Сёньня, 27 чэрвеня, кіраўніку й сузаснавальнікаў групы “Інфармацыйны Супраціў” Дмытру Тымчуку споўнілася б 47 гадоў. На знак памяці пра сапраўднага патрыёта Украіны, народнага дэпутата, падпалкоўніка запасу ЗСУ й вайсковага журналіста з гэтага дня беларуская служба супольнасьці InformNapalm пачынае цыкл публікацыяў ягоных найбольш значных аналітычных працаў.

Дмытро Тымчук трагічна загінуў 19 чэрвеня 2019 году ў выніку вагнястрэльнага параненьня.

Супольнасьць InformNapalm далучаецца да шчырых спачуваньняў усім родным ды блізкім нашага сябра ды калегі.

Пасля пачатку курортнага сэзону выразна выявілася небясьпечная тэндэнцыя, якая скажае ўспрыманьне праблемы акупаванага Крыму.

Група «Інфармацыйны Супраціў неаднаразова заяўляла, што Крым для Расеі – ня больш, чымся мейсца для разьмяшчэньня буйной вайсковай базы, якая стварае пагрозу для ўсяго Чарнаморскага рэгіёну, Балканаў. Апроч гэтага Расея выкарыстоўвае Крым для забесьпячэньня акупацыі часткі Данбаса й вайны ў Сірыі.

Паказальна, што шмат хто ва Украіне й на Захадзе ўспрымае Крым не як ваенную пагрозу, што ўвесь час павялічваецца, але як «захоплены пляж». Гэтая інфармацыя пра колькасьць турыстаў і стан курортаў «забівае» галоўную пазыцыю – пра колькасьць вайсковых вышкалаў на паўвысьпе й пра нарошчваньне вайсковае групоўкі Расеі ў Крыме, на Азоўскім моры, і ў сфэры адказнасьці Паўднёвае вайсковае акругі РФ суцэльна.

Паўнамаштабныя вышкалы ў Крыме / Фота: cbc.ca

Фармуецца наратыў – «на «захопленым пляжы» гаспадараць злыдні, якія рабуюць маёмасьць законных ўласьнікаў і парушаюць правы чалавека. Гэта выклікае глыбокую заклапочанасьць».

Праз што небясьпечны такі ракурс? Праз тое, што ён спрычыняецца да няслушных ацэнак і памылковых дзеяньняў (аналіз ІС-Крым – у спасылцы).

Частка грамадзянаў Украіны (у 2015 г. іх была траціна, зараз, вядома, больш) нутрана зьмірылася з стратаю Крыму й гатовая забыцца на акупацыю, абы «нармалізаваліся стасункі з Расеяй». Жыхары Харкава, Адэсы, Кіева, Львову не ўспрымаюць тое, што адбываецца ў Крыме як пагрозу асабіста для сябе й свайго дому. Людзі вераць, што калі «забыцца на Крым», то надыйдзе «мір».

Але гэта ілюзія. Таму што вайсковую базу ствараюць ня дзеля міру, але акурат дзеля вайны.

З падобнай лёгікай ігнараваньня рэчаіснасьці дзейнічаюць і заходнія партнэры. Яны гатовыя заўважаць парушэньні правоў чалавека ў Крыме й падмацоўваюць гэта дзеяньнямі (выдаюць гранты, уздымаюць пытаньні на міжнародных пляцоўках, утрымліваюць рэжым санкцыяў і г.д.). Але яны катэгарычна не гатовыя разглядаць Крым у кантэксьце ваеннай пагрозы.

Бо з падобнай інтэрпрэтацыяй неабходна цалкам перагледзець захады ўзьдзеяньня на агрэсара. Вядзецца ўжо ня толькі пра тое, каб выратаваць вязьняў або вярнуць скрадзеную ўласнасьць. Пытаньне стаіць па-іншаму: як нэйтралізаваць ваенную пагрозу, якая зыхозіць з акупаванага расейцамі Крыму?

Паўнамаштабныя вышкалы ў Крыме / Фота: AP, Pavel Golovkin

Пагадзіцеся, калі глядзець на Крым не праз прызму «захопленага пляжу», але праз прызму вайсковай базы, зусім па-іншаму выглядаюць дзеяньні тых жа галяндзкіх кампаніяў, якія дапамагалі будаваць Керчанскі мост і газаправод «Турэцкі паток». Зусім па-іншаму выглядае гісторыя турбінаў «Siemens». Гэта ўжо ня дробныя парушальнікі рэжыму эканамічных санкцыяў. Гэта – саўдзельнікі Крамля ў абсталяваньні вайсковай базы, якая скіраваная ня толькі супроць Украіны, але й супроць Эўропы.

Таму неабходна «перазагрузіць» успрыманьне крымскае тэматыкі ў публічнай прасторы. Тады можна будзе прадметна казаць ня толькі пра захаваньне, але й пра адэкватнае пашырэньне санкцыяў супроць Расеі, што наблізіць дэакупацыю.

Каардынатар групы Інфармацыйнага Супраціву Дмытро Тымчук

Крыніца артыкулу.

Загалоўнае фота – veteranstoday.com.

Пераклаў на беларускую мову Дзяніс Івашын.

Пашырэньне й перадрук з спасылкаю на крыніцу вітаюцца!
(Creative Commons — Attribution 4.0 International — CC BY 4.0 )

Рабіце рэпост і дзяліцеся зь сябрамі.
Падпісвайцеся на старонкі супольнасьці InformNapalm у Фэйсбук / Твітэр / Telegram
і апэратыўна атрымлівайце інфармацыю пра новыя матар’ялы.