Валянтэры міжнароднае супольнасьці InformNapalm супольна з калегамі Цэнтра «Міратворац» працягваюць выяўляць расейскіх вайскоўцаў, якія сумяшчаюць кантрактную службу ў збройных сілах Расеі з статусам баявіка ў незаконных збройных фармаваньнях «наваросіі». Гэтым разам аб’ектам нашае цікавасьці стаўся расеец, кандыдат у кантрактнікі на службу ў 74-ю асобную мотастралковую брыгаду Цэнтральнае вайсковае акругі.

У поле нашага зроку трапіў грамадзянін Расеі, баявік выведпадразьдзяленьня НЗФ ў складзе так званае “ДНР”, які дзейнічае на тэрыторыі Украіны з пазыўным “Алтай”.

Ідэнтыфікацыйныя дадзеныя: Яўген Аляксеевіч Старкоў, 24.12.1995 г.н., жыве ў г.Барнаўл, Алтайскі край. У сацсетках: «VK» (архівы профілю, фотаальбому, кантактаў),  «ОК» (архівы профілю, фотаальбому, кантактаў). Я. Старкоў ў 2013-2014 гг. праходзіў тэрміновую вайсковую службу ў ЗС РФ, у в/ч 58133-20 – радыёлякацыйная рота ў г. Брацк, Іркуцкае вобласьці ў складзе радыётэхнічных войскаў ВПС/СПА, ужо тады меў схільнасць да “маскі-шоў”. Пасьля вяртаньня з войска нейкі час прапрацаваў рамонтнікам у “РЖД”. Але ўжо ўлетку, напрыканцы чэрвеня 2015 году, пачаў зьбіраць дакуманты для афармленьня кантракту з Міністэрствам абароны Расеі на службу ў 74-ю асобную мотастралковую брыгаду (в/ч 21005, дысьлякацыя – Юрга, Кемераўская вобласьць) 41-й агульнавайсковай арміі Цэнтральнае вайсковае акругі.

Цяжка сказаць які лёс мае фігурант Старкоў, невядомы яго цяперашні статус, хаця яшчэ да ад’езду на Данбас ён пазаваў у масцы ў форме «горка» і ў разгрузцы, цалкам мажліва, выдадзенай яго працадаўцамі з міністэрства абароны Расеі.

Станам на 20 кастрычніка 2015 году Старкоў ужо 3 месяцы знаходзіўся ў «апалчэньні». У любым разе, грамадзянін РФ Старкоў ваюе ў складзе бандфармаваньняў супроць Украіны, а што да ягонага статусу, то тут магчымыя ўсяго толькі два варыянты:

1. З Старковым апэратыўна аформілі кантракт і адкамандыравалі на ФАК «факультэт падвышэньня кваліфікацыі» на Данбас;

2. Для падпісаньня кантракту Старкову высунулі ўмову паказаць «на што ён здатны» і ў індывідуальным парадку выправілі на Данбас, пасьля чаго яго безумоўна возьмуць на афіцыйную службу ў ЗС РФ.

Гэтыя меркаваньні заснаваныя на канкрэтных фактах. У прыватнасьці, разам з тэндэнцыяй, калі расейскіх кантрактнікаў для «падвышэньня кваліфікацыі» і атрыманьня баявога досьведу адкамандыроўваюць ў НЗФ «ДНР/ЛНР» (гл. “Кантракт у баявікі «наваросіі» аформлены ў Валгаградзкім ваенкамаце”), ёсьць і іншы фактар. Прыярытэт для прыняцьця на кантрактную службу ЗС РФ аддаецца расейскім грамадзянам, якія маюць загартоўку і баявы досьвед у выніку індывідуальных ваяжоў на Данбас. Напрыклад, напрыканцы студзеня 2016 году InformNapalm выявіў колішняга баявіка банды «Спарта», якому ў Ліпецкім вайсковым камісарыяце выдалі прадпісаньне для накіраваньня ў мейсца кантрактнае службы ў г. Мурманск, гл. “Учорашні баявік НЗФ «Спарта» працуе паводле кантракту ў Паўночны флёце ВМФ РФ”.

Нагадваем, што гэта ня пяршы факт знаходжаньня расейскіх кантрактнікаў з 74-й АМСБр ў складзе бандфармаваньняў «наваросіі». У кастрычніку 2015 году InformNapalm выявіў кантрактніка з гэтага вайсковага злучэньня зь Юргі, які сумяшчаў службу ў ЗС РФ з статусам баявіка ў так званым 3-м батальёне «ЛНР» «Хуліганы», гл. “Кантрактнікі 74-й АМСБр РФ ваююць на Данбасе пад прыкрыцьцём батальёну «ЛНР» «Хуліганы»”.

74-я АМСБр зю Юргі ўжо неаднойчы згадвалася ў ранейшых публікацыях InformNapalm. У лістападзе 2014 году былі зафіксаваныя фатаздымкі з вайскоўцамі юргінскае брыгады з памежных з Украінаю палявых лягероў, скуль зьдзяйсьняліся маршы-набегі на Данбас; копіі так званых падпісак «пра неразгалошваньне інфармацыі абмежаванага доступу ў зьвязку з выкананьнем адмысловых задачаў у забесьпячэньні бясьпекі РФ» гэтай жа вайсковай часткі, таксама здымкі падбітага на Данбасе танку Т-72 74-й брыгады.

Матар’ял да публікацыі падрыхтаваны на падставе ўласнага OSINT-расьледаваньня міжнароднай валянтэрскай групай InformNapalm з садзейнічаньнем калегаў Цэнтра «Міратворац».

На беларускую мову пераклаў Дзяніс Івашын.

(CC BY 4.0) Інфармацыя падрыхтаваная адмыслова для сайту InformNapalm.org, падчас поўнага або частковага перадруку й выкарыстаньня матар’ялу наўпроставая спасылка на аўтара і наш праэкт абавязковая.