Спачатку было Слова

Хактывісты ўкраінскага Кібэральянса (UCA) перадалі для вывучэньня валянтэрам міжнароднае выведвальнае супольнасьці InformNapalm вялікі масыў дадзеных, вынятых з паштовае скрыні намесьніка дырэктара Інстытута краінаў СНД, прэс-сакратара Саюза праваслаўных грамадзянаў, «уцаркоўленага экспэрта» Кірылы Фралова (FrolovLeaks).

У выніку дасьледаваньня электроннага ліставаньня Фралова за 1997-2016 гады можна прыйсьці да высновы, што за маскай праваслаўнага блазна-сэктанта, якім яго лічылі шматлікія, хаваецца чалавек, які досыць актыўна ўдзельнічаў у маніпуляцыях з выкарыстаньнем рэлігіі, дзеяньні якога цалкам адпавядаюць таемнай дактрыне дэстабілізацыі сытуацыі ва Украіне і замаху на ейную тэрытарыяльную цэласнасьць. Шчыльныя стасункі Фралова з дарадцам прэзыдэнта РФ у пытаньнях рэгіянальнае эканамічнае інтэграцыі Сяргеем Глазьевым, патрыярхам Маскоўскім Уладзімерам Гундзяевым (aka Кірыл), а таксама чальцом Рады зьнешняй і абароннай палітыкі, дэпутатам Дзяржаўнай Думы РФ (прызнаная нелегітымнай) і дырэктарам Інстытута краінаў СНД Канстантынам Затуліным прадвызначыла ягоною ролю ў працэсах, мэтаскіравана рэалізаваных на тэрыторыі Украіны.

Аналіз ліставаньня Фралова дазваляе з упэўненасьцю казаць, што рэлігія (ня блытаць зь верай) – гэта ня проста «опіум для народу», але майстэрскі сродак падману, ачмурэньня (замбаваньня) і падпарадкаваньня людзей. Невыпадкова менавіта рэлігію выкарыстоўвалі ў якасьці галоўнае інфармацыйнае зброі ідэолягі і адэпты «русскаго міра».

Эпізод I

Праз тое, што аб’ём інфармацыі вельмі вялікі, мы разаб’ем аналіз на сэрыю эпізодаў. Поўны дамп ліставаньня Кірылы Фралова будзе выкладзены ў апошняй частцы гэтае сэрыі і будзе даступны  кожнаму для больш глыбокага вывучэньня. Зыходныя EML-лісты, на падставе якіх падрыхтаваны гэты эпізод, даступныя ў архіве. У публікацыі пададзеныя скрыншоты й файлы-ўкладаньні з гэтых лістоў.

Агульныя зьвесткі пра Кірылу Фралова вы можаце знайсьці ў «Чысцу» на сайце «Міратворац».

У выніку спэцапэрацыі ўкраінскіх хактывістаў быў атрыманы доступ да паштовае скрыні Фралова frolov_moskva@mail.ru. У дампе маюцца лісты з 1997 году, калі Фралоў ліставаўся зь Mihajlo Fejsa <fejsam@eunet.yu> – філёзафам, супрацоўнікам Сэрбскага унівэрсытэту, адным з тых, хто распальваў русінскія сэпаратысцкія настроі ў Закарпацьці. У гэтай тэме ў ліставаньні Фралова фігуруюць таксама вядомы Пятро Гяцко, сьвятар Дзьмітры Сідар і шмат іншых.

У жніўні 2004 году Фралову з адрэсы ins@apn.ru (Інстытут нацыянальнае стратэгіі, створаны палітолягам Станіславам Бялкоўскім) дасылаюць дакумант ustav-kpd – статут «карпарацыі праваслаўнага дзеяньня», а празь некалькі дзён – і ліст, падпісаны “СБ” і дасланы з адрэсы, якая зьвязвае зь Бялкоўскім (1, 2). Гэты ліст, як і шмат іншых, адлюстроўвае сувязь Бялкоўскага з ФСБ РФ.

У 2004 годзе, у зьвязку з падзеямі першага Майдана ва Украіне, актыўнасьць Фралова значна павялічылася. Наконт «украінскіх» пытаньняў ён лістуецца з Усеваладам Чапліным.

Таксама Фралоў публікуе вялізную колькасьць артыкулаў у падтрымку так званага Севераданецкага сэпаратысцкага зьезду, скіраванага супроць Юшчанкі і наагул цэнтральнай украінскай улады. У сьнежні 2004 году ён ляціць у Кіеў. У гэты момант праяўляецца сеціва кантактаў Фралова ва Украіне, куды ўваходзяць адэсіт Валеры Каўраў, журналіст з Сэвастопалю Сяргей Сьцяпанаў, кіянін Ігар Друзь , Сяргей Майсееў з Харкава і іншыя. Усе пазначаныя асобы – гэта прадстаўнікі прарасейскіх сілаў, арыентаваныя на УПЦ МП і РПЦ.

Фралоў арганізаваў сустрэчу Валеры Каўрава (старшыні так званага Саюза праваслаўных грамадзянаў Украіны) і Міраслава Якімчука з Мадэстам Колеравым, які ў той час працаваў начальнікам упраўленьня прэзыдэнта РФ у міжрэгіянальных і культурных сувязях з замежнымі краінамі. Характэрна, што Колерау забаронены ўезд на тэрыторыю Летувы, Эстоніі й Грузіі, ён абвешчаны персонай нон грата ў Латвіі.

Досыць цікавае ліставаньне Фралова з прарасейскім сьвятаром УПЦ МП а.Дзьмітрыем Познанскім, памерлым у 2010 годзе праз рак. Познанскі дасылаў Фралову мноства матар’ялаў пра Украіну, рабіў для яго пераклады, заклікаў да яшчэ большай актыўнасьці і ўцягненьня ва ўнутраную палітыку Украіны.

Ліставаньне з Анатолем Бірскім (birskiy@list.ru) дае пэўнае ўяўленьне пра тое, як быў атрыманы пэўны ўплыў на Януковіча (пакідаем у арыгінале): “Полагаю необходимым сделать все от себя зависящее для встречи Януковича с Патриархом”, “Сеть УПЦ МП идеальна для массовой пропаганды против НАТО“ . Гэтыя і іншыя выказваньні сьведчаць пра значную ролю Фралова ў сфэры рэлігійнага ўплыву як на асобных палітычных дзеячоў, гэтак збольшага і на вэктар далейшага разьвіцьця Украіны.

З Фраловым ліставаліся й афіцыйныя структуры УПЦ МП. Вось ліст ад прэс-службы, у якім вядзецца пра тэкст Васіля Анісімава – anisimov-rezensia.

Адная з сталых адрэсоў – edinoe@otechestvo.org.ua – зь якой піша меркавана Валеры Каўраў, зьвязаны з адэскім прарасейскім рэсурсам «Единое отечество» (рас., пакідаем у арыгінале): «Мы можем раскрутить наше движение на Антиавтокефальных акциях, антиНАТОвских, антибандеровских и в защиту русского языка. Однако без серьезной поддержки я это все не вытяну» (ліст з 05.02.2007 г.).

У лісьце згадваюцца Максім Барысавіч Курачкін (Макс «Шалёны», kurochkyn-maksym-borysovych) – крымінальны аўтарытэт, бізнэсмэн, палітык, забіты кілерам у 2007 годзе, і Ігар Шувалаў – расейскі паліттэхноляг, адзін з кіраўнікоў т/к «Інтэр».

У ліставаньні з «Единым отечеством» абмяркоўваюцца палітычныя праэкты: kontseptsyya-partyy, сустрэча з Барысам Лукічавым, прадстаўніком сінадальнага аддзелу й кіраўніком справамі Адміністрацыі прэзыдэнта РФ.

Лукічаў зьбіраецца абмяркоўваць фінансаваньне адэскае прарасейскае арганізацыі.

У 2007 годзе (!) арганізуюць акцыю «Георгіеўская стужка».

Сфэра інтарэсаў Фралова распаўсюджваецца ня толькі на Кіеў і Адэсу. Ён падтрымлівае кантакты і з Данецкам, у тым ліку з Канстантынам Зазвонавым (donesm@ukr.net), які ў 2006 годзе ствараў прарасейскую арганізацыю праваслаўнага кшталту. Таксама досыць цікавае ліставаньне з Уладзімерам Карнілавым (“Чысцец”), які ў той час працаваў дырэктарам украінскае філіі ў Інстытуце краінаў СНД і рэгулярна дасылаў Фралову матар’ялы пра сытуацыю ва Украіне: otchet-na-2-marta, ynostrannye-smy-ob-ukraynskyh-vyborah, provokatsyy-ot-novogo-regyona.

Карнілаў сыстэмна займаецца антыдзяржаўнай дзейнасьцю, фактычна прадстаўляе інтарэсы РФ, маніторыць інфармацыйныя рэсурсы, зьбірае інсайдэрскую інфармацыю, выяўляе патэнцыйных агентаў уплыву (напрыклад, predlozhenyya-po-pozdravlyaemym-na-ukrayne-2007). У 2007 годзе ён напісаў Фралову сотні лістоў з данясеньнямі, прасіў дазвол на паездкі, дасылаў дадзеныя з адкрытых крыніцаў і вынікі прыватных сустрэчаў. Зараз Карнілаў жыве ў Эўропе і працягвае займацца антыўкраінскай дзейнасьцю.

Большая частка ліставаньня – гэта артыкулы на ўкраінскую тэматыку – якія Карнілаў адшуквае адмыслова для Фралова, напрыклад, сэрыя публікацыяў Соні Кошкінай.

Зафіксаваныя спробы Карнілава паўплываць на сытуацыю і на міжнародным узроўні.

У 2006 годзе Фралоў атрымаў больш за 200 лістоў ад Анатоля Філатава, які паведамляў яму пра крымскія працэсы, Мэджліс і арганізацыі «расейска-праваслаўнага руху» у Крыме.

Часта ў сваіх лістах гэтыя праваслаўна-прарасейскія дзеячы выпрошваюць грошы і паліваюць адзін аднаго брудам, спрабуюць пазбавіцца ад канкурэнтаў да кармушкі.

Такім чынам, аналіз першае часткі ліставаньня й дакумантаў з паштовае скрыні Кірылы Фралова дазваляе зрабіць наступныя высновы:

1. Падрыўная дзейнасьць супроць Украіны была распачатая РФ практычна адразу пасьля распаду СССР. Згодна з дампам паштовае скрыні Фралова спробы распальваньня сэпаратысцкіх настрояў у Закарпацьці рабіліся яшчэ ў 1997 годзе. Увесь гэты час за кошт дзяржаўнага бюджэту Расейскай Фэдэрацыі на Украіну зьдзяйсьняўся дэструктыўны ўплыў, вылучаліся сродкі на фінансаваньне грамадзкіх арганізацыяў, інстытутаў і сацыялягічных агенцыяў, якія займаюцца зборам і аналізам інфармацыі, што цікавіць Крэмль.
2. Царкоўная тэматыка прысутнічае ў шматлікіх лістах. Фралоў, апроч праблемаў РПЦ, надае вялікую ўвагу да «ўкраінскага пытаньня». Ён робіць максымум намаганьняў для блякаваньня натуральнага працэсу стварэньня ўкраінскай памеснай царквы, уцягваецца ва ўнутрыпалітычныя й канфэсійныя справы Украіны. Уплыў адбываецца праз блізкіх да РПЦ мітрапалітаў, асаблівая роля надаецца адэскаму Агафангелу.
3. Асноўныя інструманты ўплыву й аб’екты ўвагі Фралова – гэта розныя праэкты з прарасейскімі й праваслаўнымі ідэямі: «Аб’яднаньне расейцаў ва Украіне», «Саюз праваслаўных грамадзянаў Украіны», казачыя арганізацыі і г.д.
4. Рэгіёны найбольш актыўнай працы Фралова – АР Крым, Закарпацьце, Адэса, Данецк, Харкаў і Кіеў.
5. Паміж агентамі ўплыву з розных рэгіёнаў і арганізацыяў адбываецца канкурэнтная барацьба.

Матар’ял да публікацыі падрыхтаваў Giordano Bruno.

Пераклаў на беларускую мову Дзяніс Івашын.

(CC BY 4.0) Інфармацыя падрыхтаваная адмыслова для сайту InformNapalm.org, падчас поўнага або частковага перадруку й выкарыстаньня матар’ялу наўпроставая спасылка на аўтара і наш праэкт абавязковая.

Заклікаем чытачоў актыўна пашыраць нашыя публікацыі ў сацыяльных сетках, на форумах і СМІ. Наданьне матар’ялам расьледаваньняў шырокае агалоскі здатнае зьмяніць хаду інфармацыйнага і баявога супрацьстаяньня з Крамлём.