20 чэрвеня 2016 г. а 09:20 паводле маскоўскага часу на расейскім вайсковым палігоне Ашулук у Астраханскае вобласьці здарыўся пажар, які спрычыніўся да выбухаў. Інфармацыю пра наступствы гэтай падзеі расейскія спэцслужбы намагаюцца абмяжаваць.

Спачуваем аднаму з працаўнікоў ТАА «ФНК «Інжынырынг», які першым выклаў у Youtube відэа выбуху на палігоне Ашулук. Працаўнікі гэтай падраднай фірмы прымаюць удзел у будаўніцтве вайсковых аб’ектаў на палігоне.

З дапамогаю фатаздымкаў, якія патрапілі ў адкрыты доступ, удалося вызначыць дакладнае мейсца інцыдэнту й тэхніку, якая была зьнішчаная праз пажар і выбухі боепрыпасаў.

На пададзеных фота й картаграфічных матар’ялах можна пабачыць дакладнае разьмяшчэньне зьнішчанае тэхнікі на так заванай пазыцыі «Кама».

Гэта радыёлякацыйная станцыя выяўленьня (РЛВ) 5Н64С (каштуе каля 40 млн usd), якая ўваходзіць у комплекс С-300ПТ, і згарэлыя ўстаноўкі аўтаномнага энэргазабесьпячэньня гэтай станцыі.
У фота засьведчаныя наступствы выбухаў і пажару на палігоне Ашулук.

Зь вялікай ступеньню верагоднасьці можна меркаваць, что наступствы пажару й выбухаў вельмі вялікія, як у матар’яльным значэньні, гэтак і ў вайсковым праз значныя страты ўзбраеньня й тэхнікі.

Афіцыйная вэрсія МА РФ – «узгараньне стартавага рухавіку ракеты комплексу ЗРК С-75». Цалкам мажліва, але расейскія вайскоўцы не захацелі дадаць, што апроч гэтага рухавіку на палігоне «ўзгарэліся» і дзясяткі маршавых ступеньняў ракетаў С-75, якія захоўваліся на адной пляцоўцы.

Складана таксама паверыць у тое, што няма ахвяраў сярод вайскоўцаў ЗС Расеі. За 300 мэтраў на поўнач ад эпіцэнтру выбуху знаходзілася памяшканьне варты й будынак падрыхтоўкі паветраных мішэняў на базе ракетаў састарэлых савецкіх ЗРК. Бяручы пад увагу плошчу й колькасьць аб’ектаў на пазыцыі «Кама», варту меліся зьдзяйсьняць мінімум 20-25 жаўнераў, сяржантаў і афіцэраў.

Паводле дадзеных выданьня «Кавказский узел», на палігоне Ашулук у 2011-2012 гадох падчас утылізацыі боепрыпасаў ужо была падобная сытуацыя, падчас якой загінулі вайскоўцы. Пра гэта нагадаў палкоўнік у запасе, экспэрт  у прававых пытаньнях Камітэта маці жаўнераў Астраханскае вобласьці Анатоль Салін, камэнтуючы відэа з 20.06.2016 г.: «Паводле відэа вынікае, што адлегласьць да мейсца выбуху некалькі кілямэтраў. Абломкі і аськепкі ляцелі наўпрост да людзей. Яны выбягалі й крычэлі: «Сыходзь, сыходзь!» – баючыся аськепкаў. Можна толькі здагадвацца, што адбывалася там, у гэтым пекле».

У зьвязку з гэтым нагадваем пра пажар з выбухамі ў красавіку 2015 году ў палявым лягеры расейскае групоўкі ў ваколіцах палігону Кузьмінскі Няклінаўскага раёну Растоўскае вобласьці. Тады здарыўся пажар, які спрычыніўся да выбуху боепрыпасаў у мейсцы палявой дысьлякацыі 67-й зэнітна-ракетнай брыгады.

Матар’ял да публікацыі падрыхтаваў Кузьма Тутаў адмыслова для InformNapalm.

На беларускую мову пераклаў Дзяніс Івашын.

 (CC BY 4.0) Інфармацыя падрыхтаваная адмыслова для сайту InformNapalm.org, падчас поўнага або частковага перадруку й выкарыстаньня матар’ялу наўпроставая спасылка на аўтара і наш праэкт абавязковая.

Заклікаем чытачоў актыўна пашыраць нашыя публікацыі ў сацыяльных сетках, на форумах і СМІ. Наданьне матар’ялам расьледаваньняў шырокае агалоскі здатнае зьмяніць хаду інфармацыйнага і баявога супрацьстаяньня з Крамлём.