У гэтыя тыдні ў Беларусі адбываюцца адначасова дзьве крыжовыя хады: першая зь якіх, з 5 да 28 ліпеня, мае назоў «4-тая ўсебеларуская крыжовая хада» (рас. “4-тый всебелорусский крестный ход”), а другая, з 2 ліпеня да 2 жніўня – «крыжовая хада з парэшткамі князя Аляксандра Неўскага» (рас. “крестный ход с мощами князя Александра Невского”). Абодва яны арганізаваныя Беларускім экзархатам РПЦ (спасылка 1, вэб-архіў; спасылка 2, вэб-архіў). Падчас абедзьвух крыжовых ходаў заўважаныя людзі, на адзеньні якіх бачная эмблема, на якой намаляваныя крыж, чэрап з касьцямі ды надпіс «Чаю воскресенья мертвых и жизни будущего века. Аминь». Па спасылцы яны названыя «казаками з Расеі» (вэб-архіў).

Падчас другой крыжовай хады на здымак патрапіў чалавек у такім жа адзеньні, якога ўдалося ідэнтыфікаваць. Гэта Мікалай Пятроў (акаўнт “укантакце”, вэб-архіў; акаўнт у OK.ru, вэб-архіў). Горада свайго пражываньня ён нідзе не ўказвае (а акаўнт «укантакце» ўвогуле закрыты для агульнага доступу), але паводле інфармацыі з акаўнта ягонае жонкі Вольгі Пятровай (акаўнт ў “OK.ru”, вэб-архіў), ён жыве ў горадзе Сызрань, Расея.

На адным з здымкаў у акаўнце Мікалая Пятрова ў сацсетцы «OK.ru» разам зь ім стаіць чалавек зь імем Андрэй Качаргін (вэб-архіў). Гэты Андрэй Качаргін як трэнер каратэ раней, на замову РПЦ, праводзіў для казакоў ды сьвятароў заняткі баявых мастацтваў.

То бок, маюцца відавочныя сувязі Качаргіна з РПЦ, пад кіраўніцтвам якой зараз адбываюцца абедзьве крыжовыя хады ў Беларусі.

Андрэй Качаргін мае акаўнты ў сацсетках «укантакце» і «OK.ru» (акаўнт “укантакце”, вэб-архіў; акаўнт у “OK.ru”, вэб-архіў), апроч таго, ён занесены ў так званы «чысьцец» на сайце «Міратворац» як расейскі наёмнік (вэб-архіў).

Вось як выглядае малюнак на адзеньні казакоў з Расеі бліжэй:

Вонкавы выгляд гэтае эмблемы вельмі падобны да эмблемы т.зв. «Крымскага казачага палка» (вэб-архіў). Розьніца толькі ў прысутнасьці крыжа на першай эмблеме. Гэта можна патлумачыць тым, што адзеньне (цішоткі) зь ёю былі зробленыя адмыслова для ўдзелу ў крыжовай хадзе.

«Крымскі казачы полк» мае сваю старонку ў сацсетцы «ўкантакце» (вэб-архіў).

Дарэчы, цішотку менавіта ў гэтым варыянце – бяз крыжа – апранае згаданы вышэй Андрэй Качаргін. Ёсьць скрыншот зь відэа (вэб-архіў).

Паводле інфармацыі, збранай выданьнем «Крым.Рэаліі» (вэб-архіў), «Крымскі казачы полк» быў створаны 12 сакавіка 2014 года з розных расейскіх казачых груповак ды займаўся «зачысткамі» падчас устанаўленьня ў Крыме акупацыйнае адміністрацыі.

Апроч таго, ёсьць сьведчаньні, што казакі з «Крымскага палку» ўдзельнічалі (ці дагэтуль удзельнічаюць) таксама ў збройнай агрэсыі Расеі на тэрыторыі кантынентальнай часткі Украіны.

То бок, прадстаўнікі групоўкі, з дапамогай якой Расея захоплівала Крым і ваюе на Данбасе, зараз зьявіліся ў Беларусі. Падчас захопу Крыма казачкі «Крымскага палку» дзейнічалі ў супрацоўніцтве з расейскімі вайскоўцамі, што зьдзяйсьнялі збройную агрэсыю. Зараз на тэрыторыі Беларусі таксама знаходзяцца расейскія войскі, чыя фактычная мэта прыбыцьця дакладна невядомая і можа быць зьвязаная з намерамі Расеі па анэксіі Беларусі. Таксама як невядомая і фактычная мэта прыбыцьця ў Беларусь людзей з «Крымскага казачага палку».

Служба маніторынга беларускай рэдакцыі InformNapalm