Напрыканцы траўня Ukrainian Cyber Alliance эксклюзіўна перадаў міжнароднай выведвальнай супольнасьці InformNapalm пакет дакументаў, ліставаньня й асабістых фатаздымкаў з пошты расейскага найміта й тэрарыста Аляксандра Івіна. У выніку вывучэньня гэтых дадзеных і правядзеньня дадатковай выведкі адкрытых крыніцаў інфармацыі раскрытыя цікавыя падрабязнасьці. Мы вызначылі сувязі й дадзеныя што да ліквідацыі расейскіх баявікоў, грамадзянаў РФ, якія ваявалі сьпярша на Данбасе, а потым у складзе ПВК «Вагнэр» былі перакінутыя ў Сірыю.

Ідэнтыфікацыйныя дадзеныя Аляксандра Івіна (рас. Александр Ивин)

Івін Аляксандар Мікалаевіч. Дата нараджэньня: 15.12.1966 г. Пашпарт: сэрыя 60 12, нумар 115271, выдадзены 20.01.2012 г. аддзелам УФМС па Растоўскай вобласьці ў Савецкім раёне гораду Растоў-на-Доне. З 8 лютага 2013 г. зарэгістраваны ў г. Сочы, Лазараўскі раён, завулак Паўлава, 10, кв. 8. Вайсковы білет: сэрыя ГД, нумар 1642790. Уваходзіць у склад так званых казачых арганізацыяў: «Всевеликое Войско Донское», «Казачья национальная гвардия» (рас.). Быў тройчы засуджаны: у 1995, 2002 і 2007 гадох. У сацсеціве “VK” (архіў акаўнту, фотаальбому 1, 2), інфармацыя ў базе дадзеных Цэнтру «Міратворац».

Службовы сьпіс

З 25 чэрвеня 2014 г. удзельнічаў у баявых дзеяньнях на Данбасе ў званьні маёру ў складзе расейска-акупацыйных войскаў. Зь сьнежня 2014 г. залічаны ў 5-ю асобную мотастралковую брыгаду (в/ч 08805) 1-га акупацыйнага армейскага корпусу (Данецк) 8-й агульнавайсковай арміі ЗС РФ.

У 2016 годзе падпісаў кантракт з прыватнай вайсковай кампаніяй Прыгожына-Пуціна «Вагнэр». Асабісты нумар М-3363. Выконвае баявыя задачы ў складзе 6-га штурмавога атраду (ША, рас. – ШО) ПВК «Вагнэр». Нядаўна зрабіў тату на патыліцы ў выглядзе шаўрону 6-га ША. Згодна зь ягоным ліставаньнем, зь сярэдзіны студзеня 2018 г. знаходзіцца ў паўгадовай камандыроўцы ў Сірыі.

У пошце Івіна выяўлены цікавы групавы фатаздымак наймітаў 6-га штурмавога атраду.

Валянтэры InformNapalm ідэнтыфікавалі:

1) Забалотны Раман Васілевіч, удзельнічаў у баявых дзеяньнях на Данбасе, увосень 2017 г. захоплены ў палон й пакараны баявікамі ІДІЛ;

2) колішні камандыр мінамётнае батарэі 9-га асобнага мотастралковага палку расейска-акупацыйных войскаў, найміт з пазыўным «Африканич» (рас). У 2016 годзе падпісаў кантракт з ПВК пасьля таго, як батарэя пад ягоным камандаваньнем патрапіла пад вагонь артылерыі ўкраінскіх марпехаў пад Марыюпалем;

3) Паддубны Сяргей Міхайлавіч (пазыўны “Нямко”), дата нараджэньня 14.10.1980 г. Ваяваў на Данбасе, загінуў 28.09.2017 у сірыйскім горадзе Ціас, правінцыя Хомс.  У даведцы пра сьмерць пазначаная прычына гібелі: спаленьне цела;

4) Барысенка Андрэй Андрэевіч, дата нараджэння – 27.05.1981 г., жыў у г. Перм. Удзельнічаў у баявых дзеяньнях на Данбасе, пазьней у Сірыі. У сацсеціве “VK” (архіў акаўнту, фотаальбому, кантактаў), інфармацыя ў базе дадзеных Цэнтру «Міратворац»).

Паводле наяўнай інфармацыі, расейскія “вагнэраўцы” зазнаюць у Сірыі досыць вялікія страты. Тыя, хто выжыў на Данбасе, знаходзяць сваю сьмерць у гэтай арабскай краіне.

Чытайце таксама іншыя расьледаваньні InformNapalm што да ПВК «Вагнэр».

Дзякуем @Elshad_Babaev і іншым нашым чытачам у “твітэры”, якія адгукнуліся на просьбу дапамагчы, актыўна пашыралі наш заклік і дапамаглі апазнаць баявікоў у групавым фатаздымку. Калі вы ведаеце дакладныя дадзеныя іншых баявікоў з гэтага фота – дасылайце камэнтары на сайт або на “твітэр”.

Помогите InformNapalm опознать этих боевиков #роа воевавших на #Донбасс'е. Это части пазла, который хотим дособирать. pic.twitter.com/0S20WaPSrZ

— InformNapalm (@InformNapalm) June 3, 2018

Матар’ял падрыхтавалі Міхаіл Кузьняцоў і Раман Бурко адмыслова для сайту міжнароднае выведвальнае супольнасьці InformNapalm.

Пераклаў на беларускую мову Дзяніс Івашын.

Пашырэньне й перадрук з спасылкаю на крыніцу вітаюцца!
(Creative Commons — Attribution 4.0 International — CC BY 4.0 )

Рабіце рэпост і дзяліцеся зь сябрамі.
Падпісвайцеся на старонкі супольнасьці InformNapalm у Фэйсбук / Твітэр / Telegram
і апэратыўна атрымлівайце інфармацыю пра новыя матар’ялы.