Міжнародная валянтэрская супольнасьць InformNapalm падчас зьдзяйсьненьня выведкі адкрытых крыніцаў выявіла фатаздымкі (апублікаваныя ў жніўні 2015 году), у якіх зафіксаваныя рэактыўныя сыстэмы залпавага вагню (РСЗВ) калібру 122 мм БМ-21 “Град”, што стаяць у якімсьці вытворчым памяшканьні. Падчас больш дэталёвага вывучэньня знойдзеных профіляў расейскіх баявікоў (Дзёмін Дзьмітры Аляксеевіч і Валевіч Арцём) было вызначанае, што яны з артылерыйскага дывізыёну “Корса” акупацыйных войскаў Расеі, а мейсца схаванай вайсковай тэхнікі – гэта Горлаўка, то бок горад на лініі фронту. З канца кастрычніка 2015 году зьдзяйсьнялася пэрыядычнае назіраньне за профілямі гэтых баявікоў. Былі выяўленыя некалькі фатаздымкаў, якія пацьверджваюць знаходжаньне расейскай тэхнікі БМ-21 “Град” у тых самых вытворчых памяшканьнях якогасьці прадпрыемства ў Горлаўцы. Гэтыя фатаздымкі былі зробленыя ў больш халаднейшую пару году, то бок увосень 2015 году, пра гэта сьведчыць цёплае адзеньне на баявіках.

Нядаўна было зафіксаванае, што Дзьмітры Дзёмін выдаліў усе фота “Градаў”, а Арцём Валевіч намагаўся захаваць каштоўныя для сябе фатаздымкі, наўмысна іх рэдагуючы, каб не было відаць памяшканьняў і таксама падчысьціў фота з “Градам”. Пасьля гэтага было прынятае рашэньне апублікаваць выдаленыя баявікамі фатаздымкі ў “twitter”, каб нам дапамаглі апазнаць памяшканьні.

Меркаванні людзей падзяліліся, адныя казалі, што гэта Канцэрн “Стырол”, іншыя – што гэта Горлаўскі машынабудаўнічы завод імя С.М.Кірава, але агульнае  ў гэтых дзьвюх вэрсыях – гэта горад Горлаўка, таму “тут ці там” схаваныя РСЗВ калібру 122 мм БМ-21 “Град ” ня мае значэньня, бо, па-першае, украінскія ўлады НЕ зьдзяйсьняюць прэвэнтыўныя ўдары па скопішчах тэхнікі акупанту і, па-другое, Збройныя сілы Украіны не страляюць па населеных пунктах, чым і карыстаюцца акупацыйныя войскі Расеі, размяшчаючы тэхніку ў гарадох сярод жылых дамоў.

Фота (1 і 2), апублікаваныя ў жніўні 2015 году.

Падобны БМ-21 “Град” з дывізыёну “Корса” стаяў на выставе тэхнікі на плошчы Леніна ў Горлаўцы 30 жніўня 2015 году.

Фота (1 і 2), апублікаваныя ўжо ў лістападзе 2015 году.

Такія ж фатаздымкі (1 і 2), але больш рэдагаваныя і ня выдаленыя з профілю.

Дакладна ідэнтыфікаваць мясцовасьць паводле фатаздымкаў, зробленых унутры будынку, вельмі складана, хіба што, калі вы самі былі ўсярэдзіне памяшканьняў гэтага будынку, або яно зафіксаванае на шматлікіх фота і відэа ў адкрытых крыніцах.

Канцэрн “Стырол” або Горлаўскі машынабудаўнічы завод імя С.М.Кірава?

Баявікі рабілі фота з адным і тым жа сабакам, а на фатаздымках Арцёма Валевіча маюцца нават геатэгі, якія пазначаюць мясцовасьць вакол машынабудаўнічага заводу імя Кірава.

Фота Дзьмітрыя Дзёміна з сабакам, удалечыні можна пабачыць частку заводу.

Жнівеньскае фота з таго ж будынку, якое яшчэ не выдаленае з профілю.

Паводле загаду №527 з 15.10.2015 г. Дзёмін Дзьмітры Аляксеевіч атрымаў званьне «малодшага сяржанту» камандыра баявой машыны 2-й рэактыўнай артылерыйскай батарэі рэактыўнага артылерыйскага дывізыёну “Корса” тэрарыстычных акупацыйных войскаў Расейскай Фэдэрацыі.

Твары баявікоў на гэтым фота сьведчаць пра тое, што сьвята “абмывання званьня” было надта зацяжное.

Памятайце, што «Празьмернае ўжываньне алькаголю вельмі моцна шкодзіць вашаму здароўю» і можа мець сьмяротныя наступствы.

Матарыял да публікацыі падрыхтаваў @BuTaJIu4eK

Пераклаў на беларускую мову Дзяніс Івашын

(CC BY) Інфармацыя падрыхтаваная адмыслова для сайту InformNapalm.org, падчас поўнага або частковага перадруку й выкарыстаньня матар’ялу наўпроставая спасылка на аўтара і наш праэкт абавязковая.

Актыўны распаўсюд матар’ялу ў сацсетках вітаецца!