17 траўня 2019 году ў г. Баранавічы Берасьцейскае вобласьці прыбыла падразьдзяленьне Збройных сілаў Расейскай Фэдэрацыі. Жаўнераў дзяржавы-агрэсара зафіксаваў побач з цэнтральным уваходам у чыгуначны вакзал “Баранавічы Палескія” мясцовы грамадзкі актывіст Уладзімер Гундар.

Паводле сьведчаньня Гундара мінакі, якія праходзілі побач, пыталіся ў расейскіх вайскоўцаў, што яны тут робяць, а таксама заўважалі, што падобным чынам у 1941 годзе тут фатаграфаліся жаўнеры Вэрмахта. На заўвагу расейскага афіцэра, навошта актывіст зьдзяйсьняе фотафіксацыю, Уладзімер Гундар адказаў, што яму гэта патрэбна і ён знаходзіцца ў сябе дома, на што камандыр расейскага падразьдзяленьня заявіў, што і яны знаходзяцца дома.

Грамадзкі актывіст таксама выказаў меркаваньне, што беларусы выступаюць супраць прысутнасьці расейскіх войскаў на тэрыторыі Беларусі.

Цалкам мажліва, расейскае падразьдзяленьне прыбыла ў Баранавічы для далейшага транспартаваньня на 474-ы асобны радыётэхнічны вузел «Ганцавічы» (в/ч 03522, пас. Азярэчча Менскай вобл., месьціцца за 40 км ад Баранавічаў), дзе дысьлякуецца радыёлякацыйная станцыя папярэджаньня пра ракетны напад 70М6 «Волга» Касьмічных войскаў ПКС Расейскай Фэдэрацыі.

Інфармацыю, фота- й відэафіксацыю што да перасоўваньня расейскай арміі па тэрыторыі Беларусі просьба паведамляць на адрэсу беларускай службы InformNapalm у Фэйсбуку: facebook.com/by.informnapalm.org.

Аддзел маніторынгу беларускае службы
міжнароднае выведвальнае супольнасьці InformNapalm.

У матар’яле выкарыстаныя фатаздымкі Уладзімера Гундара.

Пашырэньне й перадрук з спасылкаю на крыніцу вітаюцца!
(Creative Commons — Attribution 4.0 International — CC BY 4.0 )

Рабіце рэпост і дзяліцеся зь сябрамі.
Падпісвайцеся на старонкі супольнасьці InformNapalm у Фэйсбук / Твітэр / Telegram
і апэратыўна атрымлівайце інфармацыю пра новыя матар’ялы.