Расейскія баявікі выкарыстоўваюць 120-мм мінамёты практычна ля самай лініі разьмежаваньня. Пасьля вывучэньня фота й ідэнтыфікацыі дакладнага мейсца здымкі, было вызначанае, што зброя была ськіраваная ня ў бок ЗСУ, але ў супрацьлеглы кірунак.

Фатаздымак быў выяўлены ў профілі расейскага баявіка, які таксама “засьвяціў” сваю базу ў Данецку. У гэтым мейсцы, яшчэ ў далёкім красавіку 2015 году, мы зафіксавалі забароненую «Менскімі дамоўленасьцямі» вайсковую тэхніку, дый на Google.Maps і на Яндэкс.Мапы можна пабачыць , што гэтую тэрыторыю стала выкарыстоўваюць акупацыйныя войскі РФ у якасьці базы. Свае звычкі расейскія баявікі не мяняюць.

Скрыншот c Liveuamap, каб паказаць мейсца здымкі (48.185633, 37.996295) на мапе (пазначанае зялёным колам) у раёне н.п.Панцеляймонаўка.

Падчас кансультацыяў з вайсковымі адмыслоўцамі (Андрэй Маруга і Maksym Shpak) атрымалася высьветліць, што далёкасьць стральбы залежыць ад вуглу нахілу мінамёту й нумару зараду (ад 1 да 6). Пад пазначаным вуглом нахілу, які зафіксаваны на фота, зь «першым зарадам» мінамёт выстрэльвае на 1100 мэтраў, а з «шостым» на 4800 м. Максымальная далёкасьць стральбы гэтага мінамёту з 6-м зарадам – ​​да 7200 м.

Прыблізны накірунак стральбы 120-мм мінамёту.

Інфармацыя пра правакацыйныя абстрэлы баявікоў досыць часта зьўяляліся ў СМІ, але знайсьці пацьверджаньне гэтых фактаў у выглядзе фота ці відэа было досыць цяжка. У гэтым матар’яле мы падаем прыклад такога пацьверджаньня, калі атрымалася зафіксаваць ня толькі факт прысутнасьці побач зь лініяй разьмежаваньня ўзбраеньня з калібрам 120-мм, але й сам факт правакацыі. Зьдзяйсьняючы абстрэлы кантраляванай баявікамі тэрыторыі яны намагаюцца:

– пераканаць сусьветную супольнасьць у парушэньні «перамір’я» ўкраінскім бокам.

– працягнуць псыхалягічны ціск на баявікоў, якія ўпэўненыя ў тым, што іх першымі абстрэльвае «ўкраінская хунта».

InformNapalm працягвае зьдзяйсьняць выведку адкрытых крыніцаў інфармацыі з мэтай дэманстрацыі фактаў расейскай агрэсыі супроць Украіны.

Матар’ял да публікацыі падрыхтаваў Відаль Сарокін.

На беларускую мову пераклаў Дзяніс Івашын.

(CC BY 4.0) Інфармацыя падрыхтаваная адмыслова для сайту InformNapalm.org, падчас поўнага або частковага перадруку й выкарыстаньня матар’ялу наўпроставая спасылка на аўтара і наш праэкт абавязковая.