Расея працягвае супроць Украіны неабвешчаную вайну, чаргуючы інтэнсыўнасьць выкарыстаньня вайсковых, эканамічных і палітычных захадаў. Інфармацыйная ж кампанэнта гэтае вайны ўвесь час захоўвае вельмі высокі градус напалу. Усе гарачыя кропкі, у якіх удзельнічае расейскі бок, як ва Украіне, гэтак і на Блізкім Усходзе зьвязаныя міжсобку адзінай задумай, якую ажыцьцяўляе Крэмль падчас пагоні за сваімі геапалітычнымі амбіцыямі.

15 сакавіка 2016 г. паводле загаду У.Пуціна было абвешчанае пра пачатак вывядзеньня асноўнае часткі расейскай вайсковай групоўкі зь Сірыі. Афіцыйны Крэмль не прызнаваў ўдзел у апэрацыі сухапутных вайсковых частак, таму анансаванае вывядзеньне датычнае толькі авіяцыйнае кампанэнты. Ужо з 16 сакавіка валянтэры InformNapalm зафіксавалі актывацыю інфармацыйнае падрыхтоўкі РФ да абгрунтаваньня магчымага выкарыстаньня авіяцыі супроць Украіны. Пра небясьпеку падобнага сцэнару й падрыхтоўку Расеі да яго мы папярэджвалі й раней, але комплекс фактараў стрыманьня працягвае адтэрміноўваць гадзіну «Х», не зьніжаючы пры гэтым ўзровень рызыкаў.

25 сакавіка 2016 г. меркаваньне пра тое, што пасьля вываду расейскіх войскаў зь Сірыі, павялічылася пагроза выкарыстаньня ейнай баявой авіяцыі на Данбасе, выказаў і прадстаўнік Галоўнага ўпраўленьня выведкі МА Украіны Вадзім Скібіцкі.

Улічваючы ўсе вышэйпададзеныя фактары, а таксама незаконнае ўтрыманьне і судовы прысуд украінскай лётчыцы Надзеі Саўчанка, якім расейскі бок паводле сфабрыкаваных дадзеных прысудзіў украінку да 22 гадоў пазбаўленьня волі, валянтэры міжнароднае супольнасьці InformNapalm вырашылі падаць дадзеныя пра сапраўдных вайсковых злачынцаў, якія маюць дачыненне да сотняў сьмерцяў мірных сірыйскіх грамадзянаў (спасылкі на справаздачы праваабарончых арганізацыяў: 1, 2, 3, 4, 5).

Таксама, улічваючы іхныя баявыя навыкі і мейсца службы, гэтыя асобы могуць стаць першымі выканаўцамі злачынных загадаў бамбаваньня тэрыторыі Украіны. У гэтым OSINT-расьледаваньні мы падаем інфармацыю пра пілётаў франтавых бамбоўцаў Су-34, якія не ўвайшлі ў апублікаваныя раней расьледаваньні й інфаграфіку з асабістымі дадзенымі 32 афіцэраў з складу 20 экіпажаў лятакоў ПКС РФ, зафіксаваных у Сірыі падчас выкананьня баявых задачаў.

Уся інфармацыя сабраная з дапамогаю відэасюжэтаў расейскіх тэлеканалаў і публікацыяў СМІ.

Пацьверджаны ўдзел у сірыйскае апэрацыі

Захараў Андрэй Іванавіч, маёр, штурман 47-га асобнага зьмяшанага авіяцыйнага палку (АЗАП), Варонеж, Варонежская вобласьць. За забойствы мірнага насельніцтва Сірыі быў узнагароджаны «Ордэнам мужнасьці».

Мельнікаў Алег, капітан, намесьнік камандыра авіяцыйнае эскадрыльлі 47-га АЗАП, Варонеж, Варонежская вобласьць. У Сірыі быў пілётам Су-34, бартавы нумар 22 «чырвоны».

Чачоткін Аляксей, капітан, штурман 47-га АЗАП, Варонеж, Варонежская вобласьць. У Сірыі быў пілётам Су-34, бартавы нумар 22 «чырвоны». Узнагароджаны мэдалём “За адвагу”.

Дзячэнка Андрэй Аляксандравіч, маёр, намесьнік камандыра авіяцыйнае эскадрыльлі 47-га АЗАП, Варонеж, Варонежская вобласьць. У Сірыі быў пілётам, меркавана, Су-34, бартавы нумар 25 «чырвоны», RF-95811. Атрымаў званьне «героя Расейскай Фэдэрацыі» за забойствы мірнага насельніцтва Сірыі.

Раманаў Віктар Міхайлавіч (архіў на профіль), палкоўнік, старэйшы штурман-выпрабавальнік лётна-выпрабавальнага цэнтру 929 ДЛВЦ. Атрымаў званьне «героя Расейскай Фэдэрацыі» за забойствы мірнага насельніцтва Сірыі.

Меркаваны ўдзел у сірыйскай апэрацыі на ратацыйнай падставе

Штурбабін Сяргей (архіў на профіль) штурман, лётчык першае клясы 559-га БАП, Марозаўск, Растоўская вобласьць. У Сірыі, меркавана, быў пілётам Су-34, бартавы нумар 03 «чырвоны», RF-93830.

Перадзеры Андрэй (архіў на профіль), капітан, штурман 47-га АЗАП, Варонеж, Варонежская вобласьць. У Сірыі, меркавана, быў пілётам Су-34, бартавы нумар 26 «чырвоны», RF-95807. 04 чэрвеня 2015 г. падчас няўдалага прызямленьня франтавога бамбоўца Су-34 на аэрадроме Бутурлінаўка, Перадзерый і Барашаў, якія былі на борце, былі лёгкія параненыя (архіў).

Барашаў Дзьмітры (архіў на профіль), маёр, камандыр зьвяна 47-га АЗАП, Варонеж, Варонежская вобласьць. У Сірыі, меркавана, быў пілётам Су-34, бартавы нумар 26 «чырвоны», RF-95807. 04 чэрвеня 2015 г., падчас няўдалага прызямленьня франтавога бамбоўца Су-34 на аэрадроме Бутурлінаўка, Перадзерый і Барашаў, якія былі на борце, былі лёгкія параненыя (архіў).

Удзельнічалі ў сірыйскай апэрацыі, але не былі апазнаныя

На скрыншоце ніжэй чальцы экіпажаў лятакоў Су-34, асобы якіх пакуль не ідэнтыфікаваныя. Павярнуліся зь Сірыі 15 сакавіка 2016 г.

Усе вышэйпералічаныя афіцэры былі ўзятыя на кантроль, дэталёвая інфармацыя пра іх перададзеная ў адпаведныя структуры. У выпадку іхнае спробы, альбо спробы іхных калегаў ажыцьцявіць злачынны загад у дачыненьні Украіны, супроць іх будуць ужытыя «санкцыі». Таксама, гэтыя асобы маюць быць прыцягнутыя да вайсковых трыбуналаў, падчас якіх будзе належным чынам вывучаны іхны ўдзел у генацыдзе сірыйскага народу.

Матар’ял да публікацыі падрыхтавалі валянтэры Ірына В., Дзьмітры Б.

На беларускую мову пераклаў Дзяніс Івашын.

(CC BY 4.0) Інфармацыя падрыхтаваная адмыслова для сайту InformNapalm.org, падчас поўнага або частковага перадруку й выкарыстаньня матар’ялу наўпроставая спасылка на аўтара і наш праэкт абавязковая.

Мы заклікаем чытачоў актыўна пашыраць нашыя публікацыі ў сацыяльных сетках. Наданьне матар’ялам расьледаваньняў шырокае агалоскі здатнае зьмяніць хаду інфармацыйнага і баявога супрацьстаяньня з Крамлём. Разам пераможам!