Каманда InformNapalm падрыхтавала чарговае расьледаваньне, якое паказвае, як з дапамогай маскараду з перапрананьнямі расейскія дэсантнікі стваралі бачнасьць нутранага канфлікту ў Крыму.

Нядоўга пратрымалася хлусня расейскіх уладаў пра самаабарону Крыма – празь некалькі месяцаў пасьля анэксыі расейцы афіцыйна прызналі, што не было аніякай самаабароны і народнага апалчэньня – наўпрост расейская армія без апазнавальных знакаў захоплівала ўкраінскі Крым.

Чым далей ад гэтых падзеяў, тым больш ўсплывае дэталяў ўсёй гэтай крымскай авантуры. Памятаеце, як Гіркін-Стралкоў казаў пра галасаваньне ў Крыму: “Дэпутатаў зьбіралі апалчэнцы, каб загнаць іх у залю, каб яны прынялі [рашэньне]. Я быў адным з камандыраў гэтых апалчэнцаў і ўсё бачыў знутры ўласнымі вачыма…”

Апроч пераапранутых “зялёных чалавечкаў”, стала выкарыстоўвалася тэма мясцовай самаабароны, у якую нібы стройнымі шэрагамі ўступалі былыя ўкраінскія сілавікі.

Аднак стройныя шэрагі сілавікоў-здраднікаў, як выявілася, апынуліся пераапранутымі расейскімі вайскоўцамі. Памятаеце вядомага расейскага дэсантніка Мікалая Казлова, які страціў ногі на Данбасе?

Мікалай Казлоў з бацькам. На грудзях у Мікалая – мэдаль “За вяртаньне Крыма”

Як паведамляла “Новая Газэта”, паводле дадзеных вайсковага камісарыята Азёрска, 21-гадовы Мікалай Казлоў, аўтамэханік паводле спэцыяльнасьці, да чэрвеня 2013 году праходзіў тэрміновую вайсковую службу ў вайсковай частцы 73612 31-й асобнай дэсантна-штурмавой брыгады (АДШБр), з 1 жніўня 2013 году служыў там жа паводле кантракту.

Мікалай (леваруч) у форме ўкраінскай міліцыі. Фота з “УКантакце” ягонага бацькі. Травень 2014 году

Першым баявым заданьнем Мікалая Казлова стаўся Крым. Спачатку Мікалай “ахоўваў новы ўрад у форме маладых, неапазнаных і “ветлівых людзей”, а пасьля ў бэркутаўскай форме”. Зараз фатаздымак Мікалая ва ўкраінскай міліцэйскай форме вельмі распаўсюджаны ў інтэрнэце. Шмат хто выказаў здагадку, што расейскія дэсантнікі пад выглядам “Бэркута” удзельнічалі і ў разгоне Майдана ў лютым. Дзядзька расейскага дэсантніка Сяргей Казлоў упэўнены, што фота было зробленае ў калідоры Вярхоўнае Рады, якое Мікалай, верагодна, пад выглядам “бэркутаўца” і ахоўваў.

З мэдалём “За вяртаньне Крыма” Коля вярнуўся ва Ульянаўск. Ажаніўся. І ў жніўні апынуўся ва Украіне, дзе неўзабаве згубіў ногі і вярнуўся дадому інвалідам.

Раненьне Мікалая выклікала зусім розную рэакцыю чальцоў ягонай сям’і. Дзядзька дэсантніка Сяргей Казлоў, IT-адмысловец з Масквы, напісаў пра раненьне пляменьніка на сваёй старонцы ў Facebook: “Ён цяпер бязногі інвалід да канца жыцьця. Крым наш цяпер…”, але бацька – Усевалад Казлоў ацаніў дзеяньні сына, як подзьвіг жаўнера.

“Моладзь дурная, усюды фота выкладвае: з Украіны, з Крыма…”, – кажа Сяргей Казлоў.

Насамрэч, калі зьдзейсьніць выведку профіляў расейскіх дэсантнікаў 31-й АДШБр з Ульянаўска, то адразу можна знайсьці расейскіх вайскоўцаў, якія пераапраналіся ва ўкраінскі “Бэркут”. Вось расейскі дэсантнік Аляксей Ісаеў (https://vk.com/id206011833, архіў: https://archive.is/Cy1Pe) у форме ўкраінскага “Бэркута”:

Фота “УКантакце” Аляксея Іванова

Камэнтары пад фота

Архіў з камэнтарамі пад фота: https://archive.is/DP98y

Прыгледзімся да дэталяў. Зялёная дывановая дарожка з залацістым аздабленьнем здаецца досыць знаёмай. Яна неаднаразова трапляла ў кадр навінаў пра захоп Крымскага парлямэнта і Рады Міністраў, у афіцыйных навінах пра прызначэньні і г.д.

На фота супадае паркет, дывановая дарожка і рэльеф столі. Гэта ускосныя прыкметы, якія дапаўняюць ўжо прадстаўленыя фатафакты.

Такім чынам, маскарад расейскіх дэсантнікаў з ульянаўскай 31-й брыгады ў Крыму, якія пераапранутыя ў форму ўкраінскага “Бэркута” – гэта толькі частка сцэнару навязваньня ідэі “грамадзянскай вайны”, якая ў сваю чаргу была арганізаваная Расейскай Фэдэрацыяй. Працяг гэтага сцэнару зараз мы назіраем на Данбасе.

Матар’ял падрыхтаваў Anton Pavlushko адмыслова для ІnformNapalm, падчас перадруку й выкарыстаньня матар’ялу спасылка на аўтара і наш праэкт абавязковая.

Пераклад Дзяніса Івашына.