“Сэвастопальцы, якія жывуць у раёне Фіялэнта і Хэрсанэскага маяку з занепакоенасьцю сустракаюць зьяўленне паблізу сваіх дачных і індывідуальных дамоў новых вайсковых частак і падразьдзяленьняў Збройных сілаў Расеі.

Зь яшчэ большай насьцярожанасьцю глядзяць на гэта ўладальнікі прыватных міні-гатэляў. Жылыя будынкі, пабудаваныя падчас частковай дэмілітарызацыі тэрыторыі Сэвастопалю, сёньня апынуліся паблізу аб’ектаў з падвышаным узроўнем небясьпекі, у тым ліку для здароўя людзей – гэта рознага кштлату сучасныя магутныя РЛС выяўленьня радыёэлектронных аб’ектаў, і іхнага падаўленьня, а таксама берагавыя супрацькарабельныя ракетныя комплексы. Мясцовыя жыхары ўжо гавораць пра няўстойлівую працу мабільнае сувязі, радыё і тэлевізійных прыладаў.

Асаблівую трывогу ў людзей выклікала зьяўленне магутных высокіх антэнных мачтаў на Фіялэнце ў раёне Георгіеўскага кляштару. Афіцыйная інфармацыя ў газэце ЧФ РФ “Флаг Родины” (рас.) пра разгортваньне і пачатак працы самага сучаснага расейскага комплексу радыёэлектроннай барацьбы “Мурманск” у складзе 475-га цэнтру РЭБ ЧФ РФ пададзеная ў лепшых традыцыях савецкае прапаганды, і на думку ейных арганізатараў мае выклікаць гонар у сваіх і страх у ворагаў.

Аднак, самі “дачнікі” з засьцярогай глядзяць на мачты антэнаў, якія знаходзяцца за 150 мэтраў ад іх дамоў, пры гэтым яны пэўныя, што будзе моцнае выпраменьваньне. Свае здагадкі яны тлумачаць і тым, што ў саміх вайскоўцаў для абароны ад выпраменьваньня нібыта ёсьць адмысловыя браняваныя “каўпакі”, у якіх яны будуць знаходзіцца падчас працы комплексу РЭБ. Але больш за ўсё, садоўнікі, якія знаходзяцца паблізу вайсковых аб’ектаў РФ, што адраджаюцца, баяцца канфіскацыі сваіх зямельных дзялянак праз інтарэсы дзяржавы”.

20 сакавіка 2014 году “Риановости” (рас.) паведамлялі пра вышкалы Паўночнага флоту (ПФ) Расеі і выкарыстаньне ім найноўшага комплексу “Мурманск-БН”.

“Паводле сваіх характарыстык “Мурманск-БН” здольны дэзарганізаваць кіраваньне сіламі верагоднага супраціўніка. Ён працуе ў адлегласьці больш за 5 тысяч кілямэтраў”, – паведаміў журналістам начальнік цэнтру радыёэлектроннай барацьбы Паўночнага флоту (ПФ) Расеі капітан другога рангу Дзьмітры Папоў.

Паводле ягоных словаў, гэтыя комплексы складаюць аснову групоўкі флотавае РЭБ. “Мурманск-БН” паступілі у ПФ ў сьнежні 2014 году і ўжо пасьпяхова вывучаныя асабовым складам.

Комплекс зьдзяйсьняе радыёвыведку, перахоп сыгналаў супраціўніка і іхнае падаўленьне. Ён працуе ва ўсім кароткахвалевым дыяпазоне.

“Сёньня нашая задача – не дапусьціць перадачу дадзеных зь лятакоў-выведнікаў умоўнага супраціўніка для ягонай авіяцыі. Эфэктыўнасьць комплексу стоадсоткавая. Задачы, якія атрымалі ў рэжыме рэальнага часу, цалкам выканалі”, – рэзюмаваў Папоў”.

Так і карціць сказаць: “АУ, Расея!!! Якія лятакі-выведнікі? Мы тут за вамі з космасу з спадарожнікаў-выведнікаў назіраем, да таго ж анлайн, а вы пра нейкія лятакі-выведнікі кажаце”.

Зазначым, што адзін комплекс мае шэсьць адзінак тэхнікі, пра гэта згадваецца ў адкрытай крыніцы і гэтую тэхніку можна пабачыць на спадарожнікавых здымках.

На адным з расейскіх форумаў былі апублікаваныя фатаздымкі комплексаў РЭБ “Мурманск-БН” і заяўленае, што яны зробленыя ў чэрвені 2015 году, але ў мэтададзеных фота пазначаная іншая дата – 26.03.2015 г.