Валянтэрская аэравыведка перадала міжнароднай выведвальнай супольнасьці InformNapalm эксклюзыўныя дадзеныя, якія сьведчаць пра факт парушэньня аб’яднанымі расейска-тэрарыстычнымі сіламі умоваў адводу цяжкога ўзбраеньня паводле менскіх дамоўленасьцей.
Гэтак, з 18 па 23 верасьня 2016 году былі зафіксаваныя як мінімум 8 адзінак 122-мм САУ 2С1 «Гвазьдзіка» (адна самаходная артылерыйская батарэя і адзін няпоўны вагнявы ўзвод) за 17 км ад лініі разьмежаваньня (пазначаныя артылерыйскія ўстаноўкі маюць быць адведзеныя ня меней за 25 км). Апроч гэтага, на здымку можна пабачыць 2 адзінкі МТ-ЛБ і 12 адзінак вайсковай аўтамабільнай тэхнікі. Каардынаты зафіксаванай лякацыі ў фатаздымку на мапе: 47.110295, 38.049310.

Валянтэры InformNapalm таксама зьдзейсьнілі маніторынг спадарожнікавых здымкаў гэтага раёну й атрымалі неабвержныя доказы таго, што яшчэ ў сакавіку 2016 году ў пазначанай мясцовасьці не было аніякага ўзбраеньня й тэхнікі, паступовае насычэньне тэхнікай і САУ фіксуецца з пачатку чэрвеня па верасень 2016 году.

У здымку аэравыведкі, зробленым у другую палову верасьня, можна пабачыць ужо 8 (!) 122-мм САУ.
Гэта ёсьць сьведчаньнем таго, што аб’яднаныя расейска-тэрарыстычныя сілы ня толькі не адвялі цяжкое ўзбраеньне, але й сфармавалі паўнавартасную самаходную артылерыйскую батарэю й адзін няпоўны вагнявы ўзвод за 17 км ад лініі разьмежаваньня.

Нагадаем, што гэта ня першы факт парушэньняў умоваў менскіх дамоўленасьцей з боку расейскіх баявікоў. Раней валянтэры InformNapalm таксама падавалі доказы, сабраныя ў выніку маніторынгу й аналізу сацыяльных профіляў расейскіх наймітаў, і нават публікавалі «даведнік для АБСЭ» з пазначэньнем каардынатаў аб’ектаў для неабходнай пільнай праверкі.

Характэрна, што ў  выніку нядаўняй апэрацыі ўкраінскіх хактывістаў, падчас якой былі ўзламаныя 13 электронных паштовых скрыняў так званых «вайсковых камэндатураў ДНР» была атрыманая інфармацыя, што ўкраінскія сілавікі цалкам захоўваюць рэжым спыненьня вагню. Пра гэта баявікі дакладваюць у сваіх закрытых данясеньнях, што аднак не замінае расейскім прапагандыстам працягваць сваю актыўную дыскрэдытацыю Украіны і дэзынфармацыю сусьветнае грамадзкасьці.

Глядзіце таксама справаздачу супольнасьці InformNapalm што да фіксацыі й ідэнтыфікацыі 33 тыпаў вайсковай тэхнікі й узбраення, якое было перакінутае на Данбас з Расейскай Фэдэрацыі.

Пераклаў на беларускую мову Дзяніс Івашын.

(CC BY 4.0) Інфармацыя падрыхтаваная адмыслова для сайту InformNapalm.org, падчас поўнага або частковага перадруку й выкарыстаньня матар’ялу наўпроставая спасылка на аўтара і наш праэкт абавязковая.

Заклікаем чытачоў актыўна пашыраць нашыя публікацыі ў сацыяльных сетках, на форумах і СМІ. Наданьне матар’ялам расьледаваньняў шырокае агалоскі здатнае зьмяніць хаду інфармацыйнага і баявога супрацьстаяньня з Крамлём.