаўным” сьцягам РБ.

А 9 студзеня фб-карыстальнік Аляксандар Каваленка апублікаваў здымак, на якім за сьпінамі меркавана беларускіх вайскоўцаў стаіць аўтамабіль з зьнятым нумарам (спасылка).

Магчыма нумары былі зьнятыя з мэтай схаваць расейскае паходжаньне аўтамабілю.

Наступным этапам расейскае “спэцапэрацыі” сталася прыбыцьцё “міратворцаў” назад у Беларусь. У СМІ паведамлялася, што для гэтае мэты Расея выдзеліла 10 вайскова-транспартных лятакоў Іл-76 (спасылка, вэб-архіў). Гэтая колькасьць значна перавышае нават пададзеную раней у СМІ колькасьць лятакоў, выдзеленых для адпраўкі ў Казахстан (5), не кажучы ўжо пра выяўленую насамрэч колькасьць (1 лятак).

З дапамогай вывучэньня адкрытых крыніцаў інфармацыі былі знойдзеныя дадзеныя пра 5 бартавых нумароў расейскіх лятакоў Іл-76, якія 14 студзеня прыляцелі ў Беларусь. А менавіта, лятакі з бартавымі нумарамі RF-78833, RF-76731, RF-78777 (спасылка, вэб-архіў), RA-78831 (спасылка, вэб-архіў) і RA-76592 (спасылка, вэб-архіў).

У сувязі з гэтым зьвяртае на сябе ўвагу адна дэталь: падчас урачыстае сустрэчы “міратворцаў” на аэрадроме Мачулішчы ля Менску большая частка іх мела балаклавы на тварах, і толькі каля дзясятка стаялі з адкрытымі тварамі (спасылка, вэб-архіў).

Хаця днём пазьней, ужо ў Віцебску, калі сустракалі вайскоўцаў 103-й асобнае паветрана-дэсантнае брыгады, якая там дысьлякуецца, ўсе “міратворцы” былі без балаклаваў (спасылка, вэб-архіў).

Ня выключана, што тая частка вайскоўцаў, што хавала твары, засталася ў Менску. І ня выключана таксама, што яны мелі дачыненьне не да беларускага, а да расейскага войска, і што менавіта яны былі тым самым “дадатковым грузам”, які перакідвалі ў Беларусь на дадатковых лятаках.

З улікам абвешчаных 17 студзеня на тэрыторыі Беларусі ў лютым 2022 года вышкалаў “Союзная решимость-2022”, якім, паводле словаў беларускіх вайскоўцаў (спасылка, вэб-архіў), будзе папярэднічаць “комплексная праверка”, ў тым ліку магчымасьці перакідваньня груповак войскаў на вялікія адлегласьці, гэтая расейская “спэцапэрацыя “Міратворцы”” можа быць ужо яе складовай часткай.

Служба маніторынга Беларускай рэдакцыі InformNapalm працягвае ўважліва сачыць за перамяшчэньнем па нашай тэрыторыі патэнцыйнай і ўяўнай ваеннай тэхнікі і асабовага складу акупантаў, а таксама заахвочвае неабыякавых беларусаў-патрыётаў далучацца да маніторынгу і дасылаць наўпрост нам у сацыяльныя сеткі або іншым СМІ здабытую вамі карысную інфармацыю.

Служба маніторынга Беларускай рэдакцыі InformNapalm