Супрацоўнікі сілавых ведамстваў Беларусі выкарыстоўваюць ня толькі фізычны, але і псыхалягічны ціск на палітычных вязьняў рэжыма Лукашенкі. Дзеля гэтага задзейнічанюць усе магчымыя спосабы і ўчынкі: ня толькі сфабрыкаваныя матар’ялы і дыскрэдытацыя, а нават спэкуляцыя на трагічных падзеях і горы, якое адбылося ў сем’ях людзей. Так вядомага беларускага журналіста і рэдактара беларускай вэрсыі сайта міжнароднай валянтэрскай супольнасьці InformNapalm Дзяніса Івашына супрацоўнікі сілавых структур не адпусьцілі на пахаваньне ягонай бабулі, якая памерла 26 траўня.

Нагадаем, што журналіст Дзяніс Івашын  з 12 сакавіка знаходзіцца пад вартай  у сьледчым ізалятары ў Горадні па сфабрыкаваным супраць яго абвінавачаньні. Сьледзтва вядзе КДБ Беларусі. 12 сакавіка сілавікі з шматлікімі парушэньнямі правялі ператрусы ў кватэры журналіста і дома ў ягонай маці, а 15 сакавіка правялі ператрус таксама і ў хаце ў ягонай 95-гадовай бабулі. Дзяніс ужо больш за 2 месяцы знаходзіцца за кратамі С пачатку траўня, каб дадатковым чынам узьдзейнічаць на яго псыхалягічна, супрацоўнікі вязьніцы перавялі яго ў карцар на 7 содняў.

Як паведаміла маці журналіста — Людміла Івашына – такі псыхалягічны ціск не прамінуў без наступстваў і 26 траўня памерла бабуля Дзяніса. Ў гэты ж вечар Людміла Івашына патэлефанавала сьледчаму, які вядзе справу яе сына, і спытала, ці магчыма арганізаваць прысутнасьць Дзяніса на пахаваньні. Сьледчы адказаў катэгарычнае «не». На наступны дзень, ёй з схаванага нумару патэлефанаваў чалавек, прадставіўся «ад сьледчага», і паведаміў, што «яны параіліся і вырашылі адпусьціць Івашына на пахаваньне». Пры гэтым супрацоўнік двойчы ўдакладніў час і мейсца пахаваньня.

У дзень пахаваньня маці журналіста зноў патэлефанавала сьледчаму, каб удакладніць, ці будзе сын на пахаваньні, але сьледчы адказаў, што ня ён прымаў такое рашэньне і яго толькі паставілі перад фактам.

«Мы да апошняга ня ведалі, прывязуць Дзяніса ці не. Яго не прывезьлі. Дзяніс вельмі любіў бабулю і клапаціўся пра яе да самога свайго арышту. Яго ж нават забіралі зь лекамі, якія ён для яе набыў у аптэцы і зьбіраўся ёй везьці. Гэта бесчалавечнае стаўленьне — гуляць на такім горы і маніпуляваць. Але амаральнасьць некаторых супрацоўнікаў сілавых структураў нікога не зьдзіўляе», — сказала Людміла Івашына.

Дзяніс Івашын займаўся журналісцкімі расьледаваньнямі. У Беларусі супрацоўнічаў з выданьнем «Новы Час». За тыдзень да сайго арышту выпусьціў чарговае расьледаваньне пра тое, як колішнія украінскія супрацоўнікі расфармаванага спэцпадразьдзяленьня «Бэркут» пасьпяхова ўладкаваліся на службу да режыму Лукашенка. Сваякі і калегі лічаць, што затрыманьне Дзяніса Івашына зьвязанае менавіта з гэтым. Дзянісу высунутае абвінавачаньне паводле арт. 365 Крымінальнага кодэкса РБ — «Умяшальніцтва ў дзейнасьць супрацоўнікаў ворганаў нутраных спраў». Праваабарончыя арганізацыі прызналі, што Дзяніс Івашын зьяўляецца палітычным вязьнем і ягонае затрыманьне зьвязанае зь ягонай журналісцкай дзейнасьцю.

Пашырэньне й перадрук з спасылкаю на крыніцу вітаюцца!
(Creative Commons — Attribution 4.0 International — CC BY 4.0 ) Рабіце рэпост і дзяліцеся зь сябрамі.
Падпісвайцеся на старонкі супольнасьці InformNapalm у Фэйсбук / Твітэр / Telegram і апэратыўна атрымлівайце інфармацыю пра новыя матар’ялы.