Міжнародная выведвальная супольнасьць InformNapalm атрымала неабвержныя доказы апэрацыі, у выніку якой украінскія хактывісты ўзламалі Суркова.

24 кастрычніка 2016 г. паведамленьні пра ўзлом украінскімі хактывістами ліставаньня памочніка прэзыдэнта РФ Уладзіслава Суркова былі зробленыя большасьцю ўкраінскіх і расейскіх СМІ. Чытачы па-рознаму паставіліся да гэтай інфармацыі: некаторыя лічаць непераканаўчай скан-копію дакуманту, пададзеную ў анонсе на сайце cyberhunta.com.

25 кастрычніка 2016 г. на гэтыя паведамленьні адрэагаваў і афіцыйны Крэмль. Прэс-сакратар прэзыдэнта РФ Дзьмітры Пяскоў [aka «Говорящие усы», рас.] досыць няпэўна адказаў на пытаньне журналістаў. Ён не абверг узлом пошты памочніка расейскага прэзыдэнта, назваў Суркова «таленавітым чалавекам, якому шмат прыпісваюць».

Пасьля шматлікіх запытаў чытачоў супольнасьць InformNapalm зьвярнулася непасрэдна да кібэральянсу хакерскіх групаў CyberHunta, FalconsFlame, RUH8 і TRINITY каб  атрымаць дадатковую інфармацыю, доказы й тлумачэньні.

У выніку хактывісты падзяліліся новай інфармацыяй і перадалі файл дадзеных Microsoft Outlook (.pst) паштовае скрыні prm_surkova@gov.ru з памерам да 1ГБ (дамп RUH8, дамп на Google.Drive).

(Дарэчы, у арсэнале хакераў кібэральянсу маюцца дадзеныя і на Пяскова, атрыманыя падчас узлому сьпісу адрэсаў памочнікаў і клеркаў з адміністрацыі прэзыдэнта РФ, але іхная публікацыя выходзіць за межы гэтага артыкулу).

У выніку зьдзейсьненай спэцапэрацыі хактывісты атрымалі доступ да паштовай скрыні прыёмнай Уладзіслава Суркова prm_surkova@gov.ru, а таксама да ПК, які знаходзіцца непасрэдна ў прыёмнай памочніка расейскага прэзыдэнта.

Для шырокай грамадзкасьці хактывісты выклалі дамп матар’ялаў з верасьня 2013 па лістапад 2014 году. Акурат у гэты час адбыліся асноўныя падзеі актыўнай фазы разгортваньня крамлёўскага праэкту так званай «наваросіі».

Матар’ялы з 2015 па 2016 гады перададзеныя для аналізу спэцслужбам і ня могуць быць апублікаваныя праз апэратыўную каштоўнасьць.

У ліставаньні маецца падрабязная інфармацыя пра бізнэс- [1, 2] і мэдыя-інтарэсы Расейскай Фэдэрацыі ва Украіне і, у прыватнасьці, на акупаваных тэрыторыях; пра рызыкі эканамічнай блякады «ДНР» і «ЛНР»; поўныя сьпісы й кантактныя дадзеныя супрацоўнікаў Упраўленьня прэзыдэнта РФ у сацыяльна-эканамічным супрацоўніцтве; дадзеныя й кантакты так званага кіраўніцтва самаабвешчанай «Рэспублікі Абхазія» (РА); тэмнікі для зьдзяйсьненьня агентурнай працы з «ключавымі фігурамі РА» і шмат іншага.

Цікава, што ў матар’ялах ліставаньня выяўленыя нават сканы пашпартоў Уладзіслава Суркова й чальцоў ягонае сям’і. Апроч гэтага, таксама ёсьць старонкі сканаў шэнгенскіх візаў ва ўсіх пашпартах (дадатак PDF).

[Уладзіслаў Суркоў пашпарт.pdf, шэнген.pdf, сын Суркова (Раман) пашпарт.pdf, шэнген.pdf, жонка Суркова (Натальля Дубавіцкая) пашпарт, шэнген, дачка Суркова (Марыя) пашпарт, шэнген].

Нагадаем, што Уладзіслаў Суркоў быў унесены ў санкцыйныя сьпісы ЭЗ і ЗША ў сакавіку 2014 году; яму забаронены ўезд у краіны Эўразьвязу й ЗША. Тым ня менш, нядаўна адбыўся скандал з прычыны суправаджэньня Пуціна Сурковым на сустрэчы «нармандскай чацвёркі» ў Бэрліне.

---

 (CC BY 4.0) Інфармацыя падрыхтаваная адмыслова для сайту InformNapalm.org, падчас поўнага або частковага перадруку й выкарыстаньня матар’ялу наўпроставая спасылка на аўтара і наш праэкт абавязковая.

Заклікаем чытачоў актыўна пашыраць нашыя публікацыі ў сацыяльных сетках, на форумах і СМІ. Наданьне матар’ялам расьледаваньняў шырокае агалоскі здатнае зьмяніць хаду інфармацыйнага і баявога супрацьстаяньня з Крамлём.