Расейская кампанія «Навіком», якая прадстаўляе на рынку РФ амэрыканска-швайцарскі Garmin, зьдзяйсьняе пастаўкі высокатэхналягічнага навігацыйнага абсталяваньня з падвайным прызначэньнем і не хавае, што гэтае абсталяваньне купляюць і расейскія вайскоўцы. У зьвязку з гэтым InformNapalm публікуе інсайдэрскую інфармацыю пра дзеяньні «Навікома» (navicom.ru) і дадзеныя пра карпаратыўныя пастаўкі навігатараў Garmin (garmin.com) для баявых гэлікоптэраў, а таксама дадзеныя пра выпадкі выкарыстаньня навігацыйнага начыньня ў зоне баявых дзеяньняў на тэрыторыі Украіны.
Валянтэрам InformNapalm быў перададзены аўдыёзапіс гутаркі пакупніка з прадаўцом навігатараў Garmin у краме «Навіком» у Маскве. Чалавек, які перадаў нам запіс, зазначыў, што прадстаўнік кампаніі «Навіком» выхвальваў перавагі навігатараў Garmin, асабліва падкрэсьліваючы, што гэтае начыньне й мапы расейскія вайскоўцы набывалі дзеля выкарыстаньня ва Украіне і Сірыі. Кіраўніцтва ж «Навікома» усяляк спрыяе вайскоўцам, кансультуе й навучае, як карыстацца навігацыйным абсталяваньнем, удакладняе й карэктуе ў лічбавым фармаце некаторыя тапаграфічныя вобласьці, пункты й вышыні. Можа ўсё гэта й не было б такім значным, але Garmin зьяўляецца швайцарска-амэрыканскай кампаніяй, якая пастаўляе на расейскі рынак высокатэхналягічнае навігацыйнае абсталяваньне з падвайным прызначэньнем. А як жа ж санкцыі?
Стэнаграма размовы ў «Навікоме» (падаем у арыгінале)
InformNapalm зацікавіўся карпаратыўнымі пастаўкамі абсталяваньня Garmin у Расею падчас дзеяньня санкцыяў на пастаўкі прадукцыі вайсковага й падвайнога прызначэньня. У прыватнасьці, была знойдзеная наступная інфармацыя:
1. 1 верасьня 2014 году «Навіком» анансаваў даступнасьць мапаў Украіны для начыньня Garmin.
2. ТАА «Прадпрыемства мадэрнізацыі авіяцыйных комплексаў» («МАК») і карпарацыя Garmin у красавіку 2015 году ўклалі дамову пастаўкі абсталяваньня, нібыта для трэнажэраў Cessna 172S.
«МАК» шчыльна супрацоўнічае з расейскім абарончым комплексам, і, вядома ж, ніхто ня будзе даваць гарантыі мэтавага невайсковага выкарыстаньня гэтага абсталяваньня і таго, што гэты кантракт ня ёсьць прыкрыцьцём для пастаўкі абсталяваньня для вайсковых мэтаў. Тым болей, што прадпрыемства «МАК» атрымала ліцэнзіі на права распрацоўкі і вытворчасьці авіяцыйнае тэхнікі № 10656-АТ-Р, № 10675-АТ-П), у тым ліку падвойнога прызначэньня.
3. Расея працягвае будаваць для патрэбаў ЗС РФ і на экспарт ударныя баявыя гэлікоптэры Мі-35, абсталяваныя навігацыйнай сыстэмай GPS115L GARMIN з блёкам спалучэньня VPS-200.
У сьнежні 2014 году была зьдзейсьненая пастаўка гэлікоптэраў у Заходнюю вайсковую акругу, у ліпені 2015 году ФСБ абвесьціла тэндэр на пастаўку гэлікоптэраў Мі-35. І гэта без уліку экспарту машынаў з GPS115L GARMIN.
4. Расейскія кампаніі, якія маюць заводы ў іншых краінах і выконваюць замовы МА РФ, могуць набываць абсталяваньне Garmin для вайсковай тэхнікі.
5. У вайскоўца ГРУ РФ Сяржанта Аляксандрава, якога ўзялі ў палон падчас бою пад г. Шчасьцем на Луганшчыне ў траўні 2015 году жаўнеры 92-й брыгады ЗСУ і засуджанага на тэрыторыі Украіны, быў з сабою смартфон з фатаздымкамі, у адным зь якіх – навігатар Garmin GPSMAP 76. Гэтая прылада ёсьць на сайце кампаніі. У фатаздымку можна пабачыць міну ТМ-62, каардынаты прылады сьведчаць пра тое, што гэта пазыцыя «Фасад» ЗСУ. Выведнікі, якія ўдзельнічалі ў затрыманьні Ярафеева й Аляксандрава, паведамілі валянтэрам InformNapalm пра сваю здагадку, што расейскія вайскоўцы займаліся мінаваньнем падыходаў да ўкраінскае пазыцыі.
6. Пастаўкі нібыта турыстычных GPS-навігатараў Garmin для НЗФ адбываюцца па розных каналах і маюць масавы характар на працягу ўсяго часу агрэсіі РФ супроць Украіны. Так што павялічэньне попыту на начыньне і на ўкраінскія мапы кампанія наўпрост не магла не заўважыць. Прыклад адной з паставак «для артылерыстаў брыгады «Призрак» (рас.)» (назоў абсталяваньня ўдакладняецца: Garmin Etrex 30…). У фота з навігатарамі пазуе прадстаўнік каардынацыйнага цэнтру дапамогі «наваросіі» у Пецярбургу Аляксандар Любімаў.
7. Нарэшце, фатаздымак, які пабачыў увесь сьвет: асноўным навігацыйным абсталяваньнем расейскага бамбоўца зьяўляецца звычайны навігатар.
Вынікае, што вайсковыя дзеяньні супроць украінскае арміі расейскія вайскоўцы й тэрарысты зьдзяйсьняюць з дапамогаю абсталяваньня, вырабленага ў тым ліку і ў ЗША – краіне, якая пасьлядоўна выступае за выкарыстаньне санкцыяў да агрэсара й падтрымлівае Украіну ў абароне незалежнасьці й тэрытарыяльнае цэласнасьці. Нават калі ў выпадку зь сяржантам Аляксандравым гэта і не наўпроставая пастаўка МА РФ, аднак, з улікам вышэйпададзенага дыялёгу ў кампаніі «Навіком», гэтая прадукцыя з падвойным прызначэньнем, выкарыстаная ў неабвешчанай вайне расейскіх сілавых структураў на тэрыторыі Украіны.
Дзейныя санкцыі ЗША: 27 сакавіка 2014 году спыненая выдача амэрыканскім кампаніям ліцэнзіяў на экспарт у Расею «патэнцыйна небясьпечнае прадукцыі». 28 сакавіка 2014 году спыненае ліцэнзаваньне экспарту ў Расею тавараў і паслугаў з абаронным прызначэньнем.
Спадзяемся, што нашая публікацыя будзе адпаведным сыгналам для далейшага разьбіральніцтва што да гэтай тэмы. Спадзяемся, што кампэтэнтныя ворганы ЗША зьдзейсьняць праверку паставак тавараў вайсковага й падвойнага прызначэньня ў РФ, якія выкарыстоўвае краіна-агрэсар, абыходзячы накладзеныя санкцыі. Таксама спадзяемся, што кампанія Garmin праверыць дзейнасьць свайго эксклюзыўнага дыстрыбутара ў Расеі ЗАТ «Навіком» і істотна зьменшыць намэнклятуру паставак – да тавараў выключна побытавага прызначэньня.
За збор і аналіз інфармацыі дзякуем Кацярыну Ярэська й Дзьмітрыя К.
Пераклаў на беларускую мову Дзяніс Івашын.
(CC BY 4.0) Інфармацыя падрыхтаваная адмыслова для сайту InformNapalm.org, падчас поўнага або частковага перадруку й выкарыстаньня матар’ялу наўпроставая спасылка на аўтара і наш праэкт абавязковая.
Заклікаем чытачоў актыўна пашыраць нашыя публікацыі ў сацыяльных сетках, на форумах і СМІ. Наданьне матар’ялам расьледаваньняў шырокае агалоскі здатнае зьмяніць хаду інфармацыйнага і баявога супрацьстаяньня з Крамлём.
Прочитайте нову книгу "Донбас у вогні". Це керівництво буде корисно для журналістів, дослідників, військових експертів, дипломатів та всіх, хто збирає інформацію про війну на Донбасі.
Падчас вышкалаў «Захад-2017» расейскі Ка-52 выпусьціў тры ракеты і пашкодзіў машыну кіраваньня комплексу «Леер-3»
Дзяніс Івашын: Беларусь – гэта лайт-вэрсія ДНР. Гарачы камэнтар тэлеканалу Белсат
Кантракт у баявікі “наваросіі” аформлены ў Валгаградзкім ваенкамаце
Усход – справа тонкая: 29 вайскоўцаў з 291-й артбрыгады ЗС РФ у Сірыі
22-я брыгада СпН ГРУ РФ. Два мэдалі за Данбас і адпачынак у Нікарагуа