У выніку OSINT-расьледаваньня InformNapalm здабытыя новыя сьведчаньні ўдзелу вайскоўцаў рэактыўнага дывізыёну 18-й асобнай мотастралковай брыгады (в/ч 27777, Ханкала/Калінаўская, з 2017 году перафармаваная ў 71-ы МСП адноўленай 42-й дывізіі) Паўднёвае вайсковае акругі ЗС РФ у гібрыднай вайне супроць Украіны. Мы апазналі двух раней незафіксаваных вайскоўцаў ЗС РФ. Таксама выявілі дадзеныя пра баявыя ведамасныя ўзнагароды, якія яны атрымалі за выкананьне адмысловых задачаў – удзел у захопе Крыма й баявыя дзеяньні на Данбасе.

Пачаткам для расьледаваньня стаўся фатаздымак артылерыстаў-реактыўнікаў, выяўлены ў акаўнце сацсеціва Артура Басырава.

   Артур Басыраў

Ідэнтыфікацыйныя дадзеныя:

Нарадзіўся 5 сьнежня 1991 г. у г. Ніжнякамск, Татарстан. Выпускнік «Татарстанскага кадэцкага корпусу» 11-й школы г. Ніжнекамска. Тэрміновую вайсковую службу праходзіў у 2010-2011 гадох. З 2012 году – вайсковец кантрактнае службы выведпадразьдзяленьня 18-й АМСБр ЗС РФ. Станам на студзень 2014 год – вайсковец узводу кіраваньня рэактыўнага дывізыёну гэтай жа брыгады. У красавіку 2014 году ўзнагароджаны ведамасным мэдалём МА РФ «За возвращение Крыма» (рас).

У сацсетках: профіль “VK” (архівы профілю, фотаальбому, кантактаў), fotostrana.

Найбольш цікавым для расьледаваньня зьяўляецца фатаздымак з фотаальбому Басырава, зроблены падчас ягонае баявое камандыроўкі й выкладзены ў кастрычніку 2014 году. У фота можна пабачыць, што на тле кабіны 2Б26 (баявая машына БМ-21 РСЗВ 9К51 на шасі КамАЗ-5350) пазуюць тры расейскія вайскоўцы ў нестатутнай форме адзеньня. На левай назе вайскоўца, што сядзіць у кабіне (ягоныя ідэнтыфікацыйныя дадзеныя глядзіце ніжэй), маецца белая ідэнтыфікацыйная павязка. Гэтыя павязкі былі характэрным ідэнтыфікатарам «свой-чужы», які выкарыстоўвалі расейскія вайскоўцы й баявікі ў 2014 годзе.

У гэтым жа фатаздымку мы апазналі вайскоўца, зафіксаванага ў кабіне рэактыўнае сыстэмы залпавага вагню. Было вызначанае, што гэта афіцэр пазначанага дывізыёну.

   Аляксандар Цімаеў

Ідэнтыфікацыйныя дадзеныя

Нарадзіўся 10 верасьня 1989 г. у с. Калтасы, Башкартастан. У 2011 годзе скончыў Екатэрынбургскую вышэйшую артылерыйскую камандную вучэльню, у 2012 годзе – гадавы курс пры Міхайлаўскай вайсковай артылерыйскай акадэміі ў Санкт-Пецярбургу. Станам на 2012-2014 гг. – афіцэр з званьнем лейтэнанту, камандыр 2-га вагнявога ўзводу 2-й рэактыўнае батарэі рэактыўнага дывізыёну в/ч 27777. Станам на 9 траўня 2015 г. – старэйшы лейтэнант. Апроч юбілейнага мэдалю «За ўдзел у вайсковым парадзе» узнагароджаны таксама мэдалём «За возвращение Крыма» (рас.) і мэдалём «Суворава» (якія масава давалі ўдзельнікам захопу Крыма й летне-восеньскіх баёў на Данбасе ў 2014 годзе). На гэты момант служыць у тым жа рэактыўным дывізыёне, меркавана, ва ўзводзе кіраваньня.

У сацсетках: профіль “VK1” (архівы профілю, фотаальбому, кантактаў), профіль “VK2” (архівы профілю, фотаальбому, кантактаў) неактыўны, профіль “ОК” неактыўны зь верасьня 2014 году, у ім маецца фота 3 артылерыстаў-реактыўнікаў з той жа сэрыі.

У фота парадны кіцель Аляксандра Цімаева з мэдалямі й характэрнай стужкаю, у якім пазуе ягоная сваячка.

Нагадваем, што гэта ня першая фіксацыя рэактыўнага дывізыёну 18-й брыгады ў кантэксьце баявых камандыровак на Данбас. У лютым 2016 году InformNapalm ужо падаваў сьведчаньні пра ўдзел у вайне на Данбасе артылерыстаў рэактыўнага дывізыёну 18-й АМСБр ЗС РФ – капітана Руслана Хафізава й ягоных калег-афіцэраў: Руслана Сатдынава, Максіма Дубініна й Антона Гарэева.

Чытайце таксама:

Удзел РСЗВ 18-й АМСБр ЗС РФ у абстрэлах Украіны. Фотафакты й геалякацыя

Даведка: 18-я АМСБр, в/ч 27777, мейсца дысьлякацыі: населеныя пункты Ханкала й Калінаўская, Чачэнія. З 2017 году брыгада перафармаваная ў 70-ы мотастралковы полк адноўленай 42-й мотастралковай дывізіі 58-й агульнавайсковай арміі ПВА. Разам з 18-й у палкі таксама былі перафармаваныя й іншыя брыгады, дысьлякаваныя ў Чачэніі: колішняя 8-я АМСБр «горная» трансфармаваная ў 291-ы мотастралковы полк (в/ч 65384 п. Барзой), колішняя 17-я АМСБр ператвораная на 71-ы мотастралковы полк (п. Шалі). Апроч гэтага, у склад 42-й МСД уваходзяць іншыя асобныя часткі й падразьдзяленьні. Фармаваньне дывізіі мае быць завершанае да канца 2017 году. Крыніца – milkavkaz.

Заўвага рэдакцыі: Не прамінулі й содні, як актыўны акаўнт сацсеціва (архівы старонкі да зачысткі й пасля) старэйшага лейтэнанта Аляксандра Цімаева быў грунтоўна зачышчаны з прычыны настойлівай рэкамэндацыі расейскіх спэцслужбаў. З фотаальбому афіцэра зьніклі ўсе фатаздымкі. Але гэта не праблема, з умовай яўкі з пакаяньнем і надананьнем інфармацыі пра іншых расейскіх ваенных злачынцаў, якія прайшлі праз Крым і Данбас, Цімаеў заўжды можа разьлічваць на спагадлівасьць рэдакцыі InformNapalm. Мы гатовыя таксама вярнуць яму “згубленыя” фатаздымкі.

Матар’ял да публікацыі падрыхтаваў Іраклі Камахідзэ адмыслова для сайту міжнароднае выведвальнае супольнасьці InformNapalm.

Пераклаў на беларускую мову Дзяніс Івашын.

Падчас выкарыстаньня інфармацыі актыўная спасылка на крыніцу абавязковая.
(Creative Commons — Attribution 4.0 International — CC BY 4.0 )

Рабіце рэпост і дзяліцеся зь сябрамі.
Падпісвайцеся на старонкі супольнасьці InformNapalm у Фэйсбук / Твітэр / Telegram
і апэратыўна атрымлівайце інфармацыю пра новыя матар’ялы.