Наконадні камандуючы групоўкай войскаў РФ у Сірыі прызнаў удзел расейскага спэцназу ў наземнай апэрацыі ў Сірыі, які нібы задзейнічаны дзеля дадатковай выведкі аб’ектаў для зьдзяйсьненьня авіяўдараў. Цікава, калі РФ прызнае наяўнасьць у Сірыі ня толькі спэцназу, але й даволі буйной зводнай групоўкі войскаў у складзе Марское пяхоты ВМФ і Сухапутных войскаў з 3-х вайсковых акругаў – гаўбічных і рэактыўных артылерыйскіх дывізыёнаў, ротна-тактычных групаў з складу цяжкіх і лёгкіх мотастралковых брыгадаў, падразьдзяленьняў РХБА, сэгмэнту кіраваньня і забесьпячэньня і шмат іншага, што фіксуе нашая супольнасьць InformNapalm з пачатку восені 2015 году?

На гэтым фоне, расейскія СМІ падаюць інфармацыю, пра тое, што Сірыйскія ўрадавыя войскі Башара Асада адбілі ў баявікоў тэрарыстычнае групоўкі «Ісламская Дзяржава» гістарычную фартэцыю Пальміра ў раёне населенага пункту Тадмор (правінцыя Хомс).

«Зараз у аазе Сірыйскае пустэльні, у якой знаходзіцца Пальміра, працягваюцца жорсткія баі. Урадавая армія ўсталявала таксама кантроль над пагоркам Сірыатэль, непадалёк Пальміры, і над шэрагам іншых пагоркаў вакол горада Тадмор».

Але гэта не адпавядае рэчаіснасьці. Паводле фотаматар’ялаў, якія мы атрымалі ў выніку выведкі профіляў сацыяльных сетак расейскіх вайскоўцаў, расейскія сухапутныя войскі (але не спэцназ, як заяўлялі крамлёўскія генэралы) непасрэдна ўдзельнічаюць у гэтых баёх. У прыватнасьці, гэта выведпадразьдзяленьне 20-й асобнай мотастралковай брыгады (в/ч 22220, мейсца дысьлякацыі Валгаград, Паўднёвая вайсковая акруга), якое было нядаўна перакінутае ў Сірыю.

Фатаздымкі з зоны баявых дзеяньняў, выкладзеныя ў профілі вайскоўца гэтага падразьдзяленьня нейкага Сяргея Гаўрылава (архіў на профіль, фотаальбом). Большасьць фатаздымкаў зробленыя нядаўна, частка зь іх мае наўмысныя скажэньні, каб ускладніць апазнаньне расейсіх вайскоўцаў, бо яны сьведчаць пра іхную прысутнасьць пад Пальмірай.

Сірыя

Валгаград

Аўтар матар’ялу Іраклі Камахідзэ.

На беларускую мову пераклаў Дзяніс Івашын.

(CC BY 4.0) Інфармацыя падрыхтаваная адмыслова для сайту InformNapalm.org, падчас поўнага або частковага перадруку й выкарыстаньня матар’ялу наўпроставая спасылка на аўтара і наш праэкт абавязковая.

Мы заклікаем чытачоў актыўна пашыраць нашыя публікацыі ў сацыяльных сетках. Наданьне матар’ялам расьледаваньняў шырокае агалоскі здатнае зьмяніць хаду інфармацыйнага і баявога супрацьстаяньня з Крамлём. Разам пераможам!