У гэтыя дні Расейская Фэдэрацыя пад сьцягам барацьбы з тэрарызмам значна ўзмацніла сваю «прысутнасьць» ў Сірыі, далучыўшы да баявых дзеяньняў стратэгічныя бамбоўцы далёкасяжнае авіяцыі ВКС РФ – лятакі Ту-160, Ту-22М3 і Ту-95МС. Міжнародная валянтэрская супольнасьць InformNapalm сабрала доказы значнага адхіленьню авіяўдараў ад заяўленых мэтаў, а таксама падала дадзеныя аднаго з чальцоў экіпажу Ту-160, які прымае ўдзел у расейскай апэрацыі. МА РФ і расейскія СМІ працягваюць дэзынфармаваць сусьветную супольнасьць у выніках авіяўдараў у Сірыі з мэтай паслабленьня санкцыяў супроць Расеі і дасягненьня зьнешнепалітычных посьпехаў у стварэньні кааліцыі з краінамі Захаду.

Падчас зьдзяйсьненьня OSINT-дасьледаваньняў міжнародная валянтэрская супольнасьць InformNapalm ідэнтыфікавала ў Сірыі расейскія бамбавікі Ту-160 «Уладзімер Судзец» (RF-94108), Ту-160 «Віталь Капылоў» (RF-94115), а таксама Ту-22М3 – 42 «чырвоны» (RF-94142).

Па-ранейшаму, у шэрагу выпадкаў, ВКС РФ працягваюць зьдзяйсьняць авіяцыйныя ўдары з характэрнай «недакладнасьцю» і зусім не па пазыцыях ІДІЛ. Ці робіцца гэта наўмысна, або з-за састарэньня тэхнікі або з-за слабой падрыхтоўкі лётнага складу – сказаць цяжка.

У прыватнасьці, 17 лістапада 2015 году далёкасяжная авіяцыя ВКС РФ зьдзейсьніла чарговы ракетна-бомбавы ўдар па Сірыі. Паводле афіцыйных дадзеных, у той дзень былі задзейнічаныя 34 крылатыя ракеты паветранага базаваньня. Але па якіх аб’ектах?

Напрыклад, адная з крылатых ракетаў сямейства Х-55 «заблукала» у сельскай мясцовасьці ў паўночна-заходніх прадмесьцях сірыйскага гораду Maarat al-Numan (правінцыя Індліб). Яе запусьцілі зь лятака Ту-160 або Ту-95МС. Магчыма, што менавіта гэтая атака зафіксаваная на афіцыйным відэа Мінабароны РФ.

На фатаздымках зь мейсца падзеньня Х-55 можна пабачыць рэшткі гэтай «сакрэтнай» ракеты, надпісы на расейскай і г.д. Таксама для параўнаньня падаем вам ракету Х-55 у сваім першапачатковым выглядзе.

Валянтэры InformNapalm вызначылі мейсца, дзе былі зробленыя здымкі. Як мяркуецца, гэтае мейсца знаходзіцца ў ваколіцах Maarat al-Numan, гл. мапу.

У Генштабе ЗС РФ, напэўна, ня ведаюць, што Маарэт аль-Нуман кантралюецца паўстанцкімі групамі. На мапе баявых дзеяньняў у Сірыі добра бачна, што да фронту з ІДІЛ ня менш за 50-60 км, і горад знаходзіцца літаральна ў цэнтры «зялёнай» зоны, кантраляванай паўстанцамі, прычым у атачэньні чырвонай лініі урадавых сілаў з поўдня, паўднёвага захаду і ўсходу. І толькі ўжо затым ідзе зона фронту з ІДІЛ.

З гэтага вынікае, што расейскія ракеты адхіляюцца ад заяўленай мэты ў сярэднім на 50 км. Такія ўдары складана назваць “высокадакладнымі”, бо абвешчаныя “выпрабаваньні найноўшае зброі” – гэта яшчэ не падстава зьдзяйсьняць удары “па плошчах”, забіваючы мірных жыхароў.

Трэба зазначыць, што апошняга часу гэта ўжо другі выпадак атакі расейскіх лятакоў на Маарэт аль-Нуман. Гэтак, 30 кастрычніка 2015 году зьнішчальнікі ВКС РФ таксама зьдзейсьнілі ўдары па гораду, тады загінулі 7 і былі параненыя 12 чалавек.

Таксама Міністэрства абароны РФ распаўсюдзіла інфармацыю пра ськідваньне авіябомбаў тыпу ОФАБ-250-270 з Ту-22М3 нібыта па пазыцыях ІДІЛ. Куды іх ськінулі – пытаньне застаецца адкрытым.

Мы вызначылі аднаго з чальцоў экіпажа Ту-160 «Віталь Капылоў» (RF-94115) з 6950-й гвардзейскай авіяцыйнай базы Энгельс, гэта – афіцэр ВКС РФ Аляксей Болдыраў.

У профілі сацсеціва ён выклаў уласны фатаздымак на тле Ту-160 «Віталь Капылоў» (RF-94115), што таксама можа сьведчыць пра ягоную прафэсыйную дзейнасьць.

Міжнародная валянтэрская супольнасьць InformNapalm працягвае адсочваць дзеяньні ЗС РФ у Сірыі і на іншых паралельных тэатрах баявых дзеяньняў.

Азнаёміцца ​​з усімі актуальнымі OSINT-расьледаваньнямі InformNapalm што да Сірыі вы можаце у тут: Сірыя.

Матар’ял да публікацыі падрыхтавалі Мікалай Махно і Міхаіл Кузняцоў

Перакалаў на беларускую мову Дзяніс Івашын

(CC BY 4.0) Інфармацыя падрыхтаваная адмыслова для сайту InformNapalm.org, падчас поўнага або частковага перадруку й выкарыстаньня матар’ялу наўпроставая спасылка на аўтара і наш праэкт абавязковая.

Актыўны распаўсюд матар’ялу ў сацсетках вітаецца!