У прадмесьці Луганска ў прамзоне пгт.Юбілейнае расейскія акупанты абсталявалі вайсковую базу, на якой знаходзіцца разнастайная расейская вайсковая тэхніка і горы боепрыпасаў. Дадзеныя пра гэтую базу былі атрыманыя Міжнароднай валянтэрскай супольнасьцю InformNapalm падчас зьдзяйсьненьня выведкі адкрытых крыніцаў (OSINT).

Падчас маніторынгу сацсетак было выяўленае фота з 11 студзеня 2016 году з вайсковай тэхнікай акупацыйных войскаў Расейскай Фэдэрацыі на тэрыторыі колішняга ТАА «УГМК-Алчэўск» у н.п.Юбілейнае.

Падчас вывучэньня сувязяў баявікоў у сацсетках было выяўленае падобнае летняе фота, але зробленае паблізу другога казлавога крану, які знаходзіцца на гэтай жа тэрыторыі.

На фота мясцовыя луганскія баявікі Рыпала Вадзім Сяргеевіч і Кудрын Максім, якія маюць сваякоў і знаёмых у прыфрантавых населеных пунктах – Шчасьці і Станіцы-Луганскай.

Абодва фатаздымкі накладзеныя на мапу і пазначаныя лічбамі «1» і «2» у мейсцах іхнае здымкі.

Падчас параўнаньня здымкаў на Google.Maps і на Яндэкс.Мапы было выяўленае, што на суседніх тэрыторыях таксама знаходзіцца разнастайная вайсковая тэхніка.

Спадарожнікавы здымак гэтага раёну можна параўнаць з архіўным здымкам з 03.07.2015 г., які зроблены зь бесьпілётніку «Арміі SOS» і пададзены нам Юр’ем Касьянавым.

Зялёнай стрэлкай мы пазначылі пашкоджаны дах будынку, пра які будзе гаворка ніжэй.

Далей у профілях яшчэ двух мясцовых луганскіх баявікоў: Ільін Андрэй Анатолевіч і Бугаеў  Мікалай Мікалаевіч, былі выяўленыя летнія фатаздымкі (1, 2) памяшканьняў, якія ажно да столяў запоўненыя боепрыпасамі.

Падчас дэталёвага вывучэньня профіляў гэтых баевікоў стае зразумелым, што асноўныя мейсцы іхнага знаходжаньня гэта: вайсковыя палігоны ля Луганска і гэтая прамзона ў н.п.Юбілейным.

Расейскія вайсковыя УРАЛы ля чырвонага будынку з пашкоджаным дахам і інструктаж з навучаньнем баявікоў што да працы з 120-мм мінамётамі.

І спынімся на двух скрыншотах паведамленьняў з групы «Зводы апалчэньня». У твітэры з 16 чэрвеня 2015 году, тэкст (тут  і далей пакідаем у арыгінале): «Минский цирк скоро закончится. Мы готовы и мы освободим Новороссию!» і пасьля на іхным сайце 25.06.2015 г., тэкст: «Победа и освобождение Новороссии неизбежны. Ополчение готовится к борьбе и аккумулирует боеприпасы на складах».

• Пасьлямова

  Зьвяртаем увагу на тое, што баявікі аб’яднаных расейска-сэпаратысцкіх сілаў на працягу ўсяго часу дзеяньня «Менскіх дамоўленасьцяў» назапашвалі ўзбраеньне і тэхніку на падкантрольных ім акупаваных тэрыторыях. Зыходзячы зь іхных заяваў, у пляны кіраўніцтва РФ і камандаваньня бандфармаваньняў не ўваходзіць імкненьне да мірнага ўрэгуляваньня сытуацыі. У той жа час украінскія спэцслужбы не распачалі ніводнай спробы лякалізацыі пагрозы нацыянальнай бясьпекі і ліквідацыі буйных скопішчаў боепрыпасаў тэрарыстаў, хоць уся інфармацыя пра іх знаходзіцца ў адкрытым доступе.

  Да таго ж расейскія баявікі дэманструюць сваю гатоўнасьць у выкарыстаньні пазначаных арсэналаў у тэрарыстычнай вайне супроць украінскага народу.

  Цікава, што б зьдзейсьнілі ў падобнай сытуацыі спэцслужбы Вялікай Брытаніі, ЗША, Ізраіля або іншых краінаў, ці былі б безадкладна зьнішчаныя мейсцы базаваньня боепрыпасаў, якія знаходзяцца ў прамысловай зоне, сіламі падразьдзяленьняў спэцыяльных апэрацыяў або тэрарысты працягнулі б свабодна назапашваць сілы для зьнішчэньня інфраструктуры і акупацыі новых тэрыторыяў?

Матар’ял да публікацыі падрыхтаваў Відаль Сарокін.

На беларускую мову пераклаў Дзяніс Івашын.

(CC BY 4.0) Інфармацыя падрыхтаваная адмыслова для сайту InformNapalm.org, падчас поўнага або частковага перадруку й выкарыстаньня матар’ялу наўпроставая спасылка на аўтара і наш праэкт абавязковая.