Тэлеканал “Кинопремьера” з складу пакетаў тэлевізіі Zala анансуе трансьляцыю расейскага прапагандысцкага фільму “Донбасс. Окраина”. Паказ заплянаваны на вечар 25 верасьня 2019 году. Публікуем зварот да кіраўніцтва РУП «Белтэлекам» з заклікам не дапусьціць трансьляцыі гэтай стужкі на тэрыторыі Беларусі.

Асноваю сюжэту чарговага твору расейскай прапаганды сталася інтэрпрэтацыя падзеяў жніўня 2014 году, калі адбываліся паўнамаштабныя баявыя дзеяньні на тэрыторыі Данбасу.

Кінастужку сфільмаваў Рэнат Даўлець’яраў (рас. – Ренат Давлетьяров), расейскі рэжысэр, большасьці карцінаў якога адпавядае статус так званага “B movie” (другасныя малабюджэтныя камэрцыйныя фільмы). Паказальна, што ягоны фільм «Донбасс. Окраина» на вядомым кінапартале й найбуйнейшай у сьвеце міжнароднай базе дадзеных пра кінематограф – IMDb –  мае рэйтынг сьмецьцевага ўзроўню – ўсяго 3.0 балаў.

Кадар зь фільму – штамп яшчэ савецкай кінапрапаганды пра “бандэраўцаў” зьмяніўся ў Расеі на сучасны пра “карнікаў” “Азова”

Гэты кінатрэш стаўся своеасаблівай квінтэсэнцыяй расейскай прапаганды пра баявыя дзеяньні на Усходзе Украіны. У ім выкарыстаны ўвесь набор тыповых клішэ й штампаў расейскага агітпрапу: “гражданская война на Украине”, “зверства ВСУ”, «убийства мирного населения Донбасса», «карательная операция Киева» і г.д.

Вельмі паказальна, што гэты прадукт інфармацыйнай вайны супроць Украіны быў створаны не ў павільёнах расейскіх кінастудыяў, але на натурных пляцоўках  акупаванага Расеяй Крыму. 10 чэрвеня 2019 году адбыўся ягоны прэм’ерны паказ на тэрыторыі тэрарыстычнага ўтварэньня “ДНР”, на якім асабіста прысутнічаў ягоны лідэр Дзяніс Пушылін.

Лідэр тэрарыстычнага ўтварэньня “ДНР” Дзяніс Пушылін і рэжысэр Рэнат Даўлець’яраў

Сцэнар фільму напісаў Аляксей Цімошкін (рас. – Алексей Тимошкин), які асабіста прыязджаў на акупаваную тэрыторыю Данбасу. Цікава, што пасьля прэм’еры Цімошкін вельмі нэрвова рэагаваў на вялікую колькасьць крытычных заўвагаў што да мастацкіх якасьцяў фільму, а таксама на абвінавачваньні ў зарабленьні грошай на вайне.

Аляксей Цімошкін (праваруч) разам з баявіком расейска-тэрарыстычных войскаў

Сьлед нагадаць, што ў сакавіку 2017 году пасьля зваротаў беларускай грамадзкасьці да кіраўніцтва тэлеканалу “АНТ” быў скасаваны заплянаваны паказ яшчэ аднаго прапагандысцкага расейскага фільму “Крым” рэжысэра  Аляксея Піменава. Гэтая стужка таксама была прыбраная і з заплянавага пракату ў Беларусі.

З улікам усяго пададзенага вышэй беларуская служба міжнароднае валянтэрскае супольнасьці InformNapalm зьвяртаецца да кіраўніцтва РУП “Белтэлекам” з заклікам не дапусьціць трансьляцыі на тэрыторыі Беларусі фільму расейскай вайсковай прапаганды “Донбасс. Окраина” з дапамогаю тэхнічных сродкаў інтэрактыўнага тэлебачаньня Zala.

Рэспубліка Беларусь спрабуе выступаць у якасьці донару міжрэгіянальнае бясьпекі й надае на сваёй тэрыторыі перамоўную пляцоўку што да ўрэгуляваньня сытуацыі на Данбасе. Паказ прапагандысцкага фільму будзе спрыяць заангажаваньню Беларусі ў расейскую інфармацыйную агрэсію супроць Украіны й значнаму нівэляваньню дасягнутых станоўчых вынікаў міждзяржаўных украінска-беларускіх узаемінаў. Апроч гэтага, у выніку трансьляцыі гэтага фільму значная колькасьць зь ня менш за 1,5 млн абанэнтаў інтэрактыўнае тэлевізіі Zala патэнцыйна могуць патрапіць пад дэструктыўнае ўзьдзеяньне расейскай вайсковай прапаганды зь недпрадбачанымі й небясьпечнымі наступствамі.

Просім нашых чытачоў падтрымаць гэты зварот рэпостам у сацсетках і таксама зьвяртацца да кіраўніцтва РУП “Белтэлекам”.

РУП “Белтэлекам, генэральны дырэктар – Петручэня Юрый Мікалаевіч

Адрэса : 220030, Менск, вул. Энгельса, 6

кантакты: тэл. +375 17 2171005

[email protected]

P.S. Паводле паведамленьняў нашых чытачоў, анонс паказу прапагандысцкага фільму адбываецца і ў межах пакету кабэльнае тэлевізіі апэратару МТІС, у які таксама ўваходзіць пазначаны вышэй тэлеканал “Кинопремьера”.

Кантакты для зваротаў:

ААТ “Менскія тэлевізійныя інфармацыйныя сеткі, дырэктар – Багравец Павал Віктаравіч

Адрэса: 220100, г. Минск, ул. Цнянская, 23а

тэл.: +375 017 388-33-33

e-mail: [email protected]

Матар’ял да публікацыі падрыхтаваў рэдактар беларускае службы міжнароднае выведвальнае супольнасьці InformNapalm Дзяніс Івашын.

Падчас выкарыстаньня інфармацыі актыўная спасылка на крыніцу абавязковая.
(Creative Commons — Attribution 4.0 International — CC BY 4.0 )

Рабіце рэпост і дзяліцеся зь сябрамі.
Падпісвайцеся на старонкі супольнасьці InformNapalm у Фэйсбук / Твітэр / Telegram
і апэратыўна атрымлівайце інфармацыю пра новыя матар’ялы.