Валянтэры міжнароднай супольнасьці InformNapalm з каманды InformNapalm Беларусь правялі OSINT-расьледаваньне і высьвятлілі, як Расейская Федэрацыя выкарыстоўвае спорт для людзей з абмежаванымі магчымасьцямі і зьвязвае такім чынам гібрыднымі сеткамі самапрызначанага кіраўніка Беларусі Аляксандра Лукашэнка і часова акупаваныя РФ тэрыторыі на ўсходзе Украіны. Таксама артыкул выяўляе схемы незаконнага вывазу дзяцей з АРДЛА ў РФ і Беларусь пры дапамозе расейскіх тэрарыстаў.

Увесну 2021 года пачалася гісторыя, якая дайшла да свайго разьвязаньня толькі ў верасьні бягучага году. Спартовец, удзельнік нацыянальнае каманды Беларусі па інваспорце, а з сакавіка бягучага году яшчэ і ўдзельнік «Канстытуцыйнай камісыі па падрыхтоўцы зьменаў у Канстытуцыю Беларусі» Аляксей Талай, мяркуючы паводле здымкаў у ягоным акаўньце «ўкантакце», 30 красавіка паехаў на часова акупаваную расейскімі войскамі і іх гібрыднымі бандфармаваньнямі тэрыторыі Украіны. Ён знаходзіўся там да 5 траўня (акаўнт “укантакце”, вэб-архіў). Падчас сваёй паездкі ён у якасьці «ганаровага госьця» быў на спаборніцтвах ў плаваньні сярод асобаў з абмежаванымі магчымасьцямі.

На згаданых спаборніцтвах прысутнічалі таксама Уладзімір Антонаў, які ў расейскай тэрарыстычнай групоўцы «ДНР» займае пасаду «намесьніка старшыні Ураду ДНР», ды баявік, былы ўдзельнік банды «Пятнашка», які ў акупаваным Данецку захапіў буйную сетку прадуктовых крамаў «АТБ», выхадзень з Абхазыі Ставрас («Ставрык») Багатэлія (акаўнт “укантакце”, вэб-архіў). Зараз Багатэлія называе сябе «кіраўніком паралімпійскага камітэту ДНР» (спасылка, вэб-архіў).

Апроч таго, Аляксей Талай сустракаўся зь мітрапалітам Данецкім і Марыюпальскім Іларыёнам (УПЦ Маскоўскага патрыярхата), а таксама з т.зв. «адміністрацыяй», якая разьмесьцілася ў захопленым будынку ў горадзе Ясінуватая Данецкае вобласьці Ўкраіны (вэб-архіў).

Пры гэтым на абедзьвюх сустрэчах яго суправаджаў чалавек, якога сам Аляксей Талай у сваіх допісах і інтэрвью называе проста «верны сябар». Прозьвішча гэтага чалавека Талай нідзе ня згадвае.

На здымку яны знаходзяцца на ганку захопленага баевікамі будынку ў Ясінуватай (вэб-архіў).

Хто такі «верны сабар» Аляксея Талая?

Удалося высьвятліць, што гэты чалавек – Уладзімір Казбанаў, паводле адукацыі – лекар, які цяпер займаецца арганізацыйнай дзейнасьцю накшталт «збору новых ідэяў з розных сфэраў навукі». Ён заснаваў дзьве арганізацыі – «Центр поддержки предпринимательства ООО «Лаборатория интеллекта»» (арганізацыя аформленая на ягоную жонку – Сьвятлану Казбанаву) ды «Центр молодёжных инноваций». У 2010 годзе Казбанаў езьдзіў на расейскі моладзевы форум «Селигер», пасьля чаго, у размове зь інтэрнэт-выданьнем «Союзное Вече», загаварыў пра т.зв. «інтэграцыю Беларусі і Расеі» як пра мэту, якой ён плянуе дабівацца (вэб-архіў).

А ўжо ў 2012 годзе на ягонай старонцы зьяўляецца здымак, з загалоўкам: «в главном офисе Россотрудничества» (вэб-архіў).

А ў 2015 годзе Уладзімір Казбанаў як арганізатар дыскусыйнага клюбу пад назовам «Вызовы глобализации. Гуманитарный кризис. СНГ» запрасіў туды прадстаўнікоў «НОД Белоруссия», пра што яны паведамілі на сваёй старонцы (вэб-архіў).

То бок, Казбанаў доўгі час актыўна падтрымліваў кантакты з расейскімі структурамі, накіраванымі на прасоўваньне «русскага міра» в Украіне і Беларусі.

Неўзабаве пасьля сваёй паездкі, 27 траўня, падчас прэс-канферэнцыі Аляксандра Лукашэнкі (час на відэазапісу 2:09:07), Аляксей Талай прапанаваў «наладзіць сацыяльные сувязі і гуманітарную місыю на Данбасе». Лукашэнка адказаў літаральна наступнае: «Лічы, што вырашылі. Па вядомым табе канале паспрабуй перадаць свае прапановы» (вэб-архіў). То бок, мяркуючы паводле гэтай размовы, на той момант Аляксей Талай разам зь «верным сябрам» Уладзімірам Казбанавым ужо наладзілі сувязі з прадстаўнікамі тэрарыстычных груповак у АРДЛА, падкантрольных Расейскай Федэрацыі.

А 17 жніўня Аляксей Талай на старонцы фонду свайго ймя ў інтарнэце, дзе раней разьмяшчаліся некалькі ягоных дабрачынных праэктаў, пачынае збор сродкаў з мэтай, задэкляраванай як «спачатку прывезьці дзяцей-інвалідаў на рэабілітацыю ў Беларусь, потым прывезьці на аздараўленьне дзяцей-сіротаў і дзяцей зь бедных сем’яў, а пасьля таго збраць ды прывезьці дапамогу (прадукты, сродкі гігіены, тэхніку, адзеньне) наўпрост да іх». На дадзены момант збор сродкаў спынены (вэб-архіў).

Пры гэтым доступ да сродкаў, пералічаных па ўказаных на старонцы «Фонду Талая» рэквізітах, меў, а значыць, і мог распараджацца імі, Уладзімір Казбанаў. Пра гэта сьведчаць ягоныя камэнтары на старонцы Аляксея Талая у сацсетцы Facebook, дзе ён некалькі разоў называў дакладную суму сродкаў, збраных на канкрэтную дату (спасылка).

Магчыма, ў сьхеме задзейнічаны таксама Алег Дадонаў, які з 2015 году жыве ў Беларусі, а да таго жыў у Луганскае вобласьці Ўкраіны. Дадонаў занесены ў базу Цэнтра «Міратворац».

Пра ягоны ўдзел можа сьведчыць камэнтар пад допісам Аляксея Талая, ў якім Дадонаў піша, што ёсьць аналягічны «праэкт» адносна асобных акупаваных раёнаў Луганскае вобласьці (вэб-архіў).

Паводле словаў Алега Дадонава вядома, што ён падаў дакуманты для атрыманьня грамадзянства Беларусі ў сувязі з заявай Лукашэнкі пра спрошчаны парадак атрыманьня грамадзянства «перасяленцамі з раёну канфлікту на паўднёвым усходзе Украіны» (вэб-архіў).

Указ Лукашэнкі, які спрыяе вывазу дзяцей з АРДЛА

Кульмінацыя апісаных вышэй дзеяньняў адбылася толькі ўвосені. 15 верасьня на старонцы ў інтарнэце, дзе публікуюцца ўказы і распараджэньні Аляксандра Лукашэнкі, зьявілася распараджэньне «пра арганізацыю адпачынку дзяцей з Данецкае вобласьці ў дзяржаўным дзіцячым аздараўленчым цэнтры «Зубронак»» (вэб-архіў). Нягледзячы на тое, што была выкарыстаная фармулёўка проста «Данецкая вобласьць», разьвіцьцё падзеяў паказала, што гаворка ў распараджэньні ідзе выключна пра акупаваную частку Данецкае вобласьці Украіны.

І ў той жа дзень, з розьніцай у некалькі гадзінаў пра адпраўку дзяцей у Беларусь напісалі і на сайце баевікоў з тэрарыстычнае групоўкі, якая дзейнічае на тэрыторыі окупаваных РФ асобных раёнаў Данецкай вобласьці Украіны.

Па-першае, такое паведамленьне зрабіла так званае «міністэрства транспарту ДНР», паводле інфармацыі на старонцы якога 13 верасьня былі выдзеленыя аўтобусы для перавозкі 200 дзяцей і 16 суправаджаючых іх асобаў у Растоўскую вобласьць, каб потым перасесьці на цягнік Адлер-Мінск (вэб-архіў). Дарэчы, дата 13 верасьня ўказвае ня толькі на тое, што ўсё было значна раней падрыхтаванае, але і на тое, што ў момант публічнага абвяшчэньня «арганізацыі адпачынку» дзеці ўжо на цягніку пад’яжджалі да Менску.

Па-другое, пра адпраўку дзяцей абвесьціў на сваёй старонцы так званы «намесьнік старшыні Ураду ДНР» Уладзімір Антонаў (вэб-архіў).

Вольга Волкава, кіраўніца арганізацыі для дзяцей-інвалідаў «Дэльфіны», што знаходзіцца ў акупаваным Данецку (акаўнт “укантакце”, вэб-архіў; акаўнт у “ОК”, вэб-архіў), 16 верасьня на сваёй старонцы ў сацсетцы «ўкантакце» падзякавала за адпраўку дзяцей, у тым ліку, Міністэрству замежных справаў Расеі і Мінадукацыі Беларусі (вэб-архіў).

Гэта можа значыць, што адным з каардынатараў, а мо нават галоўным ценевым каардынатарам гэтай задумы было Міністэрства замежных справаў РФ.

Дарэчы, ў навінах, што пачалі зьяўляцца ўжо пасьля прыбыцьця групы у Беларусь, указваецца крыху меншая колькасьць дзяцей у групе, а менавіта, каля 150.

І далёка ня ўсе адпраўленыя дзеці былі сіротамі ці інвалідам – сярод іх былі таксама вучні з данецкае ваенізаванае навучальнае ўстановы «кадэцкі корпус імя Захарчанкі», дзе фактычна рыхтуюць будучых баявікоў (старонка “ўкантакце”, вэб-архіў). Улічваючы тое, што групу дзяцей з суправаджальнікамі ўзначальвала Алёна Лявіцкая (акаўнт “укантакце”, вэб-архіў), якая займае пасаду кіраўніцы летніка пры гэтай установе імя баявіка і калябаранта Захарчанкі (спасылка, вэб-архіў), то магчыма, што менавіта «кадэты» былі асноўнай часткай згаданай групы.

Болей інфармацыі пра выкарыстаньне дзяцей з акупаваных тэрыторыяў у мілітарных праэктах Расейскай Федэрацыі чытайце ў спецтэме: Спецтема: «Юнармія» – російський «Путінюгенд» для нових війн.

Факт, што ўласна яна ўзначальвала групу, пацьвярджаецца таксама публікацыямі ў СМІ РБ (вэб-архіў).

У камэнтарох да допісу Вольгі Волкавай названыя тры асобы, якія, паводле камэнтатара, у найбольшай ступені паўдзельнічалі ў адпраўцы дзяцей у Беларусь – «Алексей, Ольга, Ставрос». Мяркуючы паводле той інфармацыі, якая ўжо вядомая, меліся на ўвазе Аляксей Талай, Вольга Волкава і Ставрас Багатэлія. Ёсьць верагоднасьць, што менавіта Багатэлія, з улікам ягонага статусу ў тэрарыстычнае групоўцы «ДНР», мог быць тым самым «каналам», зь якім кантактавалі Талай і Казбанаў, ды на які намякаў Лукашэнка падчас сваёй прэс-канферэнцыі ў траўні, і праз пасярэдніцтва якога зьдзяйсьняўся вываз дзяцей – дарэчы, у парушэньне законаў Украіны.

Апісаны вышэй ланцуг падзеяў паказвае, што паміж Лукашэнкам і вярхамі тэрарыстычнае групоўкі «ДНР» існуе сувязь, якая дазваляе ім хутка каардынаваць свае дзеяньні з дапамогай напрацаваных «каналаў», а кантралюе гэты працэс Расея.

Арганізацыя паездкі дзяцей на адпачынак выглядае шырмай для наладжваньня такіх сувязяў, у духу ўлюбёных прыёмаў агрэсыўнае палітыкі Расеі – прыкрывацца дзецьмі.

Такім чынам, «дзякуючы» паводзінам Лукашэнкі, Беларусь апынулася ўцягнутай у саўдзел у расейскай збройнай агрэсыі, якая зьдзяйсняецца пад выглядам дзейнасьці штучна створаных на акупаванай тэрыторыі Украіны псэўдадзяржаўных утварэньняў, так званых «ДНР-ЛНР».

Публікацыю падрыхтавала беларуская рэдакцыя международнай валянтэрскай супольнасьці InformNapalm. Распаўсюд і перадрук з спасылкай на крыніцу вітаецца! Старонкі супольнасьці InformNapalm у сацсетках: Facebook