Напачатку красавіка гэтага году на палігоне, які знаходзіцца ля пасёлку Кадамаўскі Навачаркаскага раёну Растоўскае вобласьці, праходзіла выстава на якой былі прадэманстраваныя ўзоры сучаснай тэхнікі, што паступаюць на ўзбраеньне Нутраных войскаў МУС Расеі.

Выстава тэхнікі і ўзбраеньня праходзіла на фоне апэратыўна-стратэгічных вучэньняў Нутраных войскаў МУС РФ “Заслон-2015”.

На выставе прысутнічалі больш за пяцьсот гасьцей – камандаваньне рэгіянальных НВ МУС, прадстаўнікі ворганаў мясцовага самакіраваньня, кіраўнікі сілавых структураў і спэцслужбаў Растоўскае вобласьці, Краснадарскага краю і акупаванага Крыма.

Сярод прадстаўленых узораў тэхнікі, былі і найноўшыя расейскія бронеаўтамабілі вытворчасьці “КамАЗ”, “УРАЛ”, “ГАЗ”, фатаздымкі якіх атрымалася знайсьці праз сацсеткі.

Крыху пазьней, удзельнікам каманды “ІнформНапалм”  @BuTaJIu4eK  у Растоўскай вобласьці былі зафіксаваныя расейскія “MRAP”-“УРАЛ”-ы, якія транспартавалі на чыгуначным эшалёне.  І ўсяго некалькі дзён таму, некалькі такіх бранявікоў і іншая тэхніка Нутраных войскаў “засьвяцілася” у акупаваным Крыму  відавочна не для дэманстрацыі на выставах.

Нагадаем, што ў раёне палігону “Кадамаўскі” раскватараваныя ня толькі Нутраныя войскі. Паводле наяўных дадзеных, расейскае вайсковае камандаваньне ў раёне палігону “Кадамаўскі” абсталёўвае вялікі базавы палявы лягер з неабходнай інфраструктурай, дзе ў цяперашні момант базуецца некалькі батальённа-тактычных групаў Паўднёвае вайсковае акругі.

Аўтар: Іраклі Камахідзэ

(с) Інфармацыя падрыхтаваная адмыслова для сайта InformNapalm, падчас перадруку й выкарыстаньня матар’ялу спасылка на аўтара і наш праэкт абавязковая.

Пераклад Дзяніса Івашына