Міжнародная валянтэрская супольнасьць InformNapalm падчас зьдзяйсьненьня маніторынгу й выведки профіляў сацыяльных сетак расейскіх вайскоўцаў і наймітаў выявіла чарговыя доказы вайсковай агрэсыі РФ супроць Украіны.

Гэтак, дзякуючы расейскаму тэрарысту ўдалося вызначыць мейсцазнаходжаньне станцыі радыёвыведкі УКХ дыяпазону Р-381Т2 з комплексу Р-381Т “Таран” і комплекс радыёвыведкі “Торн”.

Даведка: Р-381Т «Таран» – аўтаматызаваны комплекс радыёвыведкі (у дыяпазоне ад 1,5 да 1000 мГц), асноўнае выкарыстаньне ў тактычным і апэратыўна-тактычным зьвяне. У базавым варыянце комплекс складаецца з 7 машынаў:

1 адз. Р-381Т3 – АСАІ (аўтаматызаваная станцыя апрацоўкі інфармацыі);

4 адз. Р-381Т2 – станцыя радыёвыведкі УКХ дыяпазону радыёсувязі супраціўніку (30-100 мГц);

2 адз. Р-381Т1 – станцыя радыёвыведкі КХ дыяпазону радыёсувязі супраціўніку (1,5-30 мГц), УКХ дыяпазону радыёсувязі авіяцыі супраціўніку (100-400 мГц), радыёрэлейнай сувязі (300-1000 мГц).

Адлегласьць зьдзяйсьненьня выведкі – да 40 км, авіяцыі – да 100 км. Час выяўленьня р/ст 0,3 сэк. Магчымы варыянт комплексу з 5 машынаў:

1 адз. Р-381Т3;

2 адз. Р-381Т2;

2 адз. Р-381Т1.

Ёсьць варыянты выкарыстаньня асобных машынаў і г.д. Комплекс стварала Харкаўскае КБ «Пратон» на базе МТ-ЛБу ў 80-я гады для замены састарэлага Р-381 «Рама» у ротах Р і РТР АВБ (асобны выведвальны батальён). Рота Р і РТР (прыбл. 70 чалавек асабовага складу) мела структуру:
– Упраўленьне;

– ГАІ (група апрацоўкі інфармацыі), Р-381Т3, нач. ГАІ, афіцэр АІ, 3 перакладчыкі, р/мэханік, кіроўца-мэх.

– 1 узв. р/выведкі, Р-381Т2 – 2 адз., кам.узв., 2 нач.разьліку і г.д.;

– 2 узв. р/выведкі, Р-381Т1 – 1 адз., Р-381Т2 – 1 адз.;

– 3 узв. р/выведкі, Р-381Т1 – 1 адз., Р-381Т2 – 1 адз. (аналягічны 2-ому ўзводу).

На базе “Спарта” акупацыйных войскаў Расеі, якая знаходзіцца на тэрыторыі трэйцяга корпусу Данецкага Нацыянальнага тэхнічнага ўнівэрсытэту таксама зафіксаваны сучасны расейскі комплекс радыёвыведкі «Торн» на базе аўтамабілю КамАЗ.

1 верасьня 2015 году, каманда InformNapalm.org паведамляла пра выяўлены комплекс радыёвыведкі «Торн» паблізу аэрапорту гораду Данецка ля разбуранага шматпавярховага дому з адрэсаю: м.Данецк, вул. Узьлётная, 11а.

На фота ніжэй можна пабачыць: дзьве машыны з расейскага комплексу радыёвыведкі «Торн», простую КШМ і станцыю радыёвыведкі УКХ дыяпазону Р-381Т2 з комплексу Р-381Т “Таран”.

Фота з папярэдняга нашага артыкулу для нагляднасьці і параўнаньня комплексу.

Зазначым, што “адэпты наваросіі” спрабавалі паставіць пад сумнеў інфармацыю ў папярэдняй нашай публікацыі пра выяўлены комплекс радыёвыведкі «Торн», аргумэнтуючы гэта тым, што была зафіксаваная толькі адная машына. Гэтым разам, мы падаем сьведчаньні пра дьве зафіксаваныя машыны комплексу “Торн”. На фатаздымку ніжэй другую машыну можна пабачыць адразу за першай.

Матар’ял да публікацыі падрыхтаваў @BuTaJIu4eK

Attribution International (CC BY 4.0)

Пераклаў Дзяніс Івашын

(с) Інфармацыя падрыхтаваная адмыслова для сайту InformNapalm.org, падчас перадруку й выкарыстаньня матар’ялу актыўная спасылка на аўтара і на наш праэкт абавязковая.