У выніку новага “гібрыднага” расьледаваньня валантэры InformNapalm.org зафіксавалі прысутнасьць вайскоўцаў расейскай вайсковай часткі 02901 (пункт сталай дысьлякацыі: Амурская вобл., г.Белагорск-15, ш.Нікольскае) з 165-й артылерыйскай брыгады (поўнае найменьне: 165-я артылерыйская Пражская Красназнамённая ордэнаў Кутузава і Багдана Хмяльніцкага брыгада) на тэрыторыі Украіны ў раёне пгт.Сядова (Наваазоўскі раён Данецкае вобласьці, на Крывой Касе за 58 км ад Марыюпалю).

Гэтае расьледаваньне ўмоўна названае “гібрыдным”, бо яно ўтрымлівае ня толькі дадзеныя, якія атрыманыя з профілю расейскага вайскоўца ў сетцы Instagram праз зьдзяйсьненьне OSINT-дасьледаваньня, але й грунтуецца на інфармацыі ад інсайдэраў з акупаваных тэрыторыяў.

У выніку паездкі інфарматараў InformNapalm ў Наваазоўск, зафіксаваная наяўнасьць значнае колькасьці  вайскоўцаў у населеным пункце Сядове. Гэта спрычынілася да рашэньня зьдзейсьніць наступную дадатковую выведку ў сацыяльных сетках дзеля выяўленьня асобаў з складу кадравых расейскіх вайскоўцаў на пазначанай тэрыторыі. Падчас маніторынгу быў выяўлены профіль кантрактніка 165-й артылерыйскай брыгады Усходняе вайсковае акругі РФ Віктара Салаўёва, які зьмясціў свае фота з геатэгам “н.п. Сядова” (з заархіваваным акаўнтам можна азнаёміцца ў спасылцы: https://archive.is/mDTlm).

Вызначыць найменьне падразьдзяленьня, да якога належыць аб’ект маніторынгу, атрымалася з дапамогаю ідэнтыфікацыі нарукаўнага шаўрону, малюнак якога выразна бачны на некалькіх фатаздымках Віктара Салаўёва. Таксама факт слушнага вызначэньня падразьдзяленьня пацьверджаны праз відэа з назовам: “Дзень перамогі ў гар. Парку, г.Белагорск”, якое таксама выкладзенае ў профілі гэтага расейскага вайскоўца.

Таксама, варта зазначыць, што шлях з Белагорска ва Украіну ляжыць праз населены пункт Улан-Удэ, дзе знаходзіцца вузлавая станцыя, на якой аб’ект расьледаваньня зрабіў “сэлфі” і выклаў у сваім профілі.

Зь якой прычыны вайсковае кіраўніцтва РФ перакідвае для ўдзелу ў баявых дзеяньнях вайскоўцаў Усходняе вайсковае акругі пакуль невядома. Мо ў эўрапейскай частцы РФ баяздольныя падразьдзяленьні ўжо скончыліся і заходнія інтарэсы імпэрыі больш няма каму адстойваць? Ці не таму на Далёкім Усходзе для аховы дзяржаўнай мяжы РФ пакідваюць манэкенаў, бо ахоўваць межы ад усходняга суседу ўжо ня трэба – усё і так прададзенае…

Нагадаем, што 24 жніўня 2015 году кітайскае інтэрнэт-выданьне Хуаньцю апублікавала фатаздымкі, якія былі зробленыя падчас візыту журналістаў на будоўлю маставога чыгуначнага пераходу  Ніжнеленінскае-Тунцзян праз Амур. Адзін з рэпартэраў заўважыў, што на памежнай назіральнай  вышцы з расейскага боку ўсталяванае пудзіла, якое апранутае ў форму вартавога.

(с) Матар’ял падрыхтавалі Арцём Васіленка і Arc Bond адмыслова для InformNapalm.org. Падчас перадруку й выкарыстаньня матар’ялу спасылка на аўтараў і наш праэкт абавязковая.

Пераклад Дзяніса Івашына