З 6 па 9 сакавіка 2017 году ў Міжнародным судзе ААН у Гаазе адбываліся слуханьні паводле пазову Украіны супроць РФ што да шэрагу абвінавачваньняў у парушэньні міжнароднага права і агрэсіі супроць украінскага народу.

Праз ўсьведамленьне сваёй вельмі слабой пазыцыі ў судзе ў зьвязку зь вялікай колькасьцю доказаў, якія абвяргаюць усе асноўныя аргумэнты расейскага боку, прапагандысты РФ перайшлі да адпрацаваных мэтодаў інфармацыйнае вайны.

Сёньня мы назіраем новы віток першага этапу маштабнае інфармацыйнае правакацыі Расеі з выкарыстаньнем палонных вайскоўцаў, мэтай якой зьяўляецца абвінавачваньне Украіны ў тэрарызьме.

Пасьля правядзеньня ўсіх слуханьняў у Гаазе, падкантрольная РФ інфармацыйная агенцыя баявікоў «NEWS FRONT» зрабіла тэрміновае паведамленьне (пакідаем у арыгінале):

«Срочно! В ЛНР задержали и допросили убившего Анащенко украинского диверсанта».

Агенцыя паказвае нібыта апэратыўныя здымкі допыту «ўкраінскага дывэрсанта». У відэа вайсковец Сяргей Іванчук, які падаецца за маёра Збройных сілаў Украіны, распавядае пра тое, што  нібыта ён асабіста ліквідаваў так званага начальніка кіраваньня  «Народнай міліцыі ЛНР» палкоўніка Алега Анашчанку.

Для рэалізацыі правакацыі расейскія спэцслужбы, верагодна, выкарыстоўвалі палонных, захопленых у сярэдзіне лютага. Нагадаем, што паводле паведамленьня «Украінскае праўды», 11 лютага некалькі вайскоўцаў, якія дысьлякаваліся на перадавой у Луганскае вобласьці, зьніклі і зь імі адсутнічае сувязь.

Характэрна, што сам Анашчанка быў забіты 4 лютага 2017 году ў выніку падрыву аўтамабіля ў Луганску (то бок больш за месяц таму, але відэа з допыту было выкладзенае толькі зараз). Ягоную сьмерць таксама зьвязвалі з помстаю Платніцкага за магчымы ўдзел у падрыхтоўцы вайсковага перавароту, а пра датычнасьць украінскіх спэцслужбаў ня верылі нават самі баявікі і прарасейскія блёгеры. Наадварот, ліквідацыя Анашчанка мае агульную тэндэнцыю з забойствамі, у якіх прасочваецца сьлед расейскіх спэцслужбаў (сьпіс ліквідаваных).

Але самым галоўным зь відэа допыту палоннага афіцэра зьяўляецца не прызнаньне ў ліквідацыі Анашчанкі, але заява пра тое, што ўкраінскі спэцназ арганізуе дывэрсіі ня толькі на непадкантрольнай украінскай тэрыторыі, але нават у Белгарадзкай вобласьці Расеі. Такім чынам, расейскія прапагандысты вырашылі выканаць замову Крамля што да абвінавачваньня ўкраінцаў у тэрарызьме супроць расейцаў.

На гэты момант не было зафіксаванае яшчэ аніводнага інцыдэнту, які можна было б аднесьці да ўкраінскае дывэрсіі ў Белгарадзе, або ў любым іншым горадзе Расеі. Але праз новы віток інфармацыйных апэрацыяў расейскага боку сьлед чакаць на любыя цынічныя правакацыі. Гісторыя сэрыі тэрактаў з выбухамі жылых дамоў у расейскіх гарадох Буйнакску, Маскве і Валгадонску 4-16 верасьня 1999 года сьведчыць пра тое, што дзеля апраўданьня ўвядзеньня войскаў у Чачэнію і падвышэньня рэйтынгу Пуціна расейскія спэцслужбы здатныя ахвяраваць сотнямі грамадзянаў РФ.

Зараз, калі Гаага ўжо навісла над расейскім кіраўніцтвам, Крэмль здатны зьдзейсьніць тэракты на ўласнае тэрыторыі дзеля абвінавачваньня Украіны ў тэрарызме і абгрунтаваньня далейшага ўвядзеньня войскаў і эскаляцыі канфлікту.

Гэтаму чыньніку мае быць нададзеная асаблівая ўвага міжнароднае супольнасьці дзеля запабяганьня інфармацыйным маніпуляцым, якія адбываюцца на тле актывізацыі судовага працэсу.

Матар’ял да публікацыі падрыхтаваў Andrew Lysytskiy.

Пераклаў на беларускую мову Дзяніс Івашын.

(CC BY 4.0) Інфармацыя падрыхтаваная адмыслова для сайту InformNapalm.org, падчас поўнага або частковага перадруку й выкарыстаньня матар’ялу наўпроставая спасылка на аўтара і наш праэкт абавязковая.

Заклікаем чытачоў актыўна пашыраць нашыя публікацыі ў сацыяльных сетках, на форумах і СМІ. Наданьне матар’ялам расьледаваньняў шырокае агалоскі здатнае зьмяніць хаду інфармацыйнага і баявога супрацьстаяньня з Крамлём.

«Цемру адолее полымя / Ignis vincit tenebris» – крэда InformNapalm.