Вынікі справаздачы InformNapalm для ПАРЭ

Для азнаямленьня можаце спампаваць PDF-вэрсію дакладу.

• 11 кастрычніка 2016 году народны дэпутат Украіны, старшыня сталай дэлегацыі ў Парляманцкай асамблеі NATO Ірына Фрыз паведаміла, што падчас пасяджэньня ПАРЭ ўкраінская дэлегацыя праінфармавала эўрапейскіх партнэраў пра факты датычнасьці Расейскай Фэдэрацыі да непасрэднага ўдзелу ў вайне на Данбасе супроць Украіны. У якасьці доказавай базы была пададзеная прэзэнтацыя, якую падрыхтавала міжнародная выведвальная супольнасьць InformNapalm [крыніца].
• 12 кастрычніка 2016 году народны дэпутат Украіны, старшыня ўкраінскае дэлегацыі ў Парляманцкай асамблеі Рады Эўропы Уладзімер Ар’еў паведаміў: «Працягваем супрацьдзейнічаць расейскаму ўплыву ў ПАРЭ. Распаўсюджваем выдатны аналіз фактаў прысутнасьці расейскай зброі ва Украіне. Толькі сталым і настойлівым інфармаваньнем можна перабіць агрэсіўную і добра фундаваную расейскую лобі-інтэрвэнцыю ў Радзе Эўропы. Б’ем фактамі» [крыніца].
• 12 кастрычніка 2016 года Ірына Фрыз таксама паведаміла, што ў Дняпры адбылося паседжаньне Міжпарляманцкае рады Украіна – NATO. Чальцам замежнае дэлегацыі была пададзеная прэзэнтацыя InformNapalm [крыніца].

Апісаньне справаздачы

Зробленая справаздача грунтуецца на дадзеных расьледаваньняў, зьдзейсьненых міжнароднай выведвальнай супольнасьцю InformNapalm на працягу кастрычніка 2014 – жніўня 2016 году, якія былі апублікаваныя на нашым рэсурсе. Зробленае падсумаваньне 44 спэцыяльных расьледаваньняў, у якіх ідэнтыфікаваныя 33 тыпы расейскай вайсковай тэхнікі, адзінкі якой выкарыстоўвалі расейска-тэрарыстычныя сілы ў зоне вайсковых дзеяньняў на Данбасе.

Большая частка тэхнікі, пазначанай у справаздачы, адносна новая, паступіла ва ўзбраеньне ЗС РФ з 2004 па 2015 год. Гэтая вайсковая тэхніка не вырабляецца ва Украіне, большасьць яе ніколі не імпартавалася ва Украіну, таму яна не магла патрапіць у рукі супраціўніку ў якасьці вайсковага трафею.

Кіраваньне і абслугоўваньне найноўшай вайсковай тэхнікай зьдзяйсьняецца кваліфікаваным пэрсаналам – кадравымі расейскімі вайскоўцамі.

Пазначаныя факты сьведчаць пра тое, што Расейская Фэдэрацыя сыстэматычна забясьпечвала і працягвае забясьпечваць расейска-тэрарыстычныя сілы на Данбасе сучаснай вайсковай тэхнікай, а таксама накіроўвае вайскоўцаў, якія яе эксплюатуюць.

Мэтодалёгія

Ідэнтыфікацыя адзінак вайсковае тэхнікі расейскага акупацыйнага кантынгенту на Данбасе зьдзяйсьняецца з дапамогаю  адкрытых крыніцаў:

• фатаздымкі з пэрсанальных профіляў ў сацыяльных сетках;
• кадры відэасюжэтаў тэлевізіі з акупаванай тэрыторыі;
• відэа, зробленае выпадковымі сьведкамі, выкладзенае на сэрвісе YouTube;
• спадарожнікавыя здымкі акупаванае тэрыторыі;
• іншыя мэтоды.

Стандартнае расьледаваньне адбываецца з дапамогаю разнастайных крыніцаў інфармацыі для выяўленьня й ідэнтыфікацыі пэўнае адзінкі вайсковае тэхнікі. У шматлікіх выпадках вызначаюцца нават расейскія вайсковыя часткі, якім належаць зафіксаваныя адзінкі тэхнікі.

Багацьце фотаматар’ялу ў пэрсанальных профілях расейскіх вайскоўцаў і баявікоў у сацыяльных сетках «OK», «VK» і «FB» непасрэдным чынам дапамагае выяўленьню. Ідэнтыфікацыя мясцовасьці адбываецца паводле геатэгаў фатаздымкаў, а таксама паводле характэрных асаблівасьцяў краявіду і архітэктуры мясцовасьці.

Хаця магчымасьці працы на акупаванай тэрыторыі для ўкраінскае тэлевізіі вельмі абмежаваныя, вялікая колькасьць матар’ялаў для аналізу падаюць прапагандысцкія СМІ, якія там свабодна працуюць і адлюстроўваюць пазыцыю прарасейскіх сілаў.

Вынікі расьледаваньняў неаднаразова былі пацьверджаныя ў працэсе выяўлення новых фактаў. У прыватнасьці, іх пацьверджваюць іншыя арганізацыі, журналісты, афіцыйныя структуры Украіны, міжнародныя сьледчыя.

Гэтая справаздача зьяўляецца выключна вынікам расьледаваньняў міжнароднае выведвальнае супольнасьці InformNapalm. У сьпісе няма адзінак узбраеньня, пра якое паведамлялі відавочцы, СМІ і афіцыйныя структуры Украіны, аднак пры гэтым не падмацоўвалі інфармацыю фота- або відэасьведчаньнямі.

 

Рэзюмэ

Прапанаваны сьпіс зьяўляецца факталягічным, але не канчатковым. Цалкам мажліва, шматлікія адзінкі найноўшае расейскай вайсковае тэхнікі на Данбасе яшчэ будуць выяўленыя і ідэнтыфікаваныя выведнікамі InformNapalm. Таксама матар’ялы расьледаваньняў не даюць адказ на пытаньне што да колькасьці кожнай выяўленай на акупаванай тэрыторыі Данбаса адзінкі расейскага ўзбраеньня.

Выкарыстанне найноўшай расейскай вайсковай тэхнікі на Данбасе не зьяўляецца масавым і ёсьць, збольшага, выпрабаваньнем. Большая частка выяўленых комплексаў належыць да сродкаў радыёэлектроннай выведкі й радыёэлектроннай барацьбы.

Паралельна з выпрабаваньнем на Данбасе найноўшых тыпаў узбраеньня вайскова-палітычнае кіраўніцтва Расейскай Фэдэрацыі насычае акупаваныя тэрыторыі Украіны старым савецкім узбраеннем, напрыклад:

• асноўны баявы танк Т-64;
• танк Т-72Б ранейшых мадыфікацыяў;
• баявая машына рэактыўнае сыстэмы залпавага вагню «Град» БМ-21;
• самаходная артылерыйская ўстаноўка 2С1 «Гвазьдзіка»;
• зэнітна-ракетны комплекс «Страла-10»;
• баявыя машыны пяхоты БМП-1 і БМП-2;
• шматмэтавы транспартэр лёгкі браняваны (МТ-ЛБ);
• 122-мм буксаваная гаўбіца Д-30;
• 152-мм гаўбіца «Мста-Б»;
• супрацьтанкавая гармата МТ-12 «Рапіра».

Гэтая і іншая вайсковая тэхніка расейска-тэрарыстычных сілаў на Данбасе неаднаразова фіксавалася ў расьледаваньнях InformNapalm. Аднак доказ наўпроставых паставак гэтых адзінак тэхнікі баявікам з РФ патрабуе іншых працэдураў і таму выходзіць за межы пададзенае справаздачы.

Асноўная частка матар’ялу маецца ў поўнай вэрсіі справаздачы.