Паводле справаздачы праваабарончай арганізацыі SNHR (The Syrian Network for Human Rights) з 17 сьнежня 2015 году (pdf-вэрсія справаздачы) вызначанае і пацьверджанае, што падчас дзеяньняў расейскіх збройных сілаў у Сірыі былі забітыя 570 мірных грамадзянаў, сярод іх 152 дзіцяці і 60 жанчынаў. Гэта не канчатковая лічба, у справаздачы фігуруюць толькі пацьверджаныя выпадкі, але й гэтая лічба дзівіць сваімі маштабамі. Міжнародная валянтэрская супольнасьць InformNapalm працягвае сэрыю публікацыяў у выяўленьні і дэманстрацыі дадзеных пра канкрэтных пілётаў, якія выконваюць злачынныя загады вышэйшага вайсковага кіраўніцтва Расейскай Фэдэрацыі.

Сваімі дзеяньнямі мы імкнемся давесьці расейскім вайскоўцам, што бяздумна скідваючы бомбы на жылыя кварталы, яны таксама адказваюць перад чалавецтвам. Зьдзяйсьняючы злачынствы супроць чалавечнасьці, кожны фігурант наступных трыбуналаў мае ведаць, што за ягонымі дзеяньнямі пільна сочыць увесь сьвет. Таму шаблённыя спробы расейскіх мас-мэдыя падаць нашыя дзеяньні ў выглядзе дапамогі тэрарыстам або вэндэты за падзеі на Данбасе ня маюць нічога супольнага з рэчаіснасьцю. Агрэсар разумее толькі мову сілы: сілы вайсковай, сілы палітычнай і сілы інфармацыйнай. Злачынствы супроць чалавечнасьці ня маюць заставацца па-за зонай увагі сусьветнае супольнасьці, а сьведкі або выканаўцы гэтых злачынстваў не ўнікнуць розгаласу. Мы жывем у эпоху сацыяльнае інфармацыйнае прасторы, дзе вельмі складана схаваць сапраўдныя дзеяньні, пад якой бы маскай і лёзунгамі яны не былі схаваныя. Расейская вайсковая апэрацыя ў Сірыі (як ейная афіцыйная паветраная, гэтак і неафіцыйная – наземная складовая частка) мае мэту працягу дэстабілізацыі на Блізкім Усходзе, кантролю над вузламі энэргетычнай транспартнай сыстэмы і захаваньне марыянэткавага рэжыму Крамлю ў асобе Башара Асада. Ні пра якую барацьбу з баявікамі ІДІЛ ня можа быць і гаворкі. Прагматычныя інтарэсы Расеі пераступаюць праз усе нормы права, маралі і чалавечых каштоўнасьцяў.

Канкрэтна дадзеную порцыю інфармацыі пра расейскага афіцэра ПКС РФ валянтэры InformNapalm публікуюць у адказ на атаку расейскай авіяцыі на школу ў Сірыі, падчас якой загінулі 9 чалавек (Крыніца 18+).

У фотаматар’ялах блёгера mr-anderson22 «Трэнаваньні экіпажаў штурмавой авіяцыі да Парада Перамогі 9 траўня» маёр Дымковіч Раман Багданавіч пазуе на тле Су-25СМ з заводзкім нумарам 10365 (архіў: https://archive.is/w5hqu).

На падставе рэестраў Су-25СМ ПКС Расеі, якія выклаў блёгер djoker-lj, атрымалася ідэнтыфікаваць рэгістрацыйны, бартавы і ідэнтыфікацыйны нумар гэтага лятака. Гэта Су-25СМ 960-га штурмавога авіяцыйнага палку (Прыморска-Ахтарск), рэгістрацыйны нумар RF-91956, бартавы нумар 26 «чырвоны», ідэнтыфікацыйны нумар Су-25СМ-76, мае шэрую афарбоўку (архіў: https://archive.is/Lpeq5).

Пацьверджаньне гэтай інфармацыі маецца на партале russianplanes.net (архіў: https://archive.is/FyHLO).

Аналізуючы відэаматар’ялы расейскіх прапагандыстаў, прысьвечаныя падрыхтоўцы тэхнікі на авіябазе “Хмеймім”, быў выяўлены Су-25СМ (ід. надпіс Су-25СМ-76) з зафарбаванымі рэгістрацыйнымі нумарамі і перафарбаванымі бартавымі нумарамі, гэта відаць паводле тону сьвежай шэрай фарбы, якую нанеслі ў раёне кабіны, і падцёкаў шэрай фарбы на белую.

На лятаку нанесены бартавы нумар 25 «чырвоны». Яўная падмена бартавога нумару, бо Су-25СМ 25 «чырвоны» RF-93037 з 960-га ШАП мае іншы шаблён лічбаў – архіў https://archive.is/FKmXM.

Таксама сапраўдны 25 «чырвоны» мае іншы ідэнтыфікацыйны надпіс Су-25СМ-71, але не Су-25СМ-76 (інфармацыя з рэестру блёгера djoker-lj) як на пададзеным відэа. Вынікае, што нам паказалі «перафарбаваны» Су-25СМ, ід. нумар Су-25СМ-76, рэг. нумар RF-91956, бартавы нумар 26 «чырвоны», пілёт гэтага лятаку – маёр Дымковіч Раман Багданавіч, 23.06.1981 г.н., скончыў КВВАУЛ у 2006 годзе.

Кожны вайсковец, кожны афіцэр мае выбар – быць на лаве падсудных на будучых вайсковых трыбуналах або адмовіцца ад выкананьня злачынных загадаў, перайсьці на бок справядлівасьці і правасудзьдзя і даць сьведчаньні супроць сэрыйных забойцаў, якія арганізавалі гэты тэрор дзяржаўнага маштабу.

Матар’ял да публікацыі падрыхтаваў Міхаіл Кузьняцоў

На беларускую мову пераклаў Дзяніс Івашын

(CC BY 4.0) Інфармацыя падрыхтаваная адмыслова для сайту InformNapalm.org, падчас поўнага або частковага перадруку й выкарыстаньня матар’ялу наўпроставая спасылка на аўтара і наш праэкт абавязковая.

Актыўны распаўсюд у сацсетках вітаецца!