Падчас OSINT-выведкі ў раёне Канцяміраўкі Варонежскай вобласьці, якая непасрэдна мяжуе з паўночна-усходнім раёнам Луганскай вобласьці Украіны, зафіксаваны нядаўна разгорнуты палявы лягер ЗС РФ.
Атрымалася выявіць, што ў лягеры сканцэнтраваныя падразьдзяленьні і спэцтэхніка расейскіх чыгуначных войскаў, у тым ліку з складу:
– 29-га асобнага чыгуначнага рамонтнага батальёну ЦВА (в/ч 30623, Омская вобл., Таўрычаскі р-н, ст.Страла)
– 37-й асобнай чыгуначнай брыгады ПВА (в/ч 51473, г. Валгаград, шаша Авіятараў).

Варта адзначыць, што яшчэ ў сьнежні 2014 году, у раёне Канцяміраўкі намі была зафіксаваная выгрузка расейскіх танкаў.
Гэты запіс быў дададзены нашым сябрам Дмітро (Demien Amorales), які таксама зьяўляецца аўтарам постэру што да чыгункі. Па тэрыторыі Украіны праходзіць 32-х кілямэтровы вучастак расейскай чыгункі – РЖД, які злучае Маскву з Растовам і Каўказам, але які ня злучаны з чыгуначнай сеткай Украіны. Вучастак чыгункі, што йдзе з Канцяміраўкі на Поўдзень РФ ёсьць праблемным і стратэгічна вельмі важным для Расеі.
Праз гэты вучастак з цэнтральнае Расеі ў Растоўскую вобласьць йдуць ня толькі пасажырскія цягнікі ў Сочы, Адлер і Анапу, але й вайсковыя эшалёны з танкамі, якія потым разгружаюцца ля мяжы з Украінай у Мілераве, Каменск-Шахцінску, Навашахцінску, Навачаркаску дзеля наступнага іх перакідваньня ва Украіну. Да гэтага часу украінскія улады не зрабілі аніякіх заяваў што да гэтага, ня кажучы ўжо пра задзейнічаньне адпаведных захадаў.
Будаўніцтва дадзенага абыходнага вучастку РЖД расейскі бок не хавае, гэтак 25 красавіка гэтага году намесьнік міністра абароны Дзьмітрый Булгакаў заявіў, што ў працах, якія распачаліся, ўдзельнічаюць каля 900 чалавек асабовага сладу і 360 адзінак адмысловай тэхнікі. Гаворка йдзе пра будаўніцтва чыгуначнай лініі Прохараўка – Жураўка – Чарткова – Батайск (новая чыгуначная лінія ў накірунку Жураўка – Мілерава), больш падрабязна ў спасылцы.

Застаецца спадзявацца, што гэтая будоўля стагодзьдзя, гэты данскі БАМ, з прыцягненьнем бясплатнае працоўнае сілы ў выглядзе чыгуначных войскаў, не для адводу вачэй. З гэтага вынікае, што вучастак РЖД, які праходзіць па тэрыторыі Украіны, рэальна “накрываецца медным тазам”. Да таго ж ад неадэкватнай РФ можна чакаць на “сюрпрызы”, напрыклад расейцы могуць запатрабаваць кампэнсацыю і дазволу іхным чыгуначным войскам разабраць вучастак РЖД на тэрыторыі Украіны – рэйкі-рэйкі, шпалы-шпалы – гэта ўсё Шайгу на дачу!

 Іраклі Камахідзэ

(с) Інфармацыя падрыхтаваная адмыслова для сайта InformNapalm, падчас перадруку й выкарыстаньня матар’ялу спасылка на наш праэкт абавязковая.

Пераклад Дзянicа Iвашына