Тэму падразьдзяленьняў спэцназу ГРУ Расеі, якія дзейнічаюць ва Украіне, мы асьвятлялі і раней, але найбольш актыўна пра гэта пачалі казаць пасьля таго, як у палон ў Луганскай вобласьці патрапілі два вайскоўцы з 3-й тальяцінскай брыгады і загінулі тры вайскоўцы з 16-й тамбоўскай брыгады СпН.

Падчас OSINT-выведкі, якую зьдзейсьніла каманда InformNapalm, былі выяўленыя вайскоўцы 2-й брыгады спэцпрызначэньня ГРУ (в/ч 64044, Пскоў), якія дзейнічаюць на Марыюпальскім напрамку.

Гэтак, у сацсеціве “Укантакце” быў выяўлены фатаздымак з геаграфічнай пазнакай (геатэг) “Наваазоўск, Украіна”, які неўзабаве быў прыбраны. Аднак мы пасьпелі захаваць анлайн скрыншот ў архіве https://archive.is/aKOZN. З дасьледаваньня профілю карыстальніка вынікае, што старонка належыць нейкаму Мікалаю Сямёнаву (https://vk.com/id106286742), ветэрану ЗС РФ, які пасьпеў прыняць удзел у агрэсыі супроць Грузыі ў 2008 годзе.

У фатаальбоме Н.Сямёнава ёсьць багата фатаздымкаў, якія сьведчаць пра ягоную прыналежнасьць да спэцпадразьдзяленьня, збольшага гэта адметныя знакі ПДВ (якія часта выкарыстоўваюць у СпН ГРУ, каб прыхаваць сваю прыналежнасьць), спэцыфічнае ўзбраеньне (сучасная зброя або ўжо выведзеная з узбраеньня, якую, тым ня менш, спэзназаўцы працягваюць выкарыстоўваць і сёньня), таксама фота з шаўронам 61-й брыгады марской пяхоты Паўночнага флота (?). Але найбольш цікавае фота зробленае на тле нефармальнага сьцягу 2-й брыгады спэцпрызначэньня ГРУ, у якой Н.Сямёнаў зьяўляецца ветэранам і дзеючым вайскоўцам. Пра прыналежнасьць Сямёнава да 2-й брыгады ўскосна сьведчаць і іншыя дадзеныя: гэта кола сяброў-вайскоўцаў з Пскова, у чыіх анкетных дадзеных няшмат інфармацыі і твары збольшага прыхаваныя. Адным з такіх “сяброў” ёсьць Мікіта Пятроў (https://vk.com/id96938938), фатаздымак якога зь лютага 2015 году сьведчыць пра тое, што ён разам з Н.Сямёнавым знаходзіўся на Данбасе.

Мы разумеем, што гэтыя дадзеныя ня надта прэтэндуюць на доказавую базу, як таго хацелася б, што можа стацца падставай для дэмагогіі з боку скептыкаў. Але людзі, якія насамрэч займаюцца OSINT і выяўленьнем фактаў расейскай агрэсыі, цалкам мажліва, пагодзяцца з нашай пазыцыяй. Калі пазначаныя дадзеныя з анкетаў спэцназаўцаў 2-й брыгады з Пскова будуць актыўна выдаляцца, то гэта будзе відавочным сыгналам, што пачалося замятаньне сьлядоў, калі ж яны застануцца бязь зьменаў, зь іх таксама будуць вынятыя раней выдаленыя фатаздымкі. Выбар невялікі.

Глядзіце тэматычныя спасылкі:

– 2-я асобная брыгада спэцыяльнага прызначэньня ГРУ ва Украіне

– 2-я асобная брыга СпН ГРУ РФ, якая дзейнічае ва Украіне

Матар’ял да публікацыі падрыхтавалі: Іраклі Камахідзэ і krmvictory

(с) Інфармацыя падрыхтавана спецыяльна для сайта InformNapalm, пры перадруку і выкарыстанні матэрыялу спасылка на наш праект абавязковая.

Пераклад Дзяніса Івашына