Існая ў Беларусі арганізацыя пад назвай «Добраахвотнае таварыства садзейнiчаньня армii, авiяцыi i флёту Рэспублiкi Беларусь» (ДТСААФ), хаця афіцыйна ніяк не зьвязаная з аналягічнай структурай ДОСААФ у Расеі, відавочна кіруецца яе палітыкай, у тым ліку адносна куратарства над казачымі групоўкамі.

Пачынаючы як мінімум з 2017 года расейскае ДОСААФ выказвае падтрымку т.зв. «Саюзу казакоў-воінаў Расеі і замежжа («СКВРиЗ»), зь якім зьвязаная групоўка «Белорусское казачество» пад кіраўніцтвам Мікалая Улаховіча (вэб-архіў).

А 1 чэрвеня бягучага году на старонцы «СКВРиЗ» у сацсетцы «ўкантакце» гэтая арганізацыя была названая «ключавым партнэрам ДОСААФ» (вэб-архіў).

ДТСААФ Беларусі, ў сваю чаргу, нават пайшоў далей, і наўпрост уключыў на дадзены момант у свае шэрагі ўдзельнікаў двух казачых груповак у Беларусі: гэта «вайскова-патрыятычны клюб «Патриот»» (вёска Лыцавічы Вілейскага раёна) і «казачы ўзвод «Терек»» (Менск).

«Вайскова-патрыятычны клюб «Патриот»» быў створаны ў 2015 годзе, ягоным кіраўніком зьяўляецца «патомны казак» Дзяніс Шарафановіч (акаўнт у сацсетцы OK.ru, вэб-архіў).

Пры гэтым у раённую структуру ДТСААФ клюб «Патриот» увайшоў не раней за сакавік 2017 года. У размове ад 24 лютага 2017 года кіраўнік Вілейскае раённае арганізацыі ДТСААФ Васіль Гулецкі называе клюб «Патриот» створаным на базе ўстановы «Лыцавіцкі дом культуры» (вэб-архіў).

А 26 чэрвеня 2021 года на эмблеме клюба ўжо маецца інфармацыя пра тое, што ён належыць да структураў ДТСААФ (вэб-архіў). То бок, гэтае ўключэньне магло адбыцца зусім нядаўна.

Дарэчы, зь відэа, выкладзеных па спасылцы, бачна, што нічога агульнага з Беларусьсю падрыхтоўка казачкоў клюбам «Патриот» ня мае.

Іншая казачая групоўка, што ўступіла ў ДТСААФ – гэта «Пластунский белорусского казачества взвод «Терек»», які быў створаны 30 траўня 2020 г., нібыта для ўдзелу ў “ваенна-тактычных гульнях” (старонка “ўкантакце”, вэб-архіў). Фактычна гэта страйкбольны клюб з казачкова-рускамірнай спэцыфікай.

Кіраўніком «ўзвода «Терек»» зьяўляецца Аляксандар Баукоў, інфармацыя пра прызначэньне якога зьмешчаная на старонцы «СКВРиЗ» «ўкантакце» 25 жніўня 2020 года (вэб-архіў).

Ёсьць падставы лічыць, што Аляксандр Баукоў (акаўнт “укантакце”, вэб-архіў) зьяўляецца грамадзянінам Расеі. 1 ліпеня 2020 года на сваёй старонцы «ўкантакце» ён разьмясьціў здымкі, зь якіх бачна, што ён браў удзел у галасаваньні наконт расейскае канстытуцыі (вэб-архіў).

Баукоў мае таксама іншы акаўнт «укантакце», з псэўданімам «Колтер Стивенс» (спасылка, вэб-архіў).

Вось як удзельнікі «Терека» апісваюць свае трэнаваньні: «Были отработаны элементы взаимодействия, работа в двойке, перемещение в лесу, стрельба по мишеням, элементы ножевого боя» (вэб-архіў).

Яны не хаваюць, што зьяўляюцца прыхільнікамі «русского мира», пра што сьведчыць здымак ад 31 студзеня 2021 года, на якім тры казачкі трымаюць разам з эмблемай «Терека» сьцяг Расейскае Імперыі (вэб-архіў).

Колькасьць удзельнікаў трэнаваньняў «ўзвода «Терек»» – ад 4 да 6 чалавек. Апроч Аляксандра Баукова, ўдалося выявіць наступных казачкоў-страйкбалістаў:

• Андрэй Ашуркевіч (акаўнт “укантакце”, вэб-архіў)
• Максім Сардак (акаўнт “укантакце”, вэб-архіў)

А 9 чэрвеня бягучага году «Терек» на сваёй старонцы «ўкантакце» паведаміў пра адкрыцьцё 8 чэрвеня пярвічнае арганізацыйнае структуры на базе Менскага аддзела ДТСААФ (вэб-архіў).

ДТСААФ Беларусі відавочна яшчэ з самага пачатку было створанае як аналяг ды фактычна падпарадкаваная структура расейскага ДОСААФ, таксама безумоўна, што ў сваёй дзейнасьці гэтая арганізацыя перасьледуе інтарэсы не Беларусі, а яе агрэсыўнага суседа. Зараз, як бачым, такая дзейнасьць значна ўзмоцнілася і стварае сур’ёзную небясьпеку для Беларусі ва ўмовах гібрыднай агрэсыі супроць яе.

Кожная структура ў Беларусі, афіляваная з Расеяй, ужо стварае небясьпеку, якая тым мацней, чым мацней узрастае верагоднасьць непасрэднага гібрыднага захопу краіны. Калі ж размова йдзе пра пара- і калямілітарныя арганізацыі, узровень небясьпекі яшчэ больш значна падвышаецца. Ворганам сапраўднае дзяржаўнае бясьпекі Беларусі, калі б такія існавалі, варта было заняцца на ўзроўні крымінальнага сьледзтва азначанымі арганізацыямі і дзеячамі, але пакуль мы вымушаныя зьвяртацца да актыўнай грамадзянскай патрыятычнай беларускай супольнасьці дзеля супольнага цывільнага кантролю за дзейнасьцю гэтых і падобных варожых для краіны структураў.

Дасылайце нам у сацыяльных сетках вядомую вам і важную для беларускай дзяржавы інфармацыю пра існаваньне і дзейнасьць антынацыянальных (пра)расейскіх арганізацыяў на нашай тэрыторыі.

Служба маніторынга беларускай рэдакцыі InformNapalm