У Кіеве адбылася прэзэнтацыя кнігі «Крым за заслонай. Даведнік у зоне акупацыі». Кніга падрыхтаваная да пятай гадавіны расейскай акупацыі Крыму.

Даведнік распавядае пра гісторыю паўвыспы, перадумовы акупацыі й працэс непасрэднага захопу Крыму расейскімі сіламі, пра бягучае становішча й парушэньні правоў чалавека на акупаванай тэрыторыі. У кнізе пададзеныя доказы расейскай ваеннай агрэсіі, сабраныя міжнароднай выведвальнай супольнасьцю InformNapalm, асьветленыя схемы перакідваньня расейскіх сілавікоў у Крым.

Прэзэнтацыя кнігі праходзіла на двух мэдыя-пляцоўках. На першай – у нацыянальнай інфармацыйнай агенцыі “Укрінфарм” – прысутнічаў міністар замежных справаў Украіны Паўло Клімкін, намесьнік міністру інфармпалітыкі Эмінэ Джапарава, дырэктар эўрапейскай праграмы Міжнароднага фонду «Відродження» Дмытро Шульга. Таксама прысутнічаў дарадца ў палітычных і грамадзкіх пытаньнях амбасады Канады ва Украіне Руслан Кац, які зазначыў, што праз вывучэньне гэтай кнігі сусьветная супольнасьць можа стаць больш дасьведчанай, больш аб’яднанай у сваёй пазыцыі.

Міністар замежных справаў Паўло Клімкін у прыватнасьці сказаў, што ў Крыме дзейнічае расейская дыктатура нават у горшай вэрсіі, чымся у самой Расейскай Фэдэрацыі. Расея перасяляе ў Крым дзясяткі тысячаў людзей, многія зь іх маюць крымінальнае мінулае й праз гэта зьяўляюцца кантраляванымі.

Таксама міністар падкрэсьліў важнасьць супрацы з супольнасьцю InformNapalm:

“Дзякую камандзе InformNapalm за тое, як яны змаглі распавесьці пра цяжкую рэальнасьць ды пакуты насельніцтва Крыму пад расейскай акупацыяй. Гэта толькі частка нашай супольнай працы, якую заўзята працягвацьмем”.

Дякую команді @InformNapalm за те, як вони зуміли розказати про важку реальність та страждання населення 🇺🇦 Криму під російською окупацією. Це лише частина нашої спільної роботи, яку завзято продовжуватимемо #CrimeaIsUkraine pic.twitter.com/Pk13iSYK9Y

— Pavlo Klimkin (@PavloKlimkin) 7 березня 2019 р.

Прэзэнтацыя кнігі таксама адбылася ва Украінскім крызавым мэдыя-цэнтры, дзе выданьне прадставіў аўтарскі калектыў: палітоляг Максім Маёраў, кандыдат палітычных навукаў Вольга Валянюк, валянтэр міжнароднае выведвальнае супольнасьці InformNapalm Крыстына Дабравольская.

Гэта другое выданьне Цэнтру дасьледаваньня бясьпекавага асяродзьдзя «Прамэтэй» такога фармату, прысьвечанае выкрыцьцю фактаў расейскай агрэсіі. Першае – кніга «Данбас у вагню» – выйшла ў 2017 годзе на пяці мовах і была станоўча ацэненая экспэртным асяродзьдзем. Таксама паводле замовы Міністэрства замежных справаў Украіны быў зьдзяйсьнены друк дадатковага накладу кнігі, якая пашыралася для ўкраінскіх дыпляматычных прадстаўніцтваў.

Кніга «Крым за заслонай» сталася працягам тэмы расейскай акупацыі. У фокусе аўтараў Крым – скуль і пачалася бягучая расейска-ўкраінская вайна. Выданьне будзе пададзенае на пяці мовах: украінскай, ангельскай, турэцкай, нямецкай, расейскай. Заплянаваны пераклад выданьня і на беларускую мову.

Дзякуючы падтрымцы Канадзкага фонду мясцовых ініцыятываў і Міжнароднага фонду «Відродження», друкаваная й электронная вэрсія кнігі «Крым за заслонай. Даведнік у зоне акупацыі» пашыраецца бясплатна. Электроннае выданьне неўзабаве можна будзе спампаваць на нашым сайце. Друкаванае выданне можна атрымаць праз дасыланьне аформленай замовы ў спасылцы: https://goo.gl/8qsKd2.

Матар’ял падрыхтаваны адмыслова для сайту міжнароднае выведвальнае супольнасьці InformNapalm.

Для загалоўнага фота выкарыстаны фатаздымак агенцыі Укрінфарм.

Пашырэньне й перадрук з спасылкаю на крыніцу вітаюцца!
(Creative Commons — Attribution 4.0 International — CC BY 4.0 )

Рабіце рэпост і дзяліцеся зь сябрамі.
Падпісвайцеся на старонкі супольнасьці InformNapalm у Фэйсбук / Твітэр / Telegram
і апэратыўна атрымлівайце інфармацыю пра новыя матар’ялы.