Гісторыя пра расейскіх спэцназаўцаў ГРУ, якія трапілі ў палон да ўкраінскіх сілавікоў падчас боесутыкненьня пад н.п. Шчасьце 16 траўня, ужо абыйшла калёнкі ня толькі большасьці ўкраінскіх, але і сусьветных СМІ. Але відавочна, што капітан Ярафееў і сяржант Аляксандраў зьяўляюцца толькі верхавінай айсбэргу прысутнасьці расейскіх войскаў на акупаванай тэрыторыі Украіны ў Луганскае вобласьці. Блогер-дасьледчык Anton Pavlushko, які займаецца OSINT-выведкай расейскай вайсковай прысутнасьці, зьдзейсьніў адмысловае расьледваньне для InformNapalm, падчас якога выявіў у сацыяльных сетках дадзеныя на камандыра атраду, прозьвішча якога назвалі абодва спэцназаўцы падчас допыту.

Слухаем паказаньні сяржанта Аляксандрава: “… Зайшлі на тэрыторыю Украіны 26 Сакавіка 2015 году. Зайшлі ў складзе другога батальёну ў колькасьці 220 чалавек. Камандыр батальёну – Напольськіх Канстантын Мікалаевіч, маёр, грамадзянін Расейскай Фэдэрацыі. На тэрыторыю Украіны зайшоў другі батальён у складзе трох групаў выведкі … “

Цяпер капітан Ярафееў: “… Зайшоў у складзе атраду, другога атраду трэйцяй гвардзейскай брыгады спэцыяльнага прызначэньня. “Вр.и.о” (часова выконваючы абавязкі) камандыра атраду маёр Напольскіх. Зьяўляецца грамадзянінам Расейскай Фэдэрацыі, зьяўляецца вайсковаслужбоўцам… “

Адразу адзначаем, што маёр Напольскіх не камандыр атраду, але часова выконваючы абавязкі камандыру. Чаму так – трэба разьбірацца, магчыма, з камандырам ужо што-небудзь здарылася раней і таму маёр Напольскіх часова камандуе.

Такім чынам, неабходныя зыходныя дадзеныя для пошуку мы атрымалі з відэа допыту. Адразу знаходзім наступны профіль: 30 гадоў, Самара, Канстантын Напольскіх http://ok.ru/profile/558349640881 (архіў https://archive.is/LtTX5). Як і належыць выведніку, інфармацыі ў профілі няшмат, але шукаем далей…

Знаходзім яшчэ адзін профіль з фатаздымкам Канстантына Напольскіх на сайце “Радарыс”: у профілі фігуруе усё той жа горад Самара, рысы твару на абодвух фота таксама пазнавальныя (дарэчы, родны горад Малмыж, супадае з мейсцам пражываньня сяржанта Аляксандрава, які, мяркуючы з паказаньняў, пражывае ў Малмыжском раёне). І тут адкрываецца новая опцыя – ВНУ: КВВКВ (колішні ЧТІ (КФ), КВТККВ) ’05 (Казанская вышэйшая ваенная камандная вучэльня). То бок адсюль мы даведваемся, што менавіта гэты Канстантын Напольскіх, відавочна, можа быць афіцэрам і, мяркуючы па ўзросту, яго званьне можа акурат адпавядаць маёру ЗС РФ. Вучэльня камандная і агульнавайсковая, таму ейныя выпускнікі могуць разьмяркоўвацца ў розныя віды войскаў на камандныя пасады.

Канстантын Напольскіх калісьці таксама меў профіль Укантакце (https://vk.com/id64873840), але цяпер ён выдалены і ад яго засталіся толькі абрыўкі інфармацыі.

Для скептыкаў варта адзначыць, што да 2004 году вучэльня КВВКВ была Казанскай філіяй Чэлябінскага танкавага інстытута, паводле загаду Міністра абароны Расейскай Фэдэрацыі сталася самастойнай Казанскай вышэйшай ваеннай каманднай вучэльняй – танкавым унівэрсытэтам. І няхай вас не бянтэжыць танкавы факультэт і далейшае мейсца службы ягоных выпускнікоў у войсках спэцыяльнага прызначэньня. Нагадаем, што знакаміты выведнік Віктар Сувораў (сапраўднае імя – Уладзімер Рэзун) колішні супрацоўнік легальнай рэзыдэнтуры ГРУ СССР у Жэнэве, пісьменьнік, які вельмі знаны ў галіне гістарычнага рэвізыянізму, таксама быў выпускніком агульнавайсковае ваеннае вучэльні, і першая ягоная пасада была – камандыр танкавага ўзводу. Гэта не зашкодзіла яму стаць потым афіцэрам выведвальнага аддзелу.

Што да асобнай брыгады спэцназу ў Тальяці, у матар’яле расейскай службы навінаў BBC пад назовам “Колішні таварыш Ярафеева: нашая частка была “узорнаю” гучаць адкрыцьці аднаго з былых падначаленых, затрыманага ва Украіне капітана Яўгена Ярафеева, які зазначае, што афіцэры, якiя прыбылi ў брыгаду на камандныя пасады, адмысловую падрыхтоўку не атрымліваюць.

“Такое меркаваньне існуе, што там (у трэйцяй асобнай брыгадзе спэцназа ў Тальяці, – заўв.рэд) служаць наўпрост нейкія нібы тэрмінатары. Не, калі браць афіцэраў, то першапачаткова, калі яны праходзяць службу, вучацца на афіцэраў, у самых звычайных установах … потым ужо проста паводле разьмеркаваньня трапляюць у брыгаду служыць, атрымліваюць статус. Я б не назваў гэтую падрыхтоўку нейкай супэрпадрыхтоўкай”, – падкрэсьліў у сваім камэнтары для BBC былы вайсковец гэтай брыгады.

Але ўсе дадзеныя ў сацсетках можна разглядаць ўскосна, хаця мы пацьвердзілі праз уласныя крыніцы ў сілавым ведамстве нашыя здагадкі. І яны таксама паведамілі, што нашая інфармацыя пра маёра Канстантына Напольскіх, які кіруе групай ГРУ ў Луганску пацьверджваецца.

InformNapalm з “найлепшымі пажаданьнямі” да галоўнага выведвальнага ўпраўленьня РФ.

Пераклад Дзяніса Івашына